Korea Gam le Mi te: Zomi khat ii muhna pan (6) ~ Cope Suan Pau

Korea Gam le Mi te: Zomi khat ii muhna pan (6) ~ Cope Suan Pau

Kum 100 Khit Ciang Korea-gam le Zogam
Zomi te in kum 100 cin’ thupi ih sak mah bang in Korea-mi te in zong thupi sak uh hi. Zomi te in Christianity kum 100 ahi a, Zolai pian Cope topa kum 100 ahizong ih thupi sak mang bang in, Korea te in zongh Underwood kum 100[Yonsei University founded 1885]; Scranton kum 100 [Ewha Womans University founded 1886] cih te pawl thupi sak uh hi. Tua banah Pyongyang Revival kum 100 cin’[1907 Pyongyang khuapi kha khanlawhna] cih khawng thupi sak uh a, Transformation 2007 ci in Evangelical lam tengin nasiatak in pawipi bawl uh hi.

Tu a ih thulu kum 100 leu leu pen Japan Imperialist te’ zawhthawhna kum 100 cin’ phawkkikna ahi hi. Tu ma kum 100 lai in Japan Imperial te tawh Korea mi te in zawhthawhna thukimna annexation treaty khat letmat thu in thukimna bawl uh hi. Kum 100 khit ciang cih pen Korea peninsula leidawk buppi Japan Imperial te khut sung a tun’ khit kum 100 cihnopna hi a, tu August 2010 sung in kum 100 cing ta hi.

Tu ma kum 100 lai in Japan te in zo thawh mahmah uh a, Korea mi kheampeuh in Korea min zangh sak loin Japan min phuak sak uh hi. Korea lai sinsak nawnlo a, sang te ah Japan lai bek sinsak hi. Singkung gol khempeuh phuk paai uh a, tu ni dong Korea gam sungah sing kung gol om zo nawnlo ci hi. Korea mi te icon khat ahi taak sing kung te abei amon’ ding hanciam uh a, Japan taaksing cii pawi kawi kawi uh hi. Tu ni in Korea gamah taaksing nam nih ki mu thei a Korea taak sing le Japan taak sing kung te a hi hi. Korea taak sing te neu in kawi limliam uh a, zam dingdiang hi. Tua pen Korea gam ii icon khat in nei uh hi. Tua manin Japan te in susia ahi uh hi. Japan taak sing pen gol zaw in a kung maam zaw hi. Ateh zongh khalh zaw hi.

Nung a ih gen ngei sa mah bangin Japan te in force labor nakpitak in zangh uh a, numei te Japan galkap te’ “comfort women” ding in tampi man uh a, ut lo pi pi zawhthawh bawl uh hi. Tua thu hang in tu ni a dam lai pipi te pawlkhat Japan Embassy ah Wednesday nisial in awng den cih thu zongh ih gen khin zo a, Japan kumpi in tua lakah Japan galkap te kihel lo hi ci ni anial kikeei na pan, tu kha sung in akhat vei na Korea mi te tungah zawhthawhthu tawh agamtatna te uh pulak ta hi. Japan te in kum 35 sung uk cip uh a, 1910 August pan 1945 Aug 15 dong hi. Tu kha August 2010 in Japan te annexation kum 100 cing ta hi.

Korea mi te nasep le pilna tuam tuam ahanciamna uh pen, Japan te ademna uh ahi hi. Japan te in hong zawhthawhna pen ei mau thadah man hi ci in ngaihsun uh hi. Tua ahihman in thadah lo ding cih pen Korea mi te National Motto hi ngiat hi. Thadah lo ding, hanciam ding, manlang ding, cih pen mimal lungtang sungah khang kizom paisuak ding in guang khin uh hi. Tuni in leitungah Korea mi te nasep hanciam pen le manlang pen hi ding hi. IT pilna leitungah top hi a, Korean internet manlang pen hi.

Zomi te e le? Zomi te in leitung biakna pi ahi Christian ngeina sungah tanglai a ih Pasian ih biak theih kum 100 cing khin a, Romanized laimal tawh Zolai ih neih zawh zong kum 100 hong cing ta hi. Tu ni in Zomi te Christian 100% phial ki hi ta hi. Korea te Christian 50% nuai hi lai uh hi. Kuama khut nuai ah om ngeilo Zogam pen 1889 kum British annexation pan sim to le’ng kum 120 cing khin hi. 1896 Chin Hills Regulation pan sim le’ng kum 100 mah cing khin mawk hi.

Korea te bang a, veng te peuh ii zawhthawh kithuak lo a, nitumna lam Western te a kici mipil thahat te in hong uk hi a, Korea te tawh tehna in lamkhat pan angtanhuai kik mah mah hi. British colonial gam ih hih pen lei tungah mi gam mi lei mah tawh kibang in level khat ah ih om na hong suak bilbel hi. Ei Zogam zongh British colony khutnuai pan 1948 kum in suahtakna ih ngah hi. Tua ahih le tu ni in Zomi te’n Korea te koi ciang ciang ih ban hiam?

