Kipawlkhopna Ah Kithutuahna Om (Sial vom le Sial vom Kingai)

Kipawlkhopna Ah Kithutuahna Om (Sial vom le Sial vom Kingai)

Kipawl khopna in kithutuahna hi

Amasa in, Kipawl khopna in pawlpih loh ding nei cihna hi. Khrih tawh ih kipawl leh leitung biaknate tawh kipawl lo ding cihna hi. Amaute’ lakah meivak le ci bang ding hi zaw hi hang. Kha Siangtho tawh ih kidim leh zu le sa tawh kidiah lo ding cihna hi. Pasian numbat khatin ih koih leh thumaan lohna tawh kidim kipawlna ah kihel lo ding cihna hi. Kipawlkhopna a omna pen kipawl pih theihloh nei ciat cihna hi. Kipawlkhopna thupi sak lua in, Khrih thu a suut man lo ih hih khak ding cih ngaihsut piakna hi. Sepkhopna thupi sak lua in, Lai Siangtho Pasian kammal hong lamlahna doctrine om lopi in kipawl miatmuat gawpa, a sem gawpgawp, gospel a vak gawpgawp, up ding teng um loin, up loh dingteng a um gawpgawp, doctrine nei lo thei lo deih lo pipi in Pawlpi kem Sya khawng ut gawpgawp cihte pawl a om loh ding daal kholhna hi bek hi. A uphuai lo thu upna pen upna kici lo hi. A uphuai thu doctrine in hilh hi. Christian doctrine tawh kipawl lo, LStho doctrine nei lo upna in a si hi. Sihna a pawlpihte sihna tawh a kithutuak ahi hi. Sihna pawlpih kei in.

Gentehna, Kipawlna, sepkhopna ih cihcih hangin, eimau’ Pawlpi ciat taisan in Rome khutnuai-ah ih ciah nuam het kei, ih kipawl nuam het kei, ih ki-ap nuam het kei uh hi. Tua ahih manin, kipawlna sepkhopna hangin na Pawlpi’ upna le doctrine titsa-a-phauh na hih ding kidop huai zaw hi. Hih thu ka genteh, kipawlkhopna hoihte ah kipawl lo ding cihna hi kilkel lo hi. Banghang hiam cih leh gutate vanzuak leisak khak bek zong kipawlpih ci-in kumpi’ thukham in man thei hi. Tua mah bangin Khrih tawh na kipawl leh leitung mite in hong mudah ding uh hi. Khrih pawlpih na hih man hi pah hi.

Anihna ah, Kikthutuahlohna in kipawlkhoplahna hi pah lo hi cih phawk masa ni. Meeting ih kah ciang zong kithukim siangna om pah lo ding hi, cih thukim sa-a ih pai ding ahi hi. Nasep tawh kisai ah, Khrih thu a nial le Khrih thu a sang mi nih in nasem khawm den lel hi hang. Ahi zongin ei Christian te adingin Khrih thu a seel bawl, a zaangkhai bawl, a ciamnuih bawl, Khrih thu a masak ngam lo kipawlna pen kithutuahna limci hi lo kha ding hi. Khrih min suang pongmawkin ahih hang Ama’ deihna ahi tua Adikna ih nungta sak takpi hiam cihna hi. Mite kipawlna in Christ-Centered loin Joker-Centered uh hi. Thutak gente kiciamnuih in kido vilvel a, ciamnuih gente’ thugen thutak lak bilbel leuleu uh ahih manun ciamnuih gal kituak zelzel a, tuikhia nuinui kitam hi. Ih tuah gal, ih nuih gu a hang a bul ih thei nuam kei lai hi. Tua ahih manin Zato pai lehang naungek suak tung pan kipan a taltak pen dong kahna le hagawina ging ziahziah a, ih gam ih lei ah, zawnna le kialna hangin phengphiitna le zuautheihna, thumaan lohna le gitlohna, kideidanna le cihtaklohna khang khiinkhian hi. Kha thu tawh kisai ah eite’ kipawlna in Jesuh a lungdam sak takpi mah diam? Eite kipawlna hong kipawl nuam lote kipawlna nei lote kisa thei hi. Tua zong na hi khin pah sam lo hi. Gam thu tawh kisai ah, kipawl ding hun 2014 kum le kipawl nading mun 914na ah hong kipawl nuam lo ih sanggamte bangci bangin minam itna taktak lak thei na hiam cih Pasian in hong kal na hi zaw thei hi.

Sawltak 23: 1-35 sungteng sim lehang ui le keel a bang Pharisee te le Sadducee te hong kipawlkhop theihna uh pen Paul muhdah bawlsiat langpan nading thu ah hi a, tua kipawlna pen Paul thahlup ding kithutuahna hi pah hi. Kipawlkhopna in kithutuahna hi.

Pharisee: Pharisee ih cihte pen vantungmite’ thu, kha thu le hong tung ding thawhkikna thu a umte hi bilbel uh ahih manin tua thu a um lo Sudducee te tawh kipawl lo bek loin ui le keel a bang uh hi. Kipawl lohna in thukimpih lohna hi.

