Koici leng Lawhcing ding

Koici leng Lawhcing ding

Mi khem peuh in lawh cin ki ut ciat hi.Ahi zongin ki lawh cing kim lo hi.Lawh cin nanga a ki tangsam pawl khat gen khawm ni.

1.TUPNA NEI DING: Lawhcin na i neih theih nangin tupna ki cian i neih masak phawt kul hi.Tipna nei bek tham lo in tum guh mah mah kisam hi.Tupna ki cian nei lo mi te pen, tuipi tunga nahteh huih mutna lam lam a ki hei kawi kawi tawh kibang hi.

Tum gukna hanga lawhcing mi tampi tak awm hi.Tua te laka Helen Keller tangthu en pak leng.” Na khat peuh tupma a awm nak leh a piang theilo awm lo hi” na ci hi.Kum khat leh a lang mi bek ahih laiin a mit taw in pau thei lo a, a beng zong ngawng lai hi.Kum guk a hong cin ciangin mittaw lai tawh lai hong sin hi.Pau thei nuam lua in kisin sin a a tawpna ah pau thei mawk hi.Tua a ki pan a tupna bangmah in dal zo nawn lo hi.Kum 19 a phak ciang B.A hong passed in, Lecturer na sema, laibu 80 val bang gelh lai hi.

Zomi khat ciat ki ngaihsun pha ni.Bengngawng, khaw mulo leh pau thei lo khat hi zahin lawhcing thei a hih leh ei cidam te bang hangin lawhcing thei lo ding?Nang zong lawh cin na ut leh tumguhna nei in.

2.LUNGKE LO DING:Lam et beina , lung kiatna te in i lawkcin nang hong dal thei hi.Mi thupi leh lawhcing i cih te nangawn in khialh hun leh mualpho hun na nei ve ve uh hi.Ahi zongin tua bang hun ciang in amaute lung ke lo in a tupna bang un kal suan tei tei uh hi.Tua man in a tawpna ah lawhcinna nei thei ve ve uh hi.

Lungkiat hun a lung ke lo a atawpna a lawhcing mi tampi aw2m uh hi.Tua te laka khat Abraham Lincoln nuntakna en dih ni.A nau pan laiin a nu in sih san in, sang zong kah gina thei lo hi.Tua bangin hong tangval to hi.Politics ah lut in ki teelna ah hong ki candidate a, ke pah hi.Tua khit ciang tuh kik a cing tuan lo hi.Sum bawl na lam kipan le lah lawhcing thei tuan lo ih nasep zawng le lah mu thei mah mah lo hi.

A hi zongin lung ke lo in politics mah ah hong lut kik hi.Kum 1846 ciang American Congress M.P in hong cing thei pan hi.Kum 1856 ciang Vice President tuha, cing zo lo hi.Ki teel kik ciang zong ke kik hi.A tawpna ah kum 1860 ciang American President dingin hong cing hi.Lung ke lo a a kalsuan manin mi tampi takin suahtak na ngah in, lei tung ah mi minthang khat hong suak thei hi.

Mi pawl khat te i nasepna ah haksatna phu kha pan leng, lung ke pah thei hi hang.Lametna nangawn nei zolo in thanem pah thei mawk hi hang.Tuabang ding hi lo hi.Lungsim lam a sin Thales i ,”Lametna pen mi zong te ann hi” na ci hi.Lametna zong a nei zo nawn lo mi hing pen lawhcing ngeilo ding hi.

3.THEIH TAWP SUAH DING:America President lui Jimmy Carter in a tangval laiin tembaw galkap lak na ah lai vuana a sawm leh lina ngah hi.Admiral pa in interview na ah, ” na theihtawp suah le teh a khatna la thei ni teh” na ci ci.Tua pa thugen in a lungsim su kha mah mah hi.Tua a ki pan a hihna peuh peuhah a theih tawp suahin a khatna la den takpi hi.Kamphatna i tan theih na dingin theih tawp i suah kul hi.A sepna peuhah a theihtawp a suah mi pen lawhsam ngei lo hi.

4.HANGSAN DING:Ei sep bang a sem leh ei sawm bang a sawm mi tampi lawhsam khin uh hi.Tua te hangin lung ke loa hangsan taka mainawt ding kisam hi.Mei dawi na tawh lawh cin nang lampi sau ki zui zolo hi.Mi lawhcing te haza loa en ding ahi hi.Mi hih theih khat nang zong a hih thei lo dingin ki ngaihsun tuan kei in.Lungsim niamna(inferiority complex) nei kha peuh mah kei in.

Leitung i nuntak sung in haksatna leh buaina tampi in hong nawk den hi.Ki lung neu ngaihsut leng leitung pen mial mah mah hi.Ahizongin a hoih lamin ngaihsun leng leitung pen nuam in vaak hi.Tua ahih manin na khat peuh peuh a hoih lamin ngaihsun den in.Mang ten zong “Be Optimist” na ci uh hi.

N.Pau Tun Thang
Mumbai, India