Tu laitak a president 16 na ahi Lee Myung-bak in kum 5 term sungah alang kheng khin a, tu in Lee has much to do in second halfterm lang nei lai hi. Korea te pen agam uh democratization and capitalization tawh nakpitak akalsuan uh hi a, tu in democracy lampi access maan tatak tung ta kici thei hi. A president te uh in gam le minam it mah mah uh a, khantohna ding nakpitak in vaihawm in nasem uh hi. Sum neek sim lamsang bribery nasiatak in ki kan uh a, tua vai tawh nung kum sungin a president lui pa uh keen pan leng suk in ki cuicide cih thu ih theihsa ahi hi.

Korea te zong nidang in thumanna zangh lo uh a, khat le khat kikhem bebek zangh hih tuak uh hi. Tua pan in kikhem nawn kei ni in, thuman zangh zaw ni, tua hi le meet zaw ding hi hang, ci in thuman thutak lam ah kihei minam te ahi uh hi. Ministry of Home Affair ih cih Kawlgam a Gamsung Vai Zumpi pen Korea te in Ministry of Justice cipah uh a, nasem officer te citak mah mah uh hi. ID card bawl na, passport bawlna cih te pawl pawl ah sum la cih khawng om dek suai lo hi. Vanleng tual ah line-zaih cih pian khawng om lo a, tu hun ciang Kawlgam le adang gam 20 val bang pan in Korea gam ah refugee kingen ahihman in Immigration officer te’n Kawlgam thu zongh hong thei mah mah ta uh hi.

Zomi te tangthu gen te zongh aman le aman lo hong tel mah mah ta uh a, refugee apply na ah ut peuh in ki phuaktawm thei tak lo hi. Phuahtawm tangthu cih pen hong thei ahihhang ih phuah tawm lam hong thei le uh officer te lung tom thei mah mah mawk uh hi. Na tangthu uh n’ong gen uh ciang, limtak in hong gen thei beek un, ci uh hi. Thuman thutak gen ding naseem mimal in deih mah mah uh hi.

Korea gam ah gam beel ngen pen leitung minam tuamtuam te lak ah Zomi te zongh kihel mah mah khat ahi hi. Kawlgalkap kumpi te in Zomi Christian te zothawh, biakna lam suaktalo, bawlsiatna om, etc. cih thu te bulphuh in tangthu khat ciat tawh gambeel angen uh hi a, nung in Zomi khempeuh phial reject thuak mawk uh a, tu laitak supreme court ah lawyer te cial in tungsiah akah laitak ahi hi.

Korea kumpi te in Kawlgamah biakna lam pang bawlsiatna om cih pen sang siam lo uh hi. Gamvai polotics bekmah sang siam uh hi. Korea kumpi kiangah gambeel refugee ih ngetna te le, Korea Christian pawlpi te in Zomi t’a ding shelter ci in mi cimawh om na ding inn hong vaihawmsak na te ngaihsut ciang, David kumpi pa in YHWH pen ka bukna refuge hi a, ka belhna shelter hi acik khawng kiphawk kik hi. Zomi t’a ding bukna maan le belhna muanhuai tatak pen Zomi te’ Pasian bekmah ahihna ih phawk sansan hi. Leitung ah bukna le belhna ding in gam hoih pen cih bang om thei tuan lo ding hi.

Zomi te in tulaitak gam thumna ah ih tai saan a, Korea mi te bel tu ma kum 50 val kum 60 lai Korea gal lai pek in a tai khin uh ahi hi. Tu in gamdang pan pilna le siamna tuamtuam tawh a gam uh hong zuan kik ta uh a, gam khantona ding nakpitak in nasem uh hi. Korea te in nidang a, abawlsia Japan te mudah tuan loin, dem bawl pawl bawl uh hi.

Tu in khantohna sumbawlna te ah Japan tawh kithuah mah mah a, lam khat ah dem bawl ih zo thawh kik ta uh hi. Kimawlna, innlamna, semiconductor, shipbuilding tembaw bawlna, technology leh adang industries tampi te ah Japan te zo thawh khin ta uh hi. Tua bang cih ciang in kidem gawp ding cih na hi pah lo zaw a, kipawl in khat le khat kizahtakna le kipawlsiamna tawh partnership bawl a amuanhuai veng le paam in ding khawm ta uh hi. Amau gel bek hi loin, Sen te le American te tawh nakpitak in economy bawl sawm uh hi.

Ei Zomi te zongh simleitungah Zomi teng bek cih tawh kiding tang zo peuhmah lo ding hi. Ih dinpih ding amuan huai, ih veng ih paam ding, ih partner ding kua te ahi diam? Kum 100 cin’ khit ciang Zomi te in mi tawh kipawl in parnership ih nei thei nai hiam? Ei teng beek ih kipawl thei ta diam? Mimal khat le khat, group khat le khat, beh khat le khat, khua khat le khua khat ih ki partner thei nai diam? [aban zom lai ding…] Cope Suan Pau