Kim Jong Nam suamlupna ah akihel numei nihte “Murder Case” tawh thu kibawl

Kim Jong Nam suamlupna ah akihel numei nihte “Murder Case” tawh thu kibawl

Malaysia KL Airport sung ki suamlupna ah akihel, asipa Kim Jong Nam ii maitang ah guza atatsak numei nihte pen tuni (Mar 01) ni in thukhenzum ah thusitna kineita hi. Hih numei nihte pen Sepang Court ah “Section 302 of Penal Code” tawh kizui in thu kibawl a, mithat Murder Case cihtawh thu kikhentat ta cih AP News pan kiza hi.

Kim Jong Nam pen North Korea gammi hi a, tulaitak North Korea Leader Kim Jong Un ii asanggam (Half brother nukibanglo pakibang) ahihi. Hihpa pen Kuala Lumpur International Airport 2 (KLIA2) sungah February 13 ni in aki suamlum hi a, “VX nerve agent” akici alauhuai mahmah Chemical Weapon namkhat amai ah kitatsak ahih manin, tua ii agu tawh Minute 20 sungin sipah hi.

Hih kithahna vai ah Kim Jong Nam athatsakpen asanggampa ii vaihawm hiding hi ci’n Media tuamtuam in genkhia hi.

KL Airport sungah guza atatsak numei nihte pen tuni in Serpang Court ah kipaipih a, Security te’n limcin mahmah uhhi. Special Forces kici thautawi amaituam Police te’n anung amai ah umcip in kembitden uhhi.

Mithat in aki ummawh Suspects tenih lakah Siti Aishah pen Indonesia gammi hi a, kum 25 phakhin hi. Tazong khat neikhin kici hi. Akhatzaw Doan Thi Huong pen Vietnam gammi hi a, kum 28 phakhin hi.

Thukhenzum panin mithat “Murder” cihtawh thukhenna aki simkhiat khitciang in, Vietnam gammi Doan Thi Huong in Mangpau tawh “I understand but I am not guilty” ci’n amawhna dan kipiak kathei a, ahih zongin kamawhkei hi ci’n genkhia cihi. Tuakhit ciangin mipi omnalam themveicik a etphei khitciangin alu kunsuk in, apualam ah ki paikhiatpih hi.

Tuakhit ciangin Indonesia gammi Siti Aisyah ii dan tuahding kisimkhia leuleu a, mithat Murder cihmah tawh thu kikhen hi.

Anih un Murder Case tawh thu akibawl hi a, hih Sepang Court panin Higher Court ah ki puaksawnding uhhi. April 13 ni ciangin anih un khatvei Higher Court ah thusitna kinei kikding uh a, amawhna kiciantak in aki muhkhiatleh anih un sihdan Death Sentence kipiading cihi.

Hih numei tenih in mithat kahi kei uh, kamawh kei uh ci’n genkhia uhhi. Banghanghiam cihleh hih numei tenih in kopen Prank TV Show akimawl kakisa uh a, Kim Jong Nam ii amai ah guza, sihtheihnading atat kahihlam uh kaki theikei uhhi ci’n genkhia uhhi. Ciamnuihbawl Prant TV Show kimawl in kaki tuak uh ci a, hihbang in amai ah tatsakman dingin RM400 hongkipia ci’n Siti Aisyah in genkhia hi.

Ahi zongin Airport CCTV panin aki etkik ciangin hih numei nihte in Kim Jong Nam maitang ah guza atatsakkhit uhciangin dailengbuk Restroom ah pai uh a, akhut uh sawp kici ahih manin, guza ahihlam theimahding uhhi kici hi.

Hih numei nihte Court ah apailam in khutkolbek bulhsakziau in kipaipih himahleh acianlam ciangin a awm ah thautawng dalna Bullet-proof Vest te ki thuahsak in, ki ciahkhitpih hi. Banghanghiam cihleh hih mithahna vai ah adang akihelding in aki ummawh pawlkhat kimanzo nailo ahih manin, tuate’n hih numei nihte kamhukna in athahlup khakding Malaysia Authorities te patau uh cihi. Anih un Kajang Prison ah ki puakding cih kiza hi. Higher Court ah thusitkik niding pen April 13 ni hi a, tuani ngakleuleu ni. ZD Sawltak #zomidaily