Kimuak Vaidawn

Kimuak Vaidawn

Kimuak kidawn i cih ciangin ki-itna kingaihna lam a gen nuam ihi hi. Mipil, Ulian, mi minthangte leh i nu leh i pate, i siate i zahtak leh mi thupi a i ngaihsutte kilim muak kilim bawl phadiak se hi. Midangte a pahtawi siam a muaksiamte in maipha leh pahtawina ngah pah hi. Kimuaksiam kidawnsiam leng mi khempeuh in nuam kisa kilungdam hi. Tuhun khangthakte in Dam maw, zingpha, sunpha, nitakpha cihte i zat mah bangin khat leh khat kilawm tatna, itna kilahna thusiam kituhnate pen Pasian deihna ahi hi. Nidangin mi hopih loin huanu huapa migina hi kei, thupi kei, en kei un, hopih kei un kici mawk hi. Tuhun in mitam tawh kithei semsem, nuam semsem, mitam tawh nasem tangzai semsem hi zaw hi.

Sum zonna: Sum zonna munte van lei vanzuakna leh nek le dawn sai konggei ah hong kimuak in Sia aw, u aw, bang deih, bang ne ding, bang dawn ding na hiam? ci-in hong lim hopih in ih lungsim hong zogawp in a kisam lopi khat kilei lawhliang thei hi.

Vanleng Tual: Vanleng tual thupi mitamna munte ah Rev. Dr Zolengthe, Zokhual cih bangin laigolpi kigelh tawi kawmin kidawn zihziah uh hi. Lasiam penten lasa siamte kilungdam khopna munin kidawnna ahi hi.

Biakinn: Na pawlpi sungah mi namuaksiam leh mite’n nuam hong sa in pawlhoih tampi na ngah ding hi. Pulpit tung pan midangte muak den in. Biakinn mai pan lenglate muakin maitai in la, hopihin itna lak in, amau kisapna huh pah theih ding kiging sa in om in.

– Sanggam aw Pasian muak den in la, sam tawntung in, hong damsak thei in, hong hausak thei a, hong pilsak thei hi.
– Na nu leh pa muaksiam in lungkim sak lecin leitungah khansau in na mavang ding hi.
– Kumpite muaksiamin lungkim sak le cin, maipha nangah ding a huhna na ngah ding hi.
– Midangte muaksiam lecin lawm tampi na nei ding hi.
– Milim bia leh Thu um lote na muak siam leh na pawlpi hong khang ding hi.
Vaidawn siam muaksiam Zomite ih suah theih nadingin a kisam thu (8) te Late 25:9, Mate 5:3-7
a) Lungsim kiphatsakna hem khia in kiniam khiat ngiat ding
b) Suakta maitai ngiat ding
c) Kipuah sitset etlawm siangtho ngiat ding
d) Gamtat luhek mite om zia muhna nei ding
e) Lenglate vai khatpeuh manlang tak huh thei ding
f) Kampau ding ahoih a kilawm pen pau thei ding
g) Mi khatbek tawh hun bei sak lo ding
h) Mi deidan tuam neilo hopih, mithek siam in uham naupang a mau tawh kizopsiam ding hi.

A tung a thute i zat siam hunhun ciang in numei naupang bang a thu saukhual lohna leh migensiat supsupnate damdam in hong bei hiaihiai ding hi cih ka um hi. Topa’n Zosin lai-ah Zinbang hong kha hen!

H. Khual Za Nang