Khi leh alianbel Siampi te ~ Rev. Fr. Damian Dal

Khi leh alianbel Siampi te ~ Rev. Fr. Damian Dal

Thungetzia leh thungetna tampi a omna sungpanin, alianbel siampi (Pope) te ii adeih penpen leh hoih asak penpen khat in ‘Khi thungetna’ ahi hi.Tua hi in, khi thungetna tawhkisai athu genna te uh i etciangin, ih lungsim sungah kama gentheih loh lungnop na le lungkimna hongguan hi.

Pope Pius XII (St. Pius) na in, “Khi thungetna in Lungdamna thubu ii cingtomkim (cing lah cing, tom lah tom, kim lah kim) namun hi” na ci hi. Pope John XXIII (Bl. John) in, “Khi thungetna in, ahoih penpen Pasianthu lungngaih kawma thungetna ahi hi. Banghanghiam cih leh, Christu Topa’ mihing hongsuahna leh gupkhiatna thupha hongpiakna thute in, khi thungetna angentaktak te lungsim sungah siangtak leh kilangtak in teenghi,” ci hi. (Encyclical; Grata Recordia pan lakkhiat).

“Khi thungetna ih cih in, Christu Topa tungah kinga a thungetna ahi hi” ci in Pope Paul VI in honghilh hi. (Apostolic Exhortation: Marialis Cultus, n. 46).Tua banah “Khi thungetna in kadeih penpen leh, kalung kimpenpen thungetna ahi hi,” ci in, Pope John Pau II in na gelhlai hi. (Apostolic Letter: Rosarium Virginis Mariae, n. 2).

Khi thungetna in, Christu Topa tungah kinga a thungetna (Rosarium Virginis Mariae, n. 1) hi in, lungdamna thu le Laisiangtho kigawm na mun zong ahih manin misiangtho te leh Pasian bek muana anei mihoih mipha te in angpom in, khahsuah lo uh hi.

Maria tawh akibangin Topa tawh kigawmkhawmni! Christu Topa tawh nakhempeuh te ah ih kibat zawhna’ng( Philippi 2:5) leh Christu Topa pen puanbang silh in (Rom 13:14, Gal 3: 27) ihnuntak zawhnang hanciam na in, Christian nuntak na man taktak ahi hi. Christu Topa in eite sungah adimtak le kicingtaaktak a, hong om theih ni masiah teng (Gal 4: 19) eite itna tawh lamhonglak in, hongmapi dending a om, hehpih na tawh akidim Jesu Nu le eite Nu Maria (John 2: 2-6, 19: 26-27) in honghuai, hongkem, hongcing den ahih manin, Khi thungetna in, Nu Maria ii nasepna ahi, atapa le eite pumkhatsuah zawhna’ng ahanciamna ah, nakpi takin thapia hi. Tua in khithungetna ii vangliatna ahi hi. Tua hi a, Maria Tonu ii, ei Christian te ading ana sepna in, Pasian tawh hong kigamlasak hi loin, atapa tawh pumkhat hongsuah sakna hangin, Pasian tawh pumkhat hongsuak sak ahi hi.

Pope John Paul II in khangno te hongvaikhak na ah; “Kongit khangno te aw, Khikhin a nathunget dinguh, zumngaih sutkha kei un. Haksa sa kei un. Lampai kawm, nasep napa’n naciah kawm, sang pai le ciahkawmin, khikhin a, thunget ding lau in, zumkei un….Tua banga thungetna in, upna ah honghangsan sakdinga, itna ah hongcitak sakin, lamet na ah lungnopna le lungduaitaka ngakzawhna tha hongguan ding hi. “Pasian in septheih loh nei lo hi (Lk 1: 37, 18: 27) cih thu na up namuan zawh taktak nangun, tuabang upna anei Maria i nu kiang zuanin nasinden un!” [from L’Osservatore Romano n. 12 (1785)-19 March 2003]. Rev Fr Damian Dal