Kong a neilo Hong Kong – 5 ~ Hau Za Cin

Kong a neilo Hong Kong – 5 ~ Hau Za Cin

Tuabanga Sia PL Mangno maanla dinga hong ki ‘pose’ gihgeh zawh ciangin group foto, and other single photos in zui a, damdam in a paam lam ka zuanphei suak uh a, lampi kantan in Victoria Horbour (England Kumpinu Victoria min suanga Tembaw Khawlna) ka tung phei uh hi.

Mei na vaak zihziah in, luigal a meivakte tuipi in leng’ (reflect) kik ahih manin etlawm mahmah diak a, inn sang minthang diak – Bank of China Tower, HSBC Headquarter Building, 2 International Financial Centre Building te kilim dawkpenpen hi. A gallam pen Hong Kong island lam ahih manin gunkuang tawh Victoria Tembaw Khawlna kantan in pai kulse hi. Ka pai kei uh hi.

Restroom (India ah Toilet kici) ka hawh khit uh ciangin tuipi gei a mun hoih mahmah te en pheiphei dingin khe tawh damdam in ka pai phei uh a, Sia Lianpi in mailamah video CD lasakna a khahkik cianga a milim dingin koh teng khawng hong baan laak zanzan in, (nungak khawng zong lasim zel hiam thei kei ing), mi cih bangin ko zong khatvei group photo ka kizaih kik uh a, nihvei hizaw ei, tua zawh ciangin Avenue of Stars kicina lam ka paiphei uh hi.

Hello Bruce Lee!

“Enter The Dragon” cih suak ding hi ciin Lamka ka zin masak lai in ka puno te khat in Video en dingin hong zawn a, kei zong ka khatvei muhna ding hi veh e ciin ka zui hi. A pu puteek khamul sau mahmah ahih lam leh, a awm ah khut cin tawh a kikuihsak khutcin lim dawk a sisan hong luang khia zungzungte ka mitkha ah tu dongin thaam dena, amah kua hiam cih ka theician zaw ngei kei hi. 2006 May a Taiwan ka tun ciangin hih ni in Bruce Lee thu ka dong kawikawi zel a, lawmte in hong gen ban ah Youtube ah video clips leh ama tangthu gelhna online news leh blogs tuamtuam ka sim zel te in amah kua hiam cih ka theihna nakpi takin ka behlap a, ahi zongin tu zan in ama khesikna mun leh mual ah ka khe ka va nga thei a, amah maan a kizaihna mun ama lim (statue) tawh maan ka kizaih kha a, a khut sawkphei in, HELLO BRUCE LEE ciin ka ‘nohset’ hi (oh, sorry, kawlpau hong kihel zeuhzeuh leh Sia Lianpi tawh kikhawl kha taktak hi cih laisim kuamah peuhin hong na tel sakta un, please, ka lungdam), ka ‘greets’ hi.

Hong Kong pen Hollywood mah bangin Chinese te adingin Film Industry munpi khat hi a, Film stars tampi Hong Kong pan piangin, zong piangzellai a, film zong tampi ki bawl khia hi. Jackie Chan, Sumo Hung, Bruce Lee, Anita Mui, Rosemond Kwon, etc. cihte HK pan minthang hi in, HK a kingakna bulpi uh hi. Hih mi minthang tampi lak pan milim (Statue) khat bekbek bawl uh a, tua in Bruce Lee (Lee Siu Long, Lee, the Small Dragon) akici pa bek hi. Tua a khiatna pen Bruce Lee kizahtak lua, bangzahta in zahtak in it tuam , thupi bawl tuam sese uh hiam cihna hi. He is so special to HK. Midangte pen a khut lim (Hand imprint), a khe lim (Foot imprint) cih bang bek leh amin uh kigelh lel a, ahi zongin Bruce Lee pen a lim (statue) kibawl sese hi. 1996 kum hia, Shillongah Master Sing Khan Thang (black belt), Pearsonmun, Lamka tawh ama inn ah Kumthak zana The Green Hornet ka et vua, Bruce Lee in, “In Hong Kong, in Hong Kong….” a cih khawng hong phawksak mahmah hi.

