Ki deidanna pan ki lamdanna ah

Kilamdanna (Distinction) a piang sak kideidanna (Discrimination) thu up kul

Hellelujah a ci pahpah lote le kamtuam ngah lote in Kha nial uh hi. A langkhat te leuleu in tua banga kamtuam pau le Hellelujah a ci thapai teng dawivei hi ci uh hi. Hih banga eimau sungsuak upna tek tawh kideidanna piang hi.

Lai Siangtho sungah “Note tawh a kituakzah valin kilian ngaihsutzaw kha kei un. Pasian in note’ tungah upna ong piakzah tawh kizui-in kingaihsun bek zaw unla, a kilawm ciang khat bekin kingaihsun un” ci hi (Rom. 12: 3). Pasian in deidanna nei het lo napi-in ahi zongin Israel te Egypt mite a deidan Egypt kumpi pa Pharo le Moses kikal ah kilamdanna a piangsak thei pa ahi hi.

Hotkhiatna pen kideidanna nei lo Pasian’ khut sung pan hong piang ahi hi. Mawhna hang aa kideidanna hih leitung ah Pasian’ ong hotkhiatna in kilamdanna piangsak a, tua kilamdanna pen hotkhiatna ahi hi. Tua ahih manin kideidanna pen Pasian hang hi lo-in mawhnei nang le kei hang hi a, ahi zongin tua kideidanna pan’n kilamdanna a piang sak hotkhiatna pen Pasian hang bek ahihna up kul hi.

Topa mitsuan upna in kilamdanna piangsak hamtang hi. Paikhiatna 8: 23na ah Topa in Moses kiangah Pharo tungah hi bangin gen in, “Tua bangin keima mite le nangma mite a kilamdan’na khat ka bawl ding hi, ci-in gen in,” ci sak hi.

Evan. Suang Dal