Myanmar ki-ukzia a nopmawhsak pen GAD department vai

Myanmar ki-ukzia a nopmawhsak pen GAD department vai

(State CM leh Chin State Executive Secretary kua a kihtaakhuaizaw tam?)

Gam khat peuha mipi a uk taktak pen General Administration Department (GAD) hi. Myanmar ah GAD pen galkapte khut nuaiah kikoih lai ahih manin indirect-a mipi a uk taktak pen galkapte mah hi lai, cih loh theih loh khatin om hi. Tua hangin pawlkhat ten Myanmar paizia pen ‘Armocracy’ ci lawh uh hi.

A dangte theihsiamna khat zong om, Ministry of Home Affairs tak pen galkap khutnuai pan lakkhiat pelmawh hi. Tua ahihkeh democracy kumpi vaihawmnaah ahi zong, civil ki-uknaah ahi zong dongkholhna tampi tun den ding hi.

Chin state GAD a ulian pen Deputy Director General za hi a, kumpi sungah Executive Secretary panmun tawh kopin Cabinet Secretary cihna hi. Chin state government leh hluttaw in zum tuam nei loin, GAD zum pen government office lah hi hluttaw office lah hi khawm khin hi. A tomin state khat sunga zum poimawh pen teng galkapte khutnuai mahah om lai cihna hi.

State khat sunga ulian pen leh thunei pen bel cabinet member teng (Chief minister and ministers) hi a, minister dangte thutuam, Chief Minister natawm Executive Secretary (or DDG) in a zahtak diam, a lau diam, a thu a mang den nuam diam, cih dotna om thei hi.

Politiciante pen laitaan nei a om uh zong GAD ulian seem ngeilo, zum paizia zong tel tak lo, mipi in a teelcin mana ulian suak vat hi uh in, a cing kik uh diam genkholh theih loh, term nei uliante hi uh hi.

GAD ulianpite leuleu bel gam khatah zong laisiam pen pawl, zum paizia experience tampi nei khin, pension dong ulian seem ding baanah galkap pu neite hi.

Tua hi a, politician ten GAD uliante a mai-et simsim uh kul ding a, ki-ukzia, zum paizia, nasepzia ding (law, planing, project, financial management etc) a kuppih a dot tangtang uh kul zel ding hi.

GAD uliante tawh kilem kei zenzen vua leh GAD ulian ten zahtaak khollo leh lau khollo thei ahih manin khem mang thei, pei mang thei in, thuneihna zong kituhtuh thei kha ding uh a, gam le minam in thuak gawp thei hi. Tun zong mipi theihpih lohin i politician ten a gukin ha gawi mun mahmah ta kha thei.

Bangbang ahi zongin gam kivaipuakzia a pai hoih theihna dingin kumpi naseemte pen kumpite sawl bangbang a seem ding a hihna uh tawh amau nuaia a kun theih nangin GAD/ MHA pen civilian minister khut sungah mah om le hoih hi.

Mipi ukna ah state kumpi deihdan hi lo a, galkapte aikeh GAD deihdan vive ding ahih leh state kumpi neih thaman tawm mahmah ding hi.

Election contest sawm i politician ten zong kumpi naseem ulian ten a zahtak theih nangun upadi le zum paizia a sin a theih kholh uh kisam mahmah ding hi.

Etkaak ding –

Myanmara galkapte panmun let laina teng –

• 1. Vice President khat
• 2. Defense Ministry
• 3. Home Affairs Ministry
• 4. Border Affairs Ministry
• 5. Hluttaw khempeuh seat 25%
• 6. State, Region 14-a Security & Border Affairs Minister post teng
• 7. Galkapte thukimna lo tawh puahphat theih loh Constitution a Article hon khat

Ministry of Home Affairs (MHA)* nuaia department om teng:

• 1. General Administration Department (GAD)**
• 2. Myanmar Police Force
• 3. Bureau of Special Investigation
• 4. Prisons Department
• 5. Fire Service Department
• * Pithezi Vuanzi Thanah
• **Athuithui Ohchhokzi Uusi Thanah

GAD pen Civil Service Officer teng in makaih a, union level pan township level dong kikhil suk gam buppi a tuam, mikim su kha, ki-ukna (administration) a saipi pen ahi hi.

More: US kumpi in Myanmar gammi 27 te puakkiksak takpi, Chin zong 7 kihel

GAD headquarters office (union level) pen Nay Pyi Taw ah om a, Director General in uk hi. State/Region level pen Deputy Director General in, township level pen Assistant Director in makaih hi.

Union bupa GAD officer om zah

• Director General – 1
• Deputy Director General – 16
• Director – 25
• Deputy Director – 132
• Assistant Director – 493
• Gazetted Officer – 1452