Sadducee: Sadducee ih cihte pen vantungmite’ thu, kha thu le hong tung ding thawhkikna thu a um lote, a nialte ahih manun, Pharisee te le Sadducee te pen Jesuh le a nungzuite bawlsiat nading kithutuahna lo buangah ui le keel a bangte ahi uh hi. Hih bangmah in lawkite kipawlkhop theihna thu khat bek om a, tua pen Jesuh Khrih le a nungzui citak (a dikzul lo, a Limsang lo) mite hepkhiat ding le thah ding kithutuahna thu bek mah ahi hi. Mi khat thah nadingin Pharisee te le Sadducee te bangin kipawlkhop loh hoih hi. A lang khat leuleu ah ih upna a dikzul, a taisan ih hih khakloh nading Pharisee te bangin Sadducee te tawh kizop loh hoih hi. A pan Z pen gen kul loin a kizom a kipawl ahih hangin C le Z kipawlkhop loh zia a kisapna om hi.

Thumna ah, gam le minam vai ah kipawlkhop loh phamawh a, Pawlpi le Upna vai ah kipawlkhop theihlohna phamawh hi. Tuazia tawh a khuasa lo Pawlpi ki-om lo hi. Kipawlna tawh kisai communism tawh a kimakaih, Sente – Rasiate pen Pasian’ mai ah a limci pen na hi lo uh hi. Ahi zongin hun khat lai-in Pasian’ kammal bulphuh in a kipawl mitawm cik khatte’ makaihna tawh USA ong kiphut a, thupha hong sang uh hi. Ahi zongin hih USA in tuni in Pasian’ kammal tawh kipawl nawn loin om leh damdam in tulaitak ih muh sak a gahte hong pulh kik mawh ding hi lo hi.

Zomi te ih kipawl theih nadingin “C”te tawh kipawl lohna kisam hi. Kipawl thei lo hi hang. Kipawl lo ding hi hang. Ahi zongin damdamin kipawlkhop zia, sep khop zia khat a nei veve kik dingte ih hi hi. Christian te ih khamuan nadingin ih Pawlpi ciat ah ih kip kul hi. Minam ading nasem cih leh naingngaanzi kibang lo hi. Leitung tawh a kikhen khia thei nai lote ih hih hangin leitung tawh kipawl ding ci-in Lai Siangtho in gen lo hi. Christian upna zong naingngaanzi tawh kikhen khia thei lo ahih hangin kipawlkhawm ding cihna hi lo a, tua khuamial naingngaanzi adingin khuavak bang ding cihna hi zaw hi. Leitung gamthu le vantung gamthu a kikhen khia thei nai lo ahihna hang keek mah in, Christiante in ih khuavaak tansak ding a kisapna hong lak hi. It is not vice-versa.

Biakna le gamthu (nainngaanzi) bel a kipum khat hi. To be a Myanmar is to be a Buddhist. Khaubangin a kihual khawm ahi hi. Buddhism le Kawl Kumpi, Islam biakna le Moslem gamte, Hindu biakna le India Naingngaanzi…etc. Christianity is not a religion. It is about faith in Christ. Christian thuzuihna pen biakna hi masa nawn loin Upna thu hi. Hehpihna tawh kisai hi. Christianity pen Lungdamna thu hi. Tua suangdalahih man in biakna cih kammal sangin Pawlpi cih kammal kizang zaw hi. Naingngaanzi le Pawlpi khaubangin kihual khawm thei lo a, ahi zongin Naingngaanzi le biakna pen nang khuituah kul loin a kikhuituah lua khin na hi zaw! Tua biakna le naingngaanzi khuamial khuavaak tawh a tan suk ding pen Pawlpi the Church ahi hi.

Naingngaanzi adingin khuavaak a pia ding Pawlpi kisam a, Pawlpi in naingngaanzi kisam lo hi. Pasian pen nang le kei lo tawh hi thei a, nang le kei pen Pasian lo tawh ih hi thei kei hi. Biakna le naingngaanzi gamvai pen a kibang ahi uh hi. Pawlpi aw na khuavaak tan in. Gam vai ah Christiante ih kipeng theihlohna pen khuavak tan ding nasep a neite ih hihna hang na hi zaw hi. Shine Jesus shine…Kipawlna a ut mahmah le a thupi sak mahmahte in zong a tuam khat in kipawl nuam lo veve uh hi. A tawpna ah na kipawlpihna a thukimpih na hih manin thukimpih Pawlpi a nei ciat vive na hi uh hi. Kipawlkhopna a thupi sakteng mite tawh a kipawl thei lo teng, daai a kaikai teng hi thei hi. Surprise!!! Mi kipawlna peuh mah a neu muh sak teng hi thei hi. Tua bang hi loin ei Christiante pen midangte tawh zong a kipawl thei le gual a huai ih hih ding Topa in deih hi. A tel sen dingin Topa’ Kha Siangtho in ong khoih ciat ta hen.

Evan. Suang Dal