Korea Gam le Mi te: Zomi khat ii muhna pan (10) ~ Cope Suan Pau

Korea Gam le Mi te: Zomi khat ii muhna pan (10) ~ Cope Suan Pau

Abiahang’ Thupha Thuap Nih le Korea Mi Te
Abiahang’ thupha sang ding in Korea mi te kilawm uh hiam? Abiahang le Korea te bang kisai na om hiam? Abiahang pen Jews mi te’ pianna pupi hi a, Korea mi le minam dang te tawh kisai thei ding hiam?

Abiahang le YHWH Pasian kiciamna Abrahamic Covenant limtak en kik le’ng, Abraham tung tawn in minam khempeuh in thupha ngah lawh ding cih thu ih mu thei hi. Piancil 12:1ff ah Abiahang pen leitung mi te’ ading “thupha” suak ding a, amah thupha apia te YHWH in thupha pia ding…a ma’ tungtawn in leitung minam khempeuh in thupha ngah lawhding… cih thu te ih mu thei hi.

Korea Gam le Mi te’n Bang Hang in Abiahang’ Thupha Ngah Thei Uh Hiam?

Nidang in Kawlgam le Sen Gam te mah bangin Buddhist gam khat ahi Korea gam pen tu in Christian gam khat hong suak mawk ta hi. Seoul khuapi le a dang khuapi te’ sung mun khempeuh ah singlamteh ki mu thei mawk hi. Biakinn le Christian center tam mah mah cihna hi. Protestants 8.6 million le Catholics 5.1 million pha uh hi. Gam bup mi 52million lak ah 25% le 14% khawng cinuam tuak khawm uh ahih hang 2005 kumpi census ah Christian 29.2% ahi hi. Tu laitak in Protestant te a kiam laitak hi a, Catholic te ahih le a beisa kum 10 sungah 70% a khantoh laitak ahi hi.

Bang bang hi le gambup ii khen 3 suah khen khat pen Hananim cih Vang Lian Khat Pasian a um Christian cih theih hi mawk hi. Tua mun ah Pupi Abiahang tawh ki belpawl thei mah mah suak uh hi. Korea mi 4 lakah 1 pen Pupi Abiahang tawh ki belpawl uh hi mawk hi. Abiahang’ thupha san loh hi thei lo hi mawk hi. Abiahang’ thupha cih mawk pen, thahat ngiat ding, cidam ding, neih le lam kicing ding, sum le paii hau ding, khangto ding, minam pi khat in ding zo ding, leitung minam le gam tuamtuam te’ lak ah madawk lam hi ding, etc., etc. hi mawk hi.

Tua bang a thupha ngah ding pen a kipheng ngah theih mawk mawk hi lo a, upna tawh kalsuanna, hanciamna, cihtakna, piakkhiatna, ki pumpiak ngamna, etc., etc., te tampi kisam ahi hi. Korea Christian te in nisim in zingsang phalvak thunget nai 5:00A.M. ta in biakinn sim ah nei uh hi. Ei Zomi te’n zingsang in thunget ding ih phawk kha tawntung hiam? Leitung ah gam 150 val te ah missionary 20,000 val sawl khia uh hi. Zomi te’n missionary bangzah minamdang te kiangah ih sawl khia khin hiam?

Nung kum 4 lai pawl in Afganistan ah pawlpi khat pan khangno mission team khat pai uh a, Taliban te’n makai 2 te that lum uh hi. Korea kumpi in phallo hi kei leh, khangno tampitak paibeh nuam lai uh hi. Ei’ sihna hangin amau’ Jesu’ gupna le Pasian’ it na tel tuam ding ahih le, va pai in va si ni ci uh hi. Khangno tampi a si dingin kipia khia ngam lel mawk uh hi. Ei Zomi te’n ih eng ngam diam? Thupha cih pen ki mawk ngah ngei lo a, thalawh kul, manh piak kul hi. “No pain, no gain” mah na hi ve ve mawk hi.

Korea pawlpi te’n a buai pih pen pen uh pen mission nasepna ahi hi. Zomi te danin voksa neek le neek loh peuh, an siang le siang lo peuh tawh buai man dih dih lo uh hi. Ni sim zing sang tho baih ding, thungen ding, tua khit nasep kuan ding, nikhat nai 12 na seem ding, tua sung pan mission a ding sumpi khen khia ding, etc. cih dan in nisim kalsuanna nei mawk uh ahihmanin mission khah khia zo mah mah uh hi. Tua bang gam le minam te tungah Abiahang’ Pasian in thupha dawp piak mawk mah ding hiam?

Abiahang’ Thupha Dang Khat Mah

Korea mi pasal khempeuh phial in vun teep at uh hi. Bang hang hiam? Abrahamic Covenant a zuihna uh hiam? Ahih kei le, a tanglai ngeina uh maw? Confucius in sawl maw? Khat zongh hi peuh mah lo hi. Korea ah phalbi kha 6 sung bang khua dam lua ahihman in pasal te zunthakna ah vun teep sau le nawng kai mah mah ahihman hi. Pasalno khempeuh vun teep at tan uh a, “sauna” le “cimcilbang” kisilna te ah pai le’ng lu kolh kiukiau vi ve hi a, ei a te kolh kei le a lamdang pi khat hong suak kik leu leu hi.

Korea mi te’ upna ah vun at le’ng nasepna ah kawng zongh na thei lo ci uh hi. Ei Zomi nasem te kawng na baih mah mah a, Korea te’n vun at ding han tawn mah mah uh hi. Tua dung zui in Korea ah Zomi vun at tam mah mah khin ta hi. Lai Siangtho sang kah papi te zong vun at sa in aciah kik uh pen inn tun ciang zi te khasia het lo cih thu kiza ahihman in ‘thupha’ nam khat hi ci in Korea om Zomi te’n ngaihsun uh hi.

Cidamna tawh zongh ki bel pawl mah mah khat hih tuak lai hi. Siang tho sin sen pah ahihman in nu pa te ading zongh zi le pasal a nih tuak un natna tuam tuam dal tuam pah ci hi. Naupang te a suah zawh ni 8 ni ciang vun at Jews minam te lak ah penis cancer 100% om lo a, kum 8 ciang a at pan Muslim te’ lak ah tawm khat om thei ci hi. Tua ahihman in Zomi te pasal no peuh mah nau pang lai in vun teep at le’ng cidamna lamah Abiahang’ thupha khat ki ngah thei hi gige mawk hi. Cope Suan Pau