“CHINESE MOON Festival Magic Show”:

Avenue of Stars ah film stars minthang tampi te – a min uh theihngei tawh, theihngei loh tawh, tua teng et khit ciang inn lam ciah dinga ka pai phei uh leh “CHINESE MOON Festival Magic Show” ka tuak phei uh a, Sianu beklo, sia Dal Mang leh Sia Lianpi zong Sia P L Mangno mah bangin mit kia dekdek liangin en in, Victoria Horbour tunga Hong Kong khaliik, October khaliik zan Kawlgama lungzuang taka a ngak ‘ngaihno’ te phawk lo bang keek in a zang uh hi. Chinese Moon Festival holidays hanga hitan zin thei hi ing cih ciamtehna dingin Victoria Horbour leh Lengtong Pauno ‘Vana Tungsolkhapi’ maan khatvei ka zaih a, meipi kawm ah kidawk veva saam hi.

Good Night and Good Bye Victoria Hourbour: Zanni in, sun nisa nuai ah guahzu pi in pai khin hi mah le ung, tuzan pen special sese a, ahang pen ka makaipi uh Sia PL Mangno a om hang hi. Tua bek hilo in, Hong Kong ah Zomi a om khempeuh, ko theihna ah tuazan kimtak a ka kikholh hun nunung uh hita ding cih ka thei vua, ahi zongin ‘hun leh tuiluang in kuamah hong ngaklo’ cih mah bangin nuamsa in, aam in, khia-lah ta se le ung, zan hong sawt dinga, khattangzalna laikhun ciat mah ka zuat uh hong kisam ding ahih manin naupang pen ihmut suakta cih man hilo in ciah ding ka vai hawm uh hong hunta a, ‘Good night and Good Bye Victoria Horbour’ ka ci maita uh hi.

Maan tampi ka kizaihte uh, Sia Lianpi in video kilawm taktak a zaihte leh interview tuamtuam a zaihte, cikni hiam ciang muh kik om dinga, ‘Aw, tua hun lai aw’ ciin lungleng takin ki en kik ding hi. Ahi zongin hih sanga hun nuamzaw leh hun pha zawte in hong ngaklai a, i muhsa sang i muh lai dingte lawp huaizaw thamtham hi. Mihing nuntakna pen i tuaksa sang i tuak lai dingte a nopci zaw vive ahih manin…. lawp tak in MTR station lam zuanin ka diang phei uh a, lampi kaantan, meileng ah tuang, zansawt ta leh maimial leh ihmut suak om hetlo in, lungdam, lungkim, thadim takin ka omna lam uh ka zuan uh hi.

Ciamteh ding: Meileng sungah Sia Lianpi leh Sia Dal Mang in nungak melhoih video a zaihsim man vua Sia Dal Mang in a Meileng Card leh a ‘leihsa’ sorry, (kawlpau hi zel hia Sia Lianpi?.. ha ha… ) address book ka cihna hi ei.. a mansak thute, Sia PL Mang bek lungleeng taka a tuamciah vangvang thute leh, LTS lam zuana lamto mahmah ah ka paitoh ngeungeu lai vua…. ‘US ah tulaitak nai tuazah hi ding hi’ hong ci khia kha buatbuat omte ka gen nawn dah mai ding hi.

Zomi Prays Together and Bless each other:

Inn ka tun uh ciang keima giahna room ah tukhawm in, Jacob in, “Topa in hih ciang hong tunpih ahih manin amah phawkna mualsuang ka phut ding hi ciin ‘Bethel’ ah mualsuang khat a phuh bangin, ko, Zomi, tua laitak Hong Kong ah a omte in Topa ompihna leh hih bang hong kithuahkhopsakna hanga lungdamko in mualsuang khat ka phut uh a, khat leh khat thupha kipia in, lungnuam takin ka ihmu ta uh hi. Mangpha, see you tomorrow.

Hun neih leh ….. zop lai ding….. Dr. Hau Za Cin