Kikaakna te gawmtuah ni ~ Dr. Tual Khai

Kikaakna te gawmtuah ni ~ Dr. Tual Khai

UNITY IN DIVERSITY :: Ni khat ni-in khua khat ah sumbawl mi nuamsa khat om a, azi le atu atate, amo amakte le asung apu abeh aphungte tawh nuamsa in a om uh hi. Amah in mi kheempeuh lungnopnadingin bang bawl ding ka hiam ci-in ngaihsun hi. Leitang azai mahmah acre kua lei a, lokho mipil kua uksak in, no ii hoih nasak pen ciat uh paak kung cing un, ci-in sawl hi. Palpi paak, heisa paak, phuitong paak, Unok paak, lingpaak, nipi paak cih bangin paak nam kua cinguh hi.

Tua paak huan kiimah nisuahna, nitumna le sak le khang pan pai theihnading lampi hoih mahmah le khawlmun nuam mahmah li zong bawl sak lai hi. Mun kheempeuh pan hong pai khualzin gamvakte in tua paakhuan kiim atun’ ciangin khawlmunte ah sunan nek kawm in tawlnga a, lungnuam thei mahmah uhhi. Mi pawl khatte in paakte deih a, lei dingin a nget ciangin a khonkhong in pia uhhi.

Ni khat ni ciangin paak huan uk mipil kuate amuhna uh le angaihsutnate uh hong KIKAA a, minuamsa pa kiangah hong pai hi. Topa aw, mite in kei suan paakte hoihsa sa pen a, deih pen ung ci-hi, hih huan sung ah kei deih paakte bek ciing ni, ci-in hong kisel ngeingai uh hi. Mi nuamsa pa in, “MIPILTE AW, HAI KEI UN’, A SAWT CIANGIN KICIMTAK DING A, TUA PAAK A DEIH MITE BEK I GAM AH HONG PAI INSUM ZUAK SUM LEI HONG BAWL DING HI. Tham lo in a sawt ciangin mite in cimtak ding hi. Paakte a paak hun kibanglo a, ama paakloh hun ciangin ih huan daiduap ding hi. Paak namkim a om ciangin Nisim khasim in paak hoih nono van a aksite bangin kimu thei a, mite in lungnopna ngah hi” aci hi.

Mailam ah Gam makai ding ahi Khangnote tuni mahmah in ih gam, ih lei le ih mite aa ding mapan theihnadingin kigin kholh kul hi. Tu ni-in kikhenna le kigawmna koizaw na zuinuam zaw hiam, ci-in na mai pan hong to hi (challenges in front of you).

Khamtung mite kipat cilna tawh kisia in tangthu kante (Historians) in Israel minam Manasseh suan, Sen gam Chin Dynasty hun a Sen kumpi suante cih bangin atuamtuam in gen uhhi. Bangbang hi taleh, Ciimnuai pan piang hang cih kuaman nial theilo hi. Ciimnuai pan nu khat ii tate hi napi hang tu-in Kawl gam uk uliante in nam (53) dongin hong khen lai hi. Man mah hi. Mual khat guam khat kihal leng sanggam melmak cih bangin, ih pau, ih ham, ih zia ih tong leh ih gamtat kibang nawnlo pah a, tanglai in gal le sa nagawn in kiman kithat ki aai lai hi hang.

Hih KIKAAKNA pen ei pat phot hilo in Christiante Lai Siangtho sungah Adam le Eva tapa nihte Cain and Abel zong na kikaa hi (Genesis 4:5, 8). Noah tate Shem, Ham, Japheth te le a suan a khakte zong Pasian phawknawn lo a Babel tau sang alamna pan pau le ham, ngaihsut luhek kibanglo in KIKAAKNA lian bel ahi leitung minam tuamtuamte pianna kipatna, na ci hi (Genesis 11:1,6, 7-9). Pu Abraham tapate nih Ish’mael suan Arabte le Isaac suan Israelte zong tuni dong mahin KIKAA lai hi (Genesis 16:12; Zonu Tongluan Hawm 28 na, Jan, Feb, Mar – 2016 laimai 4)

Pu Isaac ta apeeng unau E’sau le Jacob suan le khakte zong tuni dong mahin KIKAA in kilangpan den uh hi (Genesis 25:23). Hih bang a kibatlohna, KIKAAKNATE in leitung mihingte khantohna apiak loh banah kitapkhapna, kikhenthangna, gal le sa kineihna le tha zawngkhalna le gual lelhna piangsak hi.

KIKAAKNA in gam le lei khantohnading, mihingte lungnuam tak a nuntak theihna dingte, gentehna in a nuam mahmah Federal Democracy gam nuam ih tun’ theihna dingte susia in khaktan hi.

