KL khuasung sanginn meikang pen akihalsak cimawk, mi 23 takin sihlawh

KL khuasung sanginn meikang pen akihalsak cimawk, mi 23 takin sihlawh

Malaysia, Kuala Lumpur khuasung aom biakna sanginnkhat meikatna vaipen akikankan ciangin aki halsak cimawk hi. Tusungteng Malaysian gammi te’n tuavai vive lunglut mahmah uh a, Video Clip leh Photo tuamtuam zong ki khahkhia hi.

Malaysian Media te’n akhahkhia Video Clip sungkhatah sanginn meitawh ahalte alutlaitak kimu hi. Sanginn meikat madeuh nainih akisap laitak, Thursday 3:10am hunin khangno khat sanginn sikkongkhak kantan in alutlaitak Video sungah ki muthei hi.

Darul Quran Ittifaqiyah Tahfiz kici biakna sanginn sungah akhut akhe tawh bawhvakphei in alutlaitak CCTV panin kimu a, amaitang zong kitel mahmah cihi.

Tua CCTV pen Jalan Datuk Keramat aom meikatna tawh akizom in aom Building khatah akithuah ahihi. Tua CCTV panin aki Record kha Video tungtawn in khangno mi 7 akimankhia hi a, tua sanginn meihal tepen khangno kum 11 panin kum 18 kikal ahi uhhi. Kum tawmtheilai mahmahuh himahleh agitloh gamtatna uhhangin mihing luang 23 takin sihlawh ahih manin, Malaysia gambup linglawng sakzo uhhi.

Asi sangnaupang tepen kum 7 panin kum 17 kikal hi uh a, meikatna hangin meikhu tawh nakzolo in asi uh ahihi. Asi lakah sangsia “Teacher” nihzong kihel uhhi.

Malaysia gamsung ah abeisa 1989 September khasung inzong Kedah State sung aom Islamic School Hostel khat meikang ngeihi. Tuahunlai in sangnaupang numei bekbek 27 takin sihlawh uhhi. Tuakhitzawh meikatna hangin mi tampi sihkhatin asi omngeilo a, tutung Kuala Lumpur khuasung sanginn meikang pen meikatna hangin asi atampen nihna kici hi.

Kuala Lumpur Police te genkhiatna ah hih KL sanginn meikatna, mei kihalna pen aphu kilakna, thuhkikna “Revenge” hi ci uhhi. Sanginn ah akah sangnaupang te leh apualam khangno te kikamtam in, kinialna omkha a, tuateng lungkimlo in, apualam khangno te’n sanginn meitawh ahal ngiat uh cimawk hi. Tuaban ah tua khangno meihal tepen kanza “Marijuana” zong tep uh cih asisan Blood Test panin ki theikhia hi.

Akiman khangno te’nzong kahal ngiatmah uhhi ci’n genkhiakhin uhhi. Sangnaupang te lupna apualam ah Gas Cylinder bungnih domto uh a, tuate Gas honsa in koihin, tuakhitciang datsi buaksuk kawikawi uh a, anuai panin ahaltoh kici hi. Meihal tepen tuakhit ciangin Motorcycle tawh taikhia vingveng uh cihi.

Video: Fire at religious school in KL kills over 20 students

Ms Noorazlina Bakry kici nupi khat ii atapa kum 11 bek aphapan khatzong asi lakah kihel hi. Tua nu in agenkhiatna ah hihbangin mei ahalngiat tepen amel mahmahzong munuamkeng. Amawhna uh meisak ngeingei keining ci’n hehmahmah, dahmahmah kawmin genkhia hi.

Hih meikatna vai hangin palik mi 13 tezong thusit thuakdikdek uh cihi. Athu aki kankansan laitak in khuasung mipite tungah meikatzia nagenkhiakha uh ahih manin, thusit athuaklawh uh ahihi.

Related: London khuasung aom vanzuakna khat meikanggawp leuleu

Kuala Lumpur CID chief SAC Rusdi Md Isa in agenkhiatna ah tua Policemen tengin athu mansiangnailo in nakehkhiasak, Information Leak ahih manin, “Section 203A of the Penal Code and Section 233 of the Communications and Multimedia Act” thukhun tawh kizui in thusit athuak uh cihi. Ahi zongin akimanliang bel omsamlo uhhi.

Kum 11 pan 18 kikal khangno mi 7 te gitloh gamtatna hangin sanginn meikang in, mihing luang 23 takin asihlawh uh ahhi. Sawltak #zomidaily