Kilawmzaw leh kilawm ~ Dr. Ngul Khan Pau

Kilawmzaw leh kilawm ~ Dr. Ngul Khan Pau

A kilawmzaw ding ngaihsutna tawh hih a nuai a thute kong gelh hi. Mimal kuamah tawh kisai hi loin i minam bup khualna, khangtoh leh picin nading deihsakna hi-zaw hi.

1. Pasian thugenna vai limci i neih ciangin, a min dingin “Cialpi,” “Kha Annkuang luina,” “Gupna Thusinna,” “Revival Kikhopna” cih ahi zongin kizang thei leh cih ngaihsutna hih tawh a thumveina kong gelh hi ta ding hi. Tuhun tawh a kituak nawn lo, Khamtung khua khat pawlpi khawngin a zat leh phamawh lo napi-in, facebook khawngah a kammal “CRUSADE” cih i koih lailai pen khawl hunlua mahmah ta hi.

Middle East khawng a i Khristianpihte’ ngawngtan a thuakna uh a hang pen i lawmte’n nidangin Khristiante’n “hih” min tawh amau tul tampi kithat a hihlam mangngilh lo uh hi. Zomi facebook ciang zang theite buangin hih kammal nong zat nawn loh ding uh ngaihsutna kong hansuah hi. Pasian thugen leitung mun tuamtuam a zin thei ciangciangte’n hih thu i lim ngaihsut ding kisam kasa hi. Mite’n nang ngaihsut bangin hih thu na sang nawn lo ahih lam phawkhuai hi.

2. Gamsa, Vok, Bawng leh Sial: Vai thupi i neih ciangin bawng, vok leh sial cih bang tawh lungdamna annkuan i vaihawm thei uh hi. Tuate i zat ding mah zong hi kha ding hi. Ahi zongin bawnggil, vokgil, sialgil bawl-lai, a gilzang khawng i zut lai, sa-si thun lai cih khawng facebook ah i suah pen zat nawn loh ding hi.

Vok gawh lai, sial kaplup lai cih bang i koih pen ei lam panin thupi mahmah in i ngaihsut ahih hangin ei vai hong theihpih lote’n na thupi sim het lo uh hi. Tuhun ciangin gamsa na mat leh “pasal pha” cih kammal kizang nawn lo a, “Wildlife Preservation” kumpite thukhun nial in hong kingaihsun ahih lam phawkhuai hi.

3. Nau neih vai: Facebook ah nau neithakte’n naungek suaktung nong koih thei uh hi. Hong kilungdampih mahmah hangin naungek photo (maan) pen koihtuak leh koihtuak loh om hi. Naunawi piak lai bang nong koih nawn loh ding uh deihhuai hi.

Nau nei khin phet a nu zong gimlua, tawllua mel tawh naungek lim leh mel hong kikoih thei hi. A nu kipuah siang khin zo, maitai khin zo, naungek mahmah zong kisilsiang khin zo cih bang hi leh etlawm hi. Naunawi piak lai pen ei lam panin bangmah a i thupi sim loh hangin namdangte’n zahmawh in na ngaihsun uh hi.

4. Online-live a kikhah: Tuhun ciangin smart phone, tablet i tawi ciat uh hi. Program khat peuhpeuh “live” in kikhah hong tam mahmah hi. “Live” a khah ding leh khah loh ding zong i khentel kisam mahmah kasa hi. I biakinn ah “TV-Media recording” i neih leh tuate a hoihzaw ding ahih ciangin amau kiang panin leithei in kepcing dingin nei leng hoihzaw ding hi.

“Live” hong kikhah tampite i biakinn sung a lamna, pukna, dianna khawng ahih ciangin tua mun a omte adingin thupha sanna khat ahih hangin tua bang huihnunna munah om lote’ (upna kibatpih lohte) adingin lamdangpi na suak thei hi. Online-live a khah tuak leh khah tuak lo khentel kisam mahmah hi. J.M. Ngul Khan Pau