Khut leh khe neivetlo in asuak ahehpihhuai mahmah naupangno

Khut leh khe neivetlo in asuak ahehpihhuai mahmah naupangno

America gammi ahi Adrianne leh Jason Stewart te nupa in naupang kepding azon kawikawi laitak un, Philippines, Cavite khuasung aom tagahkepna khatpan in numei naupangno khat mukha uh a, tuapenmah amit uh panin taikhiathei nawnlo hi.

Naupangdang atuamtuam keptheihding, Adopt theihding tampi om hihmahleh amuhphet in itna lungsim neitheipah uhhi. Tuapen abeisa kumnih hunlaipawl hi a, tualai in tua numeino pen kha 6 bek phapan hi.

Tua naupangno pen apiancil akipan khut leh khe neivetlo citciat in, ahehpih huai mahmah nomeino khat ahihi. America kumpi leh Philippines kumte tungpanin tua naupang keptheih nadingin phalna akisamteng vaihawm uh a, October 2015 kumin Stewart te nupa pen tua naupang alading in Philippines ah hongzinta uhhi.

Tua naupangno ii amin Maria hi a, khut leh khe aneihloh zenzen hangin amaitai in, it huai mahmah hi. Anuihmai in mihingte thathat a guanzo himawk hi.

Stewart te nupa in Interview khatah agenna ah naupang kepding kazonma un apiandangdiak “Special Needs” peuhmah kepding in ka ngaihsunkha ngeihetkei uh ci’n genkhia hi. Ahi zongin khut leh khe aneivetlo numeino khat amuhkhak uhciangin omthei nawnlo uh a, hilo adangmahmah teelsawm lopah uhhi.

Khentat pahding pen hamsa mahmah himahleh hangsantak leh upna lianpi tawh hih numeino mah kepding in ka khentat uh cihi.

Maria pen atuamdiak “special needs” akisam ahih manin, Stewart Family pen buaituam mahmah uh a, nakhempeuh ama adingin ahunpia in, kepcingdet kultuampah hi.

Ahi zongin hihte innkuan in Maria pen acinglo khatin kamu nawnkei uh ci’n genkhia uhhi. Ama adingin nakhempeuh atuamdiak in sepsak bawlsak akul hangin nawngkaisa hetlo uh a, itsemsem zawlai uhhi.

Maria pen tu’n kum 3 bang hita hi. Stewart Family sungah amahlo adang pasalno khatzong Philippines gampan mahin akep uh omlai a, tuapen kum 6 phakhinta hi. Amauta taktak ahilo numei khatleh pasalkhat akem uh ahihi. Tua nihtelo, adang amau ii asungpan apiang ata taktak Biological Children zong nih nei uhhi. Tua numei nihte pen kum 11 leh kum 13 phata uhhi.

Maria pen asanggam te’n it mahmah uh a, atuamtuam in kimawlpih in, innkuansung nuamsa mahmah uhhi.

Mitawh ki banglo citciat in khutlehkhe omvetlo in asuak ahihhang, amah akemnuam mihoih tawh akituahkhak pen lungdamhuai hi. Adiakdiak in amah akemnuam Stewart Family te mahmah thupi hi. Topa’n thupha napia semsem tahen! ZD Sawltak #zomidaily