Khual ah sih ciang… ~ J. Thang Lian Pau

Khual ah sih ciang… ~ J. Thang Lian Pau

Luang bangci pham ding? Bang teng theih kul? – Zomi pen i tawm zah ngaihsutin leitung mun tuamtuamah a kithehthang pen pawl kihi ding a, tua tawh kizuiin Zomi sungah zong khual a sihna hong om toto zel lo thei lo hi. Khual gam khuapite ah siluang phaam dan pen i khua i tui tawh hong kibang thei nawn loin, khatveivei luangphaam ding leh luang ngak nading inn takpi om loh hun om thei in, tua bang hun ciangin kimangbang nuam mahmah hi.

Khua lama ten lah hong pua un cih leh siluang muak khawng thuah pah in, baih ngaihsut mahmah pawl ki-om hi. Khua lam puak ding hi in, a phuala vui ding hi ta leh, gamtat dan dingah theih kul zuih kul kumpi’ ngeina tampi na om hi. Tuate a hampi teng a baanbaan in suut ni.

Khual khuapi zato-a sihna ah, mun gamla lo motaw tawh khaw lama puak ziau theih ahih kei leh, vanleng tawh puak dingin pen lai (Document) neih hamtang kul nam thum om hi. Tuate pen Death Certificate, Police No Objection Certificate leh Embalming Certificate hi.

Damlo, lamet om nawn lo cih theih sim gige pen zato delh in, mun gamla zuan dah heuh in. Lauh kholh mah bangin va si takpi in, mi va kibuaisak sawnsawn lel hi. Khristian upna tawh hangsan takin nawk ngam ding kisam hi.

Death Certificate:

Misi pen a si takpi hi cih lahna Certificate doctor in a bawl kul a. Zato-a si ahih leh, a sihna Ward a Doctor Duty in hih Certificate pia ziau thei lel hi. Death Certificate ah pen misi min, kum zah, sihna hang, sihna mun leh hun kitel takin kigelh ding hi. Hih Certificate na neih kei leh, “Cancer a si hi veh aw” na cih pong hangin, “Guza tawh nathahlup a hih leh hih loh bangci’n i cian thei dinga le?” hong kici leh buai pah malam ding hi teh!

Tua ciang, vai sian mateng zato-ah luang zalh niloh pen phal hi loin siluang buk, Morgue ah tuah ding hi. Ai’zong hih zong koihna pak bek hi in, khuapi pawlkhat-ah pen nai li sung kaan koih theih loh hi. Death Certificate nei loin Morgue ah luang koih theih hi lo hi.

Na damlo khoi pen khawsuak zo nawn tuanlo dinga na theih leh a sih ngak se loin, Morgue leh Air Ticket a khaam (book) khol ding mi a guka kiseh kisawl pen pilvai mai hi.

No Objection Certificate:

Hih lai pen luang neitu in luang tuahkhiat theih na’nga Police lam’ theihpihna leh phalsakna hi a, Death Certificate a kigelh sihna mun a huam (Jurisdiction) Police Station ah nget ding hi. Death Certificate lo tawh lak theih hi lo hi.

NOC lai pen misi innkuanpihte hiam, a tanaute hiam mi khat kiang bekah kipia thei hi. Tua hi in, luang pen koikoi-ah a kituahkhia zongin NOC a min tuang luang neitu in a zuih ngitnget kul in, NOC a min tuang pen kihel loin luang tuahkhiat theihna om lo hi. Tua ciang, luang (hankuang) pen vanleng tawh khaw lama puak ding ahih leh NOC a min tuang penin a zuih hamtang kul in, Passenger Ticket a a mingelh dan zong NOC a tawh a kibat ding ahi hi. Midang ten “Hankuang neitu” hi ing, ci thei lo hi. A ci zong’ pom theih hi lo limlim hi.

Vaigam khawpi khawngah Zo ngeina dana luang tutpih, zanhah leh niang awm se kul lo hi. Morgue a koih manin a compound kiimah zanhahkhop se zong kul hi lo hi. A innkuanpih ten lamdang a sak leh zong a tha neemsak lam hi loin, a khauhsak lamin kheembawl ding hi. Mi gam mi leiah mi ciin dan zuih hoih pen mai hi.

Embalming Certificate:

NOC tawh misi buk pan luang tuahkhia thei ta. Koi lam manawh ding? Vanleng Ticket, Death Certificate leh NOC a thumin nei khin ta se mah lecin, vanleng-ah puak hong kiphal nai lo lai ding a, Embalming Certificate kisam hi. Vanleng ah puak taak dinga luang pen hah leh bawl kul phot in, tua pen nang mawk hih theih hi loin a hih ding mi tuam, mortuary lama seemte hi.

Hih mite pen zoto tawh kinaihkhol lo khin pian uh a, Ambulance tawh manawh vangvang kul hi. Amau in luang pen lim taka a bawl khit ciang vanleng tawh puak theih ta hi, cih lahna Embalming Certificate hong pia pan ding uh hi. A hah a bawl dan uh pen:

Khawval man lela Mortuary a luang hah lai khawng et ding hi khin lo hi. Mortuary ah luang ap ding ciangin amau guaktangin koih veve ding ahih ciangin leh mang nuam ahih ciangin a silh a teen teng suahsaka kep ding hi. A zawh uh cianga a silh a teen ding teng kiginkholh ding hi.

Dressing:

A silh a teen teng hawkkhia khin zel uh a. A pumpi tunga pawn leh liam a om leh zong, hah masa ding uh hi. A muk leh mai etlawm lo teng lim takin bawllem ding uh hi.

