Kikhalna (Discipline) ~ GS Pau

Kikhalna (Discipline) ~ GS Pau

Mikangte in Discipline a cih uh pen kawlte in sii-kaan ci uh a, Tongdotbu sungah ei’pau in kikhalna na ci ahih manin tua kammal mah i zang ding hi.

KHIRSTIAN-TE IN KIKHALNA NEIH KUL

Topa Jesu ngiat pen kikhalna(Discipline) a nei pha mahmah khat a hi hi. A nungzuite in zong amah dan mahin kikhalna(Discipline) a neihna dingun kum (3) sung vilvel na pantah hi. Sawltak paul in zong Laisiangtho a gelhna mun tampite ah Khristiante in kikhalna(Discipline) a neih na ding na limgen mahmah hi. Khristian pawlkhatte in eite pen thukham khut nuai ah om nawn lo, suaktate tak tak hi hang, ci-in kikhalna(Discipline) neih ding khawng kulsa lo thei uh hi.

Pawlkhat bang lawpin, khami phial napi, kikhalna(Discipline) cih dan nei ngiat lo uh a, a utut in gamta lel thei uh hi. Khristiante pen thukham khut nuai-ah ki-om nawnlo mah hi. Ahi zongin Khris’ ukna nuai leh Khristian ngeina tawh kipawl kikhalna(Discipline) nuai ah a om ihih lam i kiphawk ding kisam hi. Rev. Suak Za Go (Treasurer, AG General Council, Yangon) in, ” Piangthakte pen to peng kihi lo a, to kilaih hi. I to pen satan pan Jesuh ah kilaih hi bek hi,” ci-in gen hi.

2.​​ PASIAN’ NASEMTE IN KIKHALNA NEIH KUL

Midangte sangin Pasian’nasem te deuhdeuh in kikhalna(Discipline) neih ding kisam deuhdeuh lai hi. Banghang hiam cih leh khatvei minsia kha le-uh, a khantawn mah uh khom pah lianlian uh hi. Pasian in bel amawhna a kisikkik takpi nak uh leh maisak pah lel a, meima bang dan hi leh damsak pha mahmah lel hi. Ahi zongin a pawn na om veve a, tua pen a sih dongin manglo hi. Mihingte in a pawn mah na en veve uh ahih manin koihna khat na nei gige uh hi. A mailam ah bangzah tak in ki puahpha-in, thu hoih thupha vive hong vaihawm phial uh zongin kuamah in um zo nawn lo-in, sang zo nawn lo uh hi.

Evangelist minthang Billy Graham(1918-2018) bang, leitung buppi in a zahtak khat leh US president khempeuh phial in zong thudotpi-in nei uh hi. Hih dinmun a tun theih na zong a thugen siamna khat bek bang na hi peuhmah lo a, kikhalna(Discipline) a neih man mah ahi hi. tu-in Pasian’ na a sep zawh kum (60) val bang a phakna sungah numei vai-in mindaina, sum leh paai vaiah paubaan’na leh kiphatsakna cihte kimu khia ngei nailo, ci-in ki gen hi. Amah zahin thugen siam leh Pasian’ mizat zong a hun hun in om zelzel tei napi, amautein Billy Graham zahin kikhalna(Discipline) neilo uh ahih manin Pasian in Billy Graham zah in sawtpi zang lo hi.

3.​​ KIKHALNA IN MIHING’ MANPHATNA

Kikhalna(Discipline) in vaang hong neisak hi. I man(value) zong khangsak hi. Kawlte in ” kikhalna in mihing’n manphat na hi,” ci-in na gen uh hi. Gam makaite leh uliante sungpan kikhalna a neite mah in vaang nei-in, kizahtak hi. ki mawlsiamte sung pan zong kikhalna a neite bek mah in ki vaakna-in nei zo uh hi.​​ Tua lote in kisiatna peuh in nei thei uh hi. Khuakhoih, laipilte sungpanin zong kikhalna a neite bek mah in khuasuah lawh uh hi. Lasak siam leh tumgingsiamte’ sungpanin kikhalna a neite bek mah in nuntak lawh bek uh hi.

Nungak pawlkhatte a meel uh hoih in, summai mawhlo napi, kikhalna cih dan neise lo uh a, khuaval thei uh a hih man in tua in a vaang uh kiamsak a, a man(value) uh zong kiamsak thei hi. Kineihsiam pasal(actor) te leh kineihsiam numei(actress) te’ sung bangah kikhalna a tawm luat manin nupa kikhenna leh minsiatna cihte na om den hi. Lasasiamte leh tumgingsiamte sungah zong kikhalna a tawmluat manin khamtheih guihtheih zangin a khan’sih tampi om hi.

