Kigawm hoihmaw, kikhen sia? ~ Bob Tuangpi

Kigawm hoihmaw, kikhen sia? ~ Bob Tuangpi

Kigawm Hoih Maw, Kikhen Sia? ( Zomi leh . . .???) Minam leh gamvai akisep tak ciangin gambup thukhunpi nuai ah thudiktak tawh thuneihna (Legitimate power) ngah nang gamvai party (Political party) khat siksan kisem tek hi. Tua bang minam leh gamvai lapsang sawm vive gamvai party tuamtuamte in angimna uh atangtun nading gamvai adeihna uh (Political will) leh gamvai mungtup (Political goal) amualsuah nang uh thuguilet (Policy) tuamtuam neitek uh hi.

Minam vai leh gamvai sepna ah amimal pen kilemlohna hangin sepkhoptheih loh cih bang ngimna akibat naak leh omlo zaw napi’n dinmun leh thu pomzia kilehbulh/kikeelki leh lamkhat kitawnkhawm thei hetlo hi.

Gentehna in Yangon khuapi pan (Flight destination New Delhi) vanleng tawh azin ding khualzinpa/nu leh Yangon khuapi mah pan Flight destination London) khuapi vanleng mah tawh manawhin khualzin ding pa/nu alampi kibanglo-in lampi khat bek zuikhawm ni cih gum mawk om theilo hi.

Kikhen sangin kigawm ahoih zawkna mun a om mah bangin, kigawm/kipawlkhop sangin kikhen/ki-akgualkhenna zongh ahoih zawk hun om veve hi. Minam kibanglo, ngeina kibanglo minam tuamtuamte kigawmkhop ding cih thadah innkuan/nupa khat nangawn kilemtakin kigawmkhop det ding baih hetlo hi.

Ganan/Mathematics gawmna (+?) cih igen ciangin nuntakna aneilote gawmkhawm lehang ahoihna tampi om hi. Gentehna in sum peekkhat leh peekkhat gawm leeng (1+1=2) suakin khat bek sa’ng mannei zaw hi. Ahih hangin akigawm khempeuh in phattuamna piakim tuanlo hi. Tui leh namgimtui gawm lecin anih tuak bang mah kimanna omlo hi.

Tui bek hileh kidawn thei-in namgim bek hileh setvante agamtat theih nang sem ban ah meivakna bung pan mei hong tangsak thei hi. Tui leh sathau gawm ekh lecin zong akigawmtheih gawp tei hangh azanghkha leh nekhate’ ading limna tatak (quality) neizolo hi. Ahizongin anih in kigawm hileh alangnih tuakin kimanna khat zong pialo hi.

Tua ahih manin, minam leh gamvai nasepna/minam leh gam ading aangsung khualna leh minam kepbitna (National interest and national security) tup leh ngimna tangtun nading lampi sialna ah kigawmna in thahatna hong piangsak maw? Kikhenna in mazanna, muibutna hong pia maw/ aih keh hong tuantualsak maw cih deihtak ngaihsunin khuadak hun pha mahmah ta hi. Minam leh gamvai ah zongh kigawm ding ihih leh tui leh namgim kigawm ih bang kha mawk diam?

Kuakua in bangbang genin thukawng a utut heithei, peithei phial ta leh itunnopna mun iminam aangvanna leh minam bitna (National Interest and National Security/ Political Destination) akibat kei leh lampi khat ah kitonkhawm thei hetlo ding hi. Agelh : Bob Tuangpi