Malaysia, Klang ah guta te’n nupikhat ii akhi asuhsawm laitak Video ki khahkhia

Malaysia, Klang ah guta te’n nupikhat ii akhi asuhsawm laitak Video ki khahkhia

Malaysia, Klang vengsung ah pasal 2 in Motorcycle tuangkawmsa in nupi khat ii suaikhi (Gold necklace) asuhsawm laitak Video Clip ki khahkhia hi. Hih thupiang pen tuni Thursday suntangpi in thupiang hi a, guta “snatch thieves” te ii gamtatna pen CCTV panin kiciantak in ki muthei hi.

Klang, Taman Chi Lung vengsung aom SK Simpang Lima School kici sanginnmai ah thupiang ahihi. Tua nupinu pen kum 39 aphakhin khat hi a, amahpen sanginnlam zuanin atate sangdawnding in khetawh apai ahihi.

CCTV sungah pasal 2 pen Motorcycle khattung ah tuangkhawm in sanginnlam zuanin paiphei uh a, nupinu khetawh apailam zong mukhol in asuhnading amun alem azongzong hihtuak hi.

Tuaciangin Motorcycle kilehsakkik in, ahawlpa in nupinu kiangah apainading uh Direction adong kineih hi. Tualaitak in anungah atuangpa “Pillion rider” in thakhatthu in nupinu ii Gold Necklace pen akhuttawh sawtpheisak hi.

Ahi zongin nupinu ii akhi pen lenkhalo, mankhalo bilbel uhhi.

Khi asuhsawm khitcinagin guta tepen Motorcycle tawh taikhiasuak vingveng in, anungah atuangpa bang tuangmanlo dentakliang hi. Apamdeuh ah pasal khatin gutate namatsawm in, mankhalo citciat in taisuahsuak uhhi.

Tua nupinu pen sanginn ah atate adawndingin apai hi a, atate pen kum 8 khatleh kum 12 aphakhat kici hi.

Klang Selatan police chief ACP Shamsul Amar Ramlee ii agenkhiatna ah nupinu pen bangmah liamna omlo in, akhizong ki suhsak khalo hi. Video Footage te ki encianin guta tepen mattheih nading ki hanciamsan hi ci’n genkhia hi.

More: Malaysia, Nilai aom Suai zuakna ah gutalut, Myanmar hiding ki ummawh

Suaikhi (Gold necklace) golpipi khawng na awhkhakleh guta damiah te acilphul mahmahding uh a, hong mitsuanpah gige khatheiding cih phawk huai mahmah hi. Amau gammi leh gammi ciatciat nangawnzong suntangpi mahin kisut ngammawk uh ahih manin, gamdangmi tepen hong zahtak hetloding uhhi. Sawltak #zomidaily