Kipsak pulakna (Affirmation for Success)

Kipsak pulakna (Affirmation for Success)

Thupatna: Kipsak pulakna cihpen thumantak khat kiciantak in gengenna (pulak khiatkhiatna) a hihi. A hoihlam ngaihsutna sungah vangliatna zong om hi. Na pulak kammalte a taktak in om nailo hi. A hizongin a taktak in hong piangding hi ci in na upte a hihi.

Na piannop bangin pulak khia in. Tua na piannop bangpen tulaitak in a omnailo mah hiaa a om na dingin na kamtawh thu a piapia na hita hi. Ih lungsim sungaa I ngaihsutna leh sunmang te in i nuntakna hong hawl/bawl bawl a hihi.

A hoih lam bekbek ngaihsutna in na nuntakna hong kilamdangsak ding hi. Na sunglam ngaihsutna a kikhel nadingin na kamtawh kipsak pulakna na neih masak ding kisam hi. Tua pulakna pen a masa khuambulpi a hihi.

Banghang kipsak pulakna kisam hiam?

Kipsak pulakna kisam hi, banghanghiamcihleh na neihnailoh nakhat deih na hihman a hihi. ‘Na lungsim sungaa na deih mawkmawk khat zong a taktak in hong piangthei hi. Na sunglam pilna in nisim in sawlna khat ngah den hi.

Tulaitak aa na pianzia pen na sunglam aa om na ngaihsutna pan in thakhat a hong pusuakkhia a hihi. Nang le nang na kicih banglian in a piang na hihi. Tuahiaa tuni aa na khelzawhloh ngeina hoihlo leh na deihloh na pianzia khempeuh kisak pulakna tawh na beisak thei hi.

Na kamtawh na pulakkhiatna in cidamna, kimuanna leh kimlepam tawh a hoih kizopna hong pia thei hi.

Bangci pulak ding?

A hoihlam kipsak pulakna na neihciangin upna taktawh na pau ding kisam hi. A hoihlam kammal bek zang in. A beisa leh zingciang cihkammal te zangkei in la ‘Tu in/tu laitak cihte zangin. ‘Ka hi ngei hi, ka hiding hi’ cihte hilo in ‘ka hihi’ ci in pulak in.

Na phawksim in thuhoih/na deihpen pulaklak, genkhiakhia den in. Tua kampauna ah citak inla hamciam in nei in. Tua hileh na hoih, na pulak te a taktak in hong piang pelmawh ding hi.

A gingkhia in na pulak theih kei lehzong na lungsim mittawh na deihdan en inla na lungsim sungah pulaklak lel in. Lungsim sungah kam na paulaitak in na pumpi leh ngaihsutna daisak (relax) in.

A hoih kipsakna kammal pawlkhat

Ka lungdam hi. Ka lungnuam hi. Ka ngaihsutna ka ukzo hi. Itna in hong kimkot hi. Kei le kei ki it in hoih ka kisa hi. Pasian itna ka sungah hong om hi. Hauhna le punna sungah nisim in ka khangto mahmah hi. Zatding sum a kicingin ka nei hi. Ka pumpi cidam hi. Hatna leh septheihna tampi ka nei hi. Hibangin nisim, naisim, hunsim, khua naphawk sim in kipsak in na kam tawh pulaklak le cin nalamdang hong piang pelmawh ding hi.

Thukhupna

Leitung bup na ukzawh ma in nang le nang ki uk zo masa in. Hih lamtawh kisai pilna nei Dr. Candace Pert. Ph.D in ‘na ngaihsutna leh na kampauna bang tektek in a piangna hihi’ ci in gelh hi.

Na kampau, na pulak khiat bangin a taktak hong suahna ding bangin na sem hiamcih buaipih ding hilo hi. Ahizongin a taktak in hong piang veve ding hi. Na ngaihsutna in na nuntakna hong kilamdangsak thei a hihlam phawktawntung in.

A hoihlam na pulak khiat denna in na kim le pam leh na leitung hong khelsak dingaa na lunggulh leh na deih lawhcinna hong ngahpih taktak ding hi. Siamsin Library