Ki pumkhat dingmaw? Mangthang khawmding maw?

Ki pumkhat dingmaw? Mangthang khawmding maw?

Ni dang lai pekpek in unau hon khat tuipi gol mahmah khat ah teembaw (boat) sungah tuang uh hi. Tuipi tungah a pai lai un kek kia (lightning) leh vanging (thunder) hong nasia mahmah hi. Tua kek leh vanging hangin teembaw sunga unau kituak, ki-it tengin, “Nang mawhna hang hi, Nang khialhna hang hi,” ci-in khat leh khat kingawhtuah in, kitawng in, kisel gawp ngeiingeei uh hi.

A kisiamtang sak ding leh gualzo ding, a tungnung ding kituh in kisel den uh a, vai veng thei lo ahih manin teembaw kiu teng ah kitawngat velval in tuam tut tek uh hi. A kitawngat san bek uh tawh lungkim zo loin pawl khatin in hih teembaw loin zong tuipeek thei lel ing, no tawh loin ka tun’ nopna mun tung lah kei ning ci-in tuipi sungah tawm khia uh hi. A tuak khia nuam lo thukhual thei pawl in khat in a khoh hangun kho zo lo uh hi. Tua khit a sawt loin pawl khat mah tuak khia kik leu leu uh hi.

A tuak khia pawl khatte tuipeek uh a tawl luat uh ciangin (tuipi gol lua ahih manin) teembaw sung mah ah ciah kik leng kisuakta zaw dinga, kimangthang lo ding hi ci-in ngaihsutna hong nei uh a, teembaw manawh in ciah kik uh hi. Teembaw a tuang ten a muh uh ciangin hong ciah kikte na kai to pah samsam in, lungdam mahmah uh hi. Teembaw a tuang ten tuipi sunga tuipek laite kiangah hong ciah kik ta peuh un ci-in a khutte uh a vanvan hangun ciah kik nuam tuan lo uh hi.

Hih tangthu tom sunga teembaw i cih pen Zomite hi a, unau teng i cih pen Zomi sunga pau tuamtuam zangte ahi hi. Kek kia leh vanging i cih pen Zogam leitang hong uk Mikang kumpi – gam thum a hong khente i gen nopna hi. Kitawng, kisel, kimawhsak nuam i cih pen Zomi sungah kipumkhatna ding hong nawngkaisak nuam a, “Ko Zomi sit/siang (original) hi ung”, “Ko a upa pen hi ung”, “Ko minam a vanglian pen hi ung,” a ci nuamte i gen nopna hi. Tuam tut in, kitawngat san uh hi i cih pen mun tuam gam tuamtuam ah i kikhen manin ngaihsutna, thumuh zia, pau leh ham, aw kaih a tuam tek hong pian’na i gen nopna hi.

Teembaw beel tintente pen Zomi mah a lencip nuam, kipumkhatna ding a lunggulhte hi a, teembaw panin a tuak khiate pen amau minam mah a pi bawl nuam, a ul tungsak nuamte, a tol len’ nuam, amau ut bangbanga kipek nuamte i genna ahi hi. A tuak khia hi napi-in hong ciah kikte pen Zomi mah tawh kipumkhat loh buang kisuakta zo lo ding hi cih a phawk kikte i gen nopna ahi hi. Teembaw ah ciah kik nuam loin tuipek lailaite pen amau beh, paubing mah meilet nuam a, a tol len’ nuam teng i gen nopna ahi hi. Tuipi gol mahmah i genna pen i ten’na leitung gen nopna ahi hi.

Zomi ci-in i hihna mah minampi khat tawh kigawm kik lo buang i suahtak zawhna ding om lo hi. Teembaw tung panin tuipi sunga tuak khia a, a ciah kik nuam lote pen a maban ding uh a gim mahmah ciangun si ding uh a, a si lo teng zong khuavot sa si in, a si lote zong ngapi in na valh tum mang khin ding hi. Tua mah bangin ei beh, i bawm, paubing mah thupi sa-in i ut bangbangin tol tat in, i tuam kipek nuam pong hangin leitunga minam tuamtuam lakah kimangthang veve ding a, a suakta zo kuamah ki-om zo tuan lo ding hi.

Tu hun ciangin leitungah mihing million tul guk val bang ki-om a, ahih hangin kampau ahih leh 6000-7000 kikal bang khawng ciang tu hunin kampau kizang hi. Tua-a kipan kum za khit khawng ciangin tu hun-a kampau kizang sung panin za-pai sawmkua tang kizang nawn lo dingin ki-ummawh hi. Pau lamsang siam (linguists) Alaska University a sem Professor Michael Kraus in a genna ah kampau lam pilna a nei mite tuatna ah kampau 300 pan 600 kikal khawng pen mang pak lo ding hi. Tua lo a dangte pen mang hak nawn lo ding hi na ci hi. Tu lai takin Australia gamah kampau nam 200 a om sung panin 135 pen a mang zah a kingaihsun hi ta i.

A mang lo a kicite zong a sawt loin Mikang (English) in deep mang khin pah ding hi. A beisa kum za hun lai-in ngal hat Spanish minamte South America gam a lut lai un kampau nam 2200 val kizang hi. Tu ciangin kampau 600 zong kizang nawn lo a, tua sung panin 250 khawng mai lam khang khat sungin a bei mang dingin kingaihsun hi. Tua mah bangin India ni suahna gam-a teng kampau tuamtuam a zang mite (beh, pau tek a ultungsak nuam diakte) in zong mai lam haksatna pel loin tuak ding hi hang. Ei Zo suante in zong bang zahin kampau tuamtuamte it in, i khiatlah mahmah hangin i khan’toh tuam na’ng a hih khol kei leh i hanciam keikai mawk hangin a phattuamna om tuan lo ding hi ci-in pu L. Keivom in na ci hi. (Ref: Rev. Khup Za Go, “Zo Minam Tawh Kisai Thu,”).

I pau leh i ham milip in tul 50 bang a val manin i ultung sak nuam pong hangin Minam Gampi Khat, Minam Minpi Khat, Minam Paupi khat i neih theih mateng a tunga i gen pau mangthang leh minam mangthangte sungah kihel peelmawh lo ding hi hang cih i phawk ding kisam ta hi. Tedim Chin, Zou, Vaiphei, Simte, Gangte, Teizang, Sihzang, Saizang, Tedim, adng. dngte i ultung sak nuam pong hangin minam mangthang ding bek a ngak lai ihi hi. I pau, i ham i kepbit nuam a, i zuun nuam a, a suahtak zawh ding i lunggulh leh Zomi min tawh kiciamteh ding lo buang i suahtak theihna ding lampi dang om lo hi. Unau tuamtuamte a kipat cilin teembaw sungah lungkihual in a tuan’ khop bang un tuang khawm kik hi. A hun a om lai-in a tuak khiate zong teembaw sungah i suahtakna dingin ciah kik ni. A tuak khia khin sate a ciah kik loh phamawh a, a tuang laite bek i tuan’ saksak leh bel…

“MANGTHANG DING MANGTHANG KHAWM VEK DING,” cihna ahi hi. Ei tui bang kigawm leng kua’n gibang hong hong khin dinga, ei gibang kikhen leng kua’n tuibang hong gawm ding hiam? I upa ten, “Nga in a tam sihpih a, mihing in a tam hin’pih hi,” a cih i lunggaih phat hun hi ta hi. I minam minpi Zomi pen i pianpih, kuamah hong phuaktawm sak loh min man hi a, i paai nuam zongin paihtheih ding hilo hi. I zuih Khristian biakna pen deih a i teel upna ahi hi. Thang Khan Lian