Kial nawn lo ding na hihna lim ~ Evan. Suangh Dal

Kial nawn lo ding na hihna lim ~ Evan. Suangh Dal

Tulai taka Pasian thu, Lungdamna thu laigil khawng a kigelhgelhte a kipostpost te, a kigengente, Lungdamna laibu khawng manh ol nono-a hong kizuakte, khat vei vei a free khawnga hong kihawm nasep cih namte a kithusimh pente ahih het loh hangin sawt lo khat ciangin an duh tui duhna kial hi kei Pasian thu zaknop mahmahna kialpi a kici pen hong tunteh, na zon hang na muh nawn loh ding kialpi laigilte ahi aw. (Amos 8:11).

Khual gamla zin ding tui dawn khol in. Denteh na dangtak ding hi kici gegu in dawn nuam mahmah lo. Mang nuam mahmah lo. Sakol tui duh lo kipia zo lo a cih bang liang. A zin nading khua a tun ma-in a dang tak lua ahih manin den-a tui kam khat beek ka dawn heuh loh a cih bang keek lian-in tulaitak-a nangma’ lungtang ading beka na piak ‘amen’ te ‘like’ te zahin ka kha ading hua hun lai-in na dawn kha, na like kha, na amen thei kha hi heuh leng na cih hun … Banglo teng ‘like like’ mah hi veng na cih hun – khawng zong hong tung thei lua ding ahi aw.

Tua ahih manin, na Pasian’ thugen pa uh na Pasian’ na sempa uh na panpih zawh na huh zawh kei uh leh zong lang pan lawnglawng simmawh bawl lung lungna tawh lungsim gim neih kha vial se kei un. Neu muh, thusim loin, nuih ciam lel san kha het kei unla, ama’ langah Farisai te le Suddusi te kithu tuak ngei ngap lo, Paul langpan nading le khaktan nading ahih leh a kithutuak luailuai bangun gam ta kei un. Pasian’ mite langkhat ah tetti langgenna tawh noteng holim nading kimai muh nading, kigualnop nadingin na thumaan gen pa uh, na thu maan gen nu uh mawlpih kei un aw… Kong sanggam tanau hilh hi.

Tua mah bangin Pasian’ thu gen, Lungdamna thu hilh, Pawlpi kem Sya na hih leh Lungdamnathu taktak na hilh keileh, na hilh theih keileh midangte sangin a khauh zawin thu hong kikhen ding hi ( James 3:1). Banghang hiam cih leh Lungdamnathu taktak hilh lohna leh hilh theih taktak khol lohna in ‘amen’ le ‘like’ baihno takin nak ngah mahmah thei zawsop hi. Khutkawi khawng bang kitum san gawp sakin naupangte lampial phangphang uh hi. (Matt. 18:6;Mk. 9:42; Lk 17:2).

✓Tuhun a Lungdamnathu a zaza nuam lo ahihna uh pen tua hunteh Lungdamnathu zaknop mahmahna kial a thuak ding ahihna uh lim ahi hi. A khutpi muk uh ii gamtatna te in a lim hong lakkak khin hi.

✓Tuhun a, Lungdamnathu a zaza nuam na hihna in tua hunteh a kial nawn lo dingte na hihna lim hi khin zo hi. Na khutpi muk ii mekna pan kitheih naciangh khat nei lua khin hi ven.

An duh tui duhna ahi lo Pasian thu zaknop mahmahna kialpi hong tun teh a kial nawn lo ding na hihna limte tu-in kilang khin hi. *Online hun ahih manin ‘like’ cihte ‘amen’ cih te ‘khutpi muk’ cihte tawh hong genteh ka hi hi. Evan. Suangh Dal