Vanleng sungah khualum salua in Emergency Exit kongkhak ahongpa $11,000 ki liausak

Vanleng sungah khualum salua in Emergency Exit kongkhak ahongpa $11,000 ki liausak

China ah khualzin pasalkhat vanleng sungah atut laitak in khualum salua, ki uukcip salua ahih manin, huihsiangtho angahding in kongkhak honsawm hi. Ahi zongin a kongkhak honpen Emergency Exit nahimawk ahih manin, akimat banah sumzong tampi kiliausak cih SCMP pan kiza hi.

Hih thupiang pen nungkalsung in China, Sichuan Province sung aom Mianyang Airport ah ahihi. Chen akici pasalkhat vanleng tawh alengkhiading in vanleng sungah angak in atu ahihi.

Vanleng sungah khualum salua, huihsiangtho “Fresh Air” angahthei nadingin kizawt kawikawi a, kongkhak Windows aki hongtheiding sa in agei aomkhat akaihleh Emergency Exit kihongkhia cimawk hi.

Tua Emergency Exit akihon ciangin kongkhak akihonkawm in, apualam ah ki tolhkhiattheihna Escape Slide zong kizalsukpah deldal hi.

Chen akicipa pen kum 25 aphakhin khat hi a, Hainan Island panin innlam zuandingin aciahsawm ahihi. Ama genkhiatna ah tua akaihna pen Emergency Exit ahihlam katheikha hetkei hi, vanleng sungah khua lumlua, hong uukcipgawp ahih manin, Window aki hongtheiding sakha in kahonkhialh ahihi ci’n genkhia hi. Ahi zongin Emergency Exit akihon ciangin kapatau mahmah cihi.

Tuabang in agamtatna hangin vanlengsung nasem te’n Police te zasakpah uh a, Chen pen mat thuakpahlian hi. Ni 15 sung Police te’n kemcipding ci a, tuabek thamlo, vanleng ii Emergency Exit asusia suak ahih manin liausumzong 70,000 Yuan (US$11,000) ki liausak cisawnsawn hi.

Hihbangdan buaina pen abeisa inzong China gamsung ah kiza ngeikhin hi.

2016 April khasung inzong Bulldozer Driver khat vanleng atuangngei ngiatlo khat hi a, vanleng sungah atutkhit ciangin huihsiang angahding in Emergency Exit hongkhia ngeimawk hi. Shenzhen Airport ah thupiang hi a, Cabin Crew te’nzong akhamkham kawmkal ah, ahong teitei ahihi. Vanleng alenkhiatma vive ahih manin phadawmlai hi.

More: USA, North Carolina ah Karen pasal khat vanleng tungpan tuakkhia

USA, North Carlina ahzong Myanmar gammi Karen pasalkhat vanleng tungpan in tuakkhia vingveng cih thuthang omngei hi. Zomi sungah tuazahliang in ahai gamtat omnailosam ahih manin lungdamhuai hi. Sawltak #zomidaily