Kilawpphawnna le kilauphawnna pan Dikna thu ah Jusfication azom

Kilawpphawnna le kilauphawnna pan Dikna thu ah Jusfication azom

Diktanna ih cih pen kilawpphawnna le kilauphawnna tawh a piang hi nai lo hi. Kilawpphawnna ih cih ciangin, Kipawlkhopna thu, khantoh nading thu le cidam nading thu genna cihte pawl pen kilawpphawnna (health and wealth) ahi hi. Lai Siangtho bulphuh in mite lawp sak, thangah sak thuhilh siam tam mahmah hi. A langkhat leuleu ah kilauphawnna ih cih ciangin, gal le sa minam vai le leitung thupiang thu, kim le pam khuahun, huihpi guahpi zinlinna thu, natna satna thu le zawnna ngauna thu cihte pen kilauphawnna ahi hi.

Lai Siangtho bulphuh in mite lau sak, tua launa hangin hanciamna, kiginna (social upliftment and reconciliation) neih ding a hanthawn siam thuhilh sya tam mahmah hi. Hih thu nihte pen mite lungsim lak nadingin a kisam mahmah hi napi in, ahi zongin Lai Siangtho thu laigil ahi, tua Pasian’ ong diksakna thu le ih diktanna thu kihel nai lo hi. Tua hi a, hih Diksakna thu le diktanna thu a kihilh ma siah kuamah in sunglam daihna taktak ngah thei lo ding uh hi. Tatkhiatna (Redemption) hanga diksakna le diktanna (Justification) thu lo tawh tetti panna pen kikhelna nam khat adinga tetti hi pan beka, pianthakna maan tetti hi nai lo hi.

Tuni-in, piangthak a kisa pawlkhatte ii tetti panna te ih lungngaih ciangin kikhelna (change) thu bek gen thei uh a, Jesuh ong tatkhiatna hanga diktanna thu tetti a pang thei ngiat nai lo piangthak minpua mi tampi tak om hi. Tua pen bangdang hang hi loin thuhilhsya tampitakte’ thuhilhna ah Lungdamna thulaigil ahi tua Upna hanga Diktanna (Justification by Faith) thu kihilh cian thei nai lo ahih hang ahi hi. Ih thuhilhna ah a kisam penpen tua Lungdamna thulaigil Hehpihna hanga Upna tawh Diktanna (Justification by grace through faith) thu sangin a dangdang ahi tua kilawpphawnna le kilauphawnna thu bekbek a kihilh man ahi hi.

Kilawpphawnna le kilauphawnna ziate tawh kha khanlawhna ci-in bangzahta in a kideihkaih hangin hih Singlamteh le a dikna thu ah a kiciat kei leh a hawmpi ahi hi. Bangzahta in kha thu a bulphuh hang un Jesuh’ sungah hong kidiksakna thu tetti a nei lo, Jesuh’ ong tatkhiatna hanga diktanna thu upna tawh tetti a pangthei nai lo mi in a hawmpi, a hupi bek ahi hi.

Diktanna a pian theih nadingin a diklo ih hih lam ahong phawk sak Thu kisam hi. Tua Thu, Pasian ahi hi (John 1: 1). Lai Siangtho sungah Jesuh Khrih in kilem nading hi lo kikhen nading namsau ka hi ci hi (Matt. 10: 34). Thumaan le zuau kilem lo hi. Kipawl lo hi.

Thuhilhkhialsyate le thuhilhsya citakte kipawlkhawn thei lo ding hi. Khuavak le khuamial om khawm thei lo hi. Khuamial sungah khuavak ong taan ciangin kikhenna piang hi. Mawhna khuamial khuavak a kitaan kul hi. Kilauphawn ding le kilawp phawn ding sangin mawh nei mite ih hih lam za ah za ih kitel theih nadingin Lai Siangtho tawh ih kitheihsak (informing the seriousness of sin to your hearers) ding kisam zaw hi. Kimawhsakna thu hilh ding hi lo a, mawhna thu hilh ding ahi hi. Mite in mimawh ahih lam a kitel uh ciang bekin diksakna le diktanna thu hong lunggulh pan ding uh hi.

Mawhna thu a kihilhna hangin a mawhna a kisik mi le a kisik nuam lo mite’ kikal ah kilamdanna piang ding hi. Kilamdanna pen kideidanna hi lo hi (Distinction is not discrimination). Pharaoh in Egypt mite le Israel mite a deidan vial laitakin Pasian in Israel mite le Egypt mite kikal ah kilamdanna piang sak hi (Paikhiatna 11: 7). Tua kilamdanna khuavak in kikhenna piang sak hi. Tua kikhenna in nusiat nei a, zuat nei hi. Thu-ummite in khatvei kisikna hanga a ngah uh diktanna tawh mawhna do-in tua mawhna nusia-in a nelhsiahna uh thu pen a nisim kisikkik zelzelna uh le thunget tawntungna tawh lak uh hi. A kisik nuntakna le upna tawh kidim thungetna in Khrih le a Singlamteh tatkhiatna thu hong zuan tawntung sak ding ahi hi.

Tu ni in mite tawh ih kilamdanna bang ahi hiam? Pawlpi a liat mahmah hangin biakna dangte tungah kilamdanna a nei zo lo Pawlpi in ong gum zo lo ding hi. Upna hangin kilamdanna nei zo tuan ngei lopi, uknopna hangin pawltuam satna in zong ong gum zo lo ding hi. Leitung biakna te tawh ih kilamdanna pen hih singlamteh tatkhiatna thu ahi hi. RC le Kipuahphatna Reformation pen 1545 Trent khawmpi (Council of Trent) pek a kipan a kilamdanna bulpi pen hih tatkhiatna hanga diktanna thu (Justification by faith) pen a bulpi khat ahi hi – [Council of Trent: Sess. 6. Ch. 8 Can. 24].

Evan. Suang Dal