4.​​ KIKHALNA IN KHAN’TOHNA PIANGSAK

Kawlte in, ” Kikhalna a om ciang bek in kikhangto pan hi,” ci-in gen uh hi. Pumpi kikhalna nei a, amah leh amah a ki-ukzo mite migina leh mithupi suakbaih deuh uh hi. Bangzah takpin pil in, siamin, i hat phialta zongin kikhalna i neih kei leh cikmah hun in migina leh mithupi kisuak zo tuan ngei lo ding hi. Japan te in kikhal na neipha mahmah uh hi. Thumaan bek deih uh a, zuautatna leh guktaakna cihte deih kilkel lo uh hi. Meileeng tung leh Motor tung ah van kinusia khat peuh a om teh amau’ aa ahih kei nak leh la tuan lo uh hi. Tua bang mahin Shinto biakna vive a tamna, Khristian 1% bekbek a om kiukiauna Japan gam in thupha sangin khangto hi.

Condolezza Rice (1954-) pen a neu tung a kipan kikhalna a nei khat hi. Amah in laisim hun, piano tum hun, thunget hun nei hi. A lawmte in picnic pai dingin a zot uh hangin zuilo a, inn ah laisim in, thungen hi. Kum 15 a phak in tan 10 ong, kum 19 a phak in B.sc(Political Science), kum 21 aphak in M. SC, Kum 26 a phak in Ph.D ngah hi.Kum 28 aphak in Stanford University ah Professor, kum 30 aphak in Siapinu Seem hi. America taangthu ah Stanford University ah numei siapi seem masapen leh mivomte sungpan University ah numei siapi a seem masa pen in kiciamteh hi. 2001-2004 Sung US National Security Advisor seem a, 2005-2008 sung state secretary leh foreign Minister seem hi. Leitung bupah a kizahtaak numei pil khat ahi hi.

Bawlung kumpipa Brazil mi Pele (1940-) in siam mahmah leh kikhal na neih thuah hi.Pele in zu-a kipan khamtheih a kici pongpong zanglo hi. Bawlung tualpi sung khawngah hehphangphang ngei se lo hi. kum tampi sung bawlung a suihna sungah yellow card nangawn ngah ngeilo, ci-in kigen hi. kum 4 teh khatvei aki sui World Cup bawlung kidemna ah (4) Vei suikha a , (3) Vei (1958,1962,1970) Brazil te champion ngahpih hi. A lang kungmaite in na suliam gawp uh hi mah ta leh , ama’n na thukkik ngeise lo lel hi. 1961-71 Sung UNO secretary General a seem ngei kawlgam mi U That ( 1909-1974) bang pantanaw khuami hi a, a neu tung pan mahin kikhalna a neih manin hih dinmun ciang a tung thei a hi hi.

5.​​ EIMA’ PUMPI KI UKZAWHNA

Khuapi khat uk sangin eima pumpi ki ukzawhna(Self control) hoih zaw hi ( Pau 16:32). Mi pawlkhat gam khat ukzo napi, a mau pumpi uk zolo uh hi. Pawlkhat in pawlpi khat ukzo na pi, a mau’ pumpi uk zo lo uh hi. William Shakespeare (1564-1616) in, ” Ka sumbawm hong kiguksak leh an neek khat ka ngolh lawh ding a, ka min khat vei sia leh ka khantawn an ka ngolh lawh ding hi,” ci-in gen hi. Mihingte pen khatvei minsia kha’leng, tua pen khan’tawn kikhom thei hi. Kuamah in hong thusim nawnlo uh hi.

A pha (100) I sep pen kimangngilh pah lel hi. Ahi zongin a sia khat i sep khak sun sun pen na kimangngilh lo mawk hi. Tua ahih manin kidop huai pha mahmah hi. Greek galkapmangpa Alexander The Great (356-323 BC) in leitung bup phial ukzo na pi, kum (33) a phak in zu tawh si hi. “Ama’ pumpi ki-uk zolo a hih manin sih lawh hi. Zomite’ nuntakzia i ki-etphat kik ciangin i kihtaak pian khat in zawhthawh thu tawh hong pum uk gawp ding ahih kei buang leh eima’ pumpi’ a ki-uk zolo phadeuh te i hi hi.

Zomi sungah kimawlsiam pawlkhat ki-om sam napi, kimawlsiam masasa zu tawh kidiah pahpah ihih manin kimawlna tawh a kivaak kitawm mahmah lai hi. Zomi sugnah laipil pawlkhat zong ki-om sam napi, eima’ pumpi’ ki-ukzawhloh manin maatutzawhna taktak kineilo-in kilaklawh om gawp thei hi. Pasian’ mizat zong a hunhun in ki-om tei napi, eima’ pumpi ki-uk zawhloh manin sawtvei a kizang ki-om meello mawk hi. Sumhau zong ki-om kiaukiau zel tei napi, eima’ pumpi’ ki-uk zawhloh manin sawtvei kikhom zolo hi. Zomi ulian tampite zu in hong thahsak hi.

THUKHUPNA

I tate leh i innkuan hoih tak i makaih zawh nading in eima’ pumpi i ki-ukzawh masak phot kul hi. Tuamah bangin pawlpikhat i makaih zawh nawh nading, khua khat i uk zawh na ding, leh gam khat i makaih zawh nading in zong eima’ pumpi i ki-uk zawh masak phot mah kul hi. GS Pau​​