Ki mawhsak keini ~ Makai & Mipi

Ki mawhsak keini ~ Makai & Mipi

Thumasa: Network tungtawn in thukizakna pen pawlkhat in huihlak-a awngawng bangin ngaihsun uh a, pawlkhat in thupi zat lua kisa, thu lianpipi hong sung giapgiap uh hi. Zangsiam hilehang thugil, thulian leh vai thupite mah kikup nadingin ahoih, leh thukizakna manlang pen khat hong suak hi.

Thuumna:

Hih network group lianpite ah thu kongkhah khiat laitak in, ka ngaihsutna nam nih in kaa hi. Khatna ah kisam hileh mipil tampi om a, makai tampi om hi. Tua ten hong suah dinguh ci-in ka ngaihsun hi. Nihna ah kisam sa pipi-a mi khatpeuh telkhialh ding utlo, kiphallo-a im-khinkhian zong hikha thei ci-in ka sansat hi.

Thupatna:

Makai:

Leitungah kipawlna khempeuh in makai kinei ciat hi. Khangluite’ paunak ah, “Kim citciat tangzang kiguan” naci uh hi. Tua banga makai i kiguan pen mihing hihna ah adik kalsuanzia khat ahi hi. Kipawlna khat peuhpeuh ah makai kiteelzia, kiguanzia, laakzia leh vaipuakzia kibang kimlo hi.

Pawlkhat pen kiteelna ‘election’ kibawl in tua mun panin mipite’ deihna tawh a sem makaite ahi uh hi. Gentehna: ZAM (Zomi Association of Malaysia), ZIUSA (Zomi Innkuan USA), ZIS (Zomi Innkuan Singapore), ZCI (Zomi Council of India), TA (Tedim Association of Yangon) leh kipawlna tuamtuam omlai hi.

Pawlkhat leuleu pen mipi ngiat in makai dingin seh uh a, mawhpuak suanpah uh hi. Gentehna: GZA (Global Zomi Alliance) bangah makaipite pen mipite ngiat in seh in mawhpuak suan ngiat uh hi. Hih mawhpuak pen seploh phamawh dinga hong kisuan cihna hi-a, ki muanna leh ki zahtakna tawh hong kiguan ahi hi.

Mipite’ Mawhpuak:

Makai khat thahatna leh mazanna pen mipite’ tungah kinga hi. Bangzah tak in pil, siam, thahat in a hanciam zongin mipite in tawsawn thei keileh makaite zong mihing hihna tawh a bahthei, a gimthei, a tawlthei, a lungkia thei mah hilel a, mipi inzong i makaite tawsawn thei in thapiak siam ding kisam hi.

Makai khat dingin kibulh zel lehang makaite itsiam dingzia leh tawsawn huaizia kitel semsem a, makaite’ thanemna bek i muh khak ciangin hawmthawhna tampi hong phul hanhan hi. Innpi khat hong dintoh theih nadingin ‘foundation’ gina kisap mah bangin kipawlna hong picin nadingin mipite’ lungsim puak kisam hi.

Thukhupna:

Tua ahih manin, i kipawlna khat ciat ah makaite’ thanemna humsiam (pholaak loding) in thapia siam, tawsawn siam dingin Zomite mimal kim iki hanthawn phapha nuam hi. Singno i suan ciangin hong hinsuak ding deihna tawh a hunhun in tui i buak mah bangin i kipawlnate ah a kisam banga gamtang siam, mihek siam, kampau siam dingin Pasian’ teeltuam Zomite tungah i kihanthawn phapha hi.

Dal Sian Hung
Kuala Lumpur, Malaysia.
12 June 2015