Tu ni Leitungbup ah Policeman a sem American gam en ni. Italy minam Chistopher Columbus in 1942 kum October kha 12, Friday ni zingsang khuavak ciangin America gam Indian minamte in Guanahani a cih tuikulh a tun’ ciil in tua tak ah a pumtangguak a om Indian minamte bek mu hi. (Chistopher Columbus Discovers America, 1492) Tua khit ciangin a diakdiak in Europe gam, Scandinavia le Enland gamte pan in a kibangvetlo minamkim America gam ah va lalin teng uh hi. Africa gam pan mivom namte manin sal in khawi uh hi.

Ei pu le pate mah bangin a kibatlohna uh le a KIKAAKNATE uh bulphuh in kido kiman kithat thapai uh hi. A tawpna ah kongkawciik mahmah ahi ‘Kei le kei bek, Kei beh le kei phung bek, Kei tenna kei giakna mun bek THUPI HI” cih muhna le ngaihsutnate nusia in, KIKAAKNA BULPI ahi, minam, mel le sa le aituam lunggulhna kheempeuh pum khat bang a a GAWMTUAH kikna pan tuni in leitungah a thahaat le akhauh penpen, a hau penpen bek tham loin leitung bup ah POLICEMAN hong sem hi.

ATOM Bomb thautang pianna tawm en ni. Atom pen Scientist-te pilna sungah a neupenpen na khat (An Atom is the smallest constituent unit of ordinary matter that has the properties of a chemical element, composing Electrons and compact neucleus of Protons and Neotrons) na hihi.

Protons (+) leh Electrons (-) te khat le khat khantawn a akilanggat dente hi a, Neutrons ahih le LAIHAWL (processing no net charge) in om hi. Atom ii a laizang santak a aom Protons le Neutrons te kiimvel in Electrons laam thapai hi. (protons and neutrons make up the neucleus of the atom, while electrons orbit it in a “cloud”). Hih a kibang hetlo, akilanggat giat, nate lak ah aneu penpen thum khangtawn kikhel ngeilo, tawlnga ngeilo kikhen ngeilo kipum khat a ah kithuah denna pan leitungah a khauh penpen, a hat penpen Atomic bomb thautang kibawl khia hi. July 16, 1945 ni-in kisinna tawh a kilawn masa Atomic bomb in (1st test of atomic bomb released energy app. 20000 tons of TNT) 20000 tons tawh a kikim thakhauh khahkhia hi.

Leitung galpi nihna a vengsak, August 6, 1945 ni Japan gam Hiroshima khuapi a akikhia Atomic bomb in mihing nuntaakna 80000 le August 9, 1945 ni Nagasaki khua a kikhia atomic bomb in 40000 thakhat thu in bei sak hi.

Hih a khauh a hat thautangte in a kibang hetlo A KIKAA nate kipum khatna pan a piang ahihi.

Na kheempeuh ah kibatna khat zong neilo napi gam le mi khantoh nopna le lungnopna DEIHNA KIBANG gam neuneute (SEA countries) in leitungah mi a phak zawhna dingin a KIKAAKNATE te GAWMTUAH in ki PUMKHATNA tawh tha saan in na semkhawm uh hi. Leitung ah a khauh pen le a thahat pen khat ahi USSR gamte ah, kei le kei cih angsung a theihman in kikhen kham uh a, gam (4) le (5) a kisuah ciangin tha zawngkhal ta uh hi.

Christiante Lai Siangtho sung ah “Na buk mun khan’ in la, na ten’na puanbukte kizalsak in. Cil bawl kei in. Na khaute sausak in la, na khetphimte khenkip in’ (Isiah 54:2) na ci hi.

Ih mun, ih gam, ih minam, ih mel ih sa, ih pau ih haam le ih aw suah, ih luheek le ih tatzia, ih et dan le ih muh dan, ih duhdan le ih neek ih dawn dan, ih deih dan le ih lunggulh dan kheempeuhte a kilamdanna le a kibatlohna ih ki elphuutna le ih ki langngat na le kigal neihnate in eite hong KIKAAK khia zeeizaai sak ahi hi. Tua a KIKAAK khia zeei zaai kheempeuhte ii a dawnkui mongah ki GAWMTUAH kikna pan apiangkhia a khauh mahmah galhiam tawh ahoihzaw gam le mun, anuam zaw mite nuntaakna ih lamh zawh nadingin kipum khat a,ma pan’khop ding kul hi. (Let us fight together a better world with the sharpest and strongest weapon manufactured by converging all the diverging differences).

Nupa kithutuak leng khua khat zo a, khuate kithutuak leng gam khat zo, gamte kithutuak leng Lengtung makai zo ding cih thute sun ihmut kal mang ahih loh ding kisam hi. Tuni gam makaite in ih gam akhantoh mengmeng theih nadingin khangnote zong a mapan’ theihnadingin hong zawn a hong hanthawn hi. A diakdiak in zingciang thaiciang gam makaipi a suak theiding Siamsin khangnote in ngaihsun khiallo a,lampi man zuan in kigin kholhna tawh kalsuan ding kisam hi. Patauhna, linna lauhna aomlohna mun, lungnuam tak a om theihna mun kipumkhat in lamh khawm ni. Dr. Tual Khai M.B.; B.S.; Retrd. TMO