Hygienic Embalming:

A muat pak loh na’ngin zatui sun ding uh hi. Sawp a kul leh sawp ding uh hi. A ci tung pana tui namsia phulkhia thei teng hu ding uh hi.

Deep Freezing:

Mortuary ah sawtpi luang muat loh nadinga khoina vuukbawm nei tek uh a. Luang pen guaktangin tua sungah golh lut uh hi. A ngeina ah vanleng tawh puaktaak ding pen nai 12 sung vuukbawm (Deep Freezer) koih kul hi. Tua khit ciangin hankuang ah kiguang ta ding hi.

Sihna natna vaiah Vaigam khawpi-a om Zomi Welfare te leh siamsinte kigimsak mahmah thei zel hi. Eimau taanga tat leh sep hong kigap uh leh zong a bei teng beek sik sawm leng. I hih zawh leh a nung ciangin Welfare huhna khawng puak zo leng kilawm mahmah ding hi.

Hankuang:

Mortuary mahah hankuang lei ding om pah in, a pongpi in Class A B & C ciin khen thumin kibawl hi. Class A pen hoih mahmahin a man zong tawmsan lo pah ek hi. Class B pen mi zat bel hi a. Saphuklai tawh kuang sung teng kikop in, tua khit teh a nip dingin pat phah kik in, puan tawh kituam (lining) sawn hi. Hankuang pawlam tuamna puan gial (Colour) pen ei deihteel theih hi.

Vanleng lamah:

A kisam lai tuamtuam kengin, hankuang tawh vanleng tual lam namawh theih ta hi. Van puak lam saina (Cargo Section) ah lutpihin, amaulaite lim takin a etdik khit ciang, hankuang pen X-ray tawh a sung veel kik ding uh hi. Mi gilo ten hankuang pen vankham puakna in zang sim zel uh ahih main pilvang mahmah uh hi.

Luang vai pen van ngeina tawh kibang loin vai tam diak ahih manin a lol lama tun ding hi. Tua ciang, van dangte tawh kipuakhawm ding ahih manin ciaptehna zong lim taka bawl kul mahmah hi.

Mi sum bei sawnsawn lel na’ngin kibengvaksak lua ken. Mi kicing lo ahih kei leh, thu thei ngap lopi-a tat pen vai buaisak nuam zaw hi. Misi lam ten hong ci ngeungau a hih kei leh amau sum bei dingin vanlengah siluang zuih ban pen cih vet loh ding hi.

Hingsih tawh kisai

Damloh ngeina vanga sihna hi lo, hingsih (Unnatural Death) nam – kiguiawk, tualthah, motaw gawi, Drugs OD cihte-ah a dan tuam zek hi. Hih dante tuah ciangin a si hiam aw, a si kei hiam aw zato manawhpih leh Police te koh hamtang ding ahi hi. Inn tut khit ciangin hankuang pen hon nawn loh hoih bel mai pen hi.

Post Mortem:

Hih pen misi’ sihna hang leh pumpi sung etdikna hi a, khawpi lian leh nam ciimzawte lakah kihamtang ngaihsut hi. Post Mortem hih lohin police ten NOC pia thei lo a, Case zong Register thei lo hi. NOC neih lohin siluang kituah thei lo, khawlam puak theih loin, haana phum vai dongah hatsatna tam mahmah hi.

Khawpite ah Post Mortem ding siluang 10-20 khawng kikholkhawm thei zel ahih manin vaipi khat cing hi. Hih bang hun ciangin thuneite kiang hiam, Police te kiang hiamah nawh dinga nget kul hi. Theih ding poimawh ah Post Mortem Result pen suak pakpak ngei khol lo ahih manin Post Mortem sa hi, cih etsakna lai lak a, tua tawh police-ah NOC lak kik in vai hong dawn pen hi.

Haan:

Khawpite ah Khristian haan om khin pian lel a. Tua a om leh haan muna guina hun zang ding Chaplain (Pastor) om pah zel hi. Pastor i zaksak tawh kitonin haankhuktote (Undertaker) zong zaksak pah ding hoih hi. A ngeina-ah haan mun man baanah Pastor leh haankhuktote thaman piak ding kul hi. Haan mun 6’x3’ cia pen i phum i zat sung kum 5, kum 10, kum 20 tawh kisaiin aman tam piak kul dan hi.

Sum leh Pai bei

Siluang, vanlengah puak man pen naupang hi in, picing hi ta leh khat ciangin KG100 in kituat in, tua man bei kul hi. Tua baanah a pongpiin hankuang man Rs.2000, Mortuary ah Rs.2000, kileh kawikawina in Rs.2000 khawng leh a nengneng teng tawh a vekpiin Rs.8000 – 10000 kiim bei kha hamtang zel hi.

Hih takah taam sunga neek leh dawn, tunna man leh vanleng sap man kihel lo lai hi. Mortuary ah hi ta leh vai ten mi lungsim buai lai tak lemlawhin sum nget kiva mahmah uh hi. Kul a hih leh zong Rs.200 val piak het loh ding hi.

US gam bangah sih ding pen kikihta diakin, na khempeuh sum vive tawh vaihawm kulin, haan mun leina-ah sum tam bei mahmah hi. A pongpiin a tawm thei penin zong luang kahtah $7,000/- kiim tung kha hamtang hi, kici hi.

A tawpna ah siluang pen i khua i tui a tun zolo veve ding i hih leh, zo ngeina leh khristian ngeina ahih khol loh hangin luang halin, i vui i vaap beek i khua i tui tun leng a hoih zaw kei tam maw? Atei: J. Thang Lian Pau | 2004