Khawmpi Update leh Report gelh tangtang huai ~ Thang Van Lian

Khawmpi Update leh Report gelh tangtang huai ~ Thang Van Lian

Biakna Pawlpi ahi a, vai dang khatpeuh tawh Khawmpi i bawl ciangin Khawmpi tawh kisai theih huai thu bang teng om, cih update leh report gelh zo ham tang leng deih huai mahmah hi. Tua bangin update, report leh etkikna gina tak a om theihna dingin:

1. Makaipite, GS/ES te, Pastor te, Secretary te leh ama sung a om staff te in vaipuak nei uh hi. Hi dan hong bawl kei uh leh makai a teel taak khol lo, khasum piak taak khol lo cihna hi. Ahih kei leh zong report nei zo lo/report taak thu om lo kipawlna pen gina ngiat lo ding cihna hi.

2. Update hong kigelh kei leh khawmpi huam sung a om a paizolote hong thusim khol lo uh cihna hi. Mipi a thusim lo makaite leuleu pen hong lawhcing hanhan khol lo ding uh hi zel hi. Makaite hong lawhsam le uh mipi lawhsapna mah hi zel ahih manin theih huaite buang kitheihsak ding thupi mahmah hi.

3. Khawmpi tungtawnin mipi ngah ding a lawp huai hamphatna leh metnate gen siam leng mipi hong lawp mahmah ding hi. Tua mah bangin mipi lam pan a sep ding uh leh piak ding a omte zong mipi in hong thei le uh kipawlna sungah hong hanciam tuam ding uh hi.

4. Khawmpi ah kua teng kihel, zin zahtaak kua teng om, zindo kuate hi a zindo zia bangci, sum muhna leh zatna, cihte hoih tak gina tak gelh khiat huai hi. Ciin ding leh pelh huai bang teng om… cihte gelh khiat huai hi.

5. Hih Khawmpi sung panin lunglut huai vai thak bang teng kihawm, khensatna thupi bang teng kibawl, tua in kipawlna huam sung mite bang danin sukha ding a kilamdangsak ding, bang tengah kua teng ma pan kul ding… cihte hoih tak gelh huai hi.

6. Sum tampi bei-in Khawmpi a kibawl hi a, tuhun pen laikung zang lo a online pan paperless vive tawh nasep theih hun hi ta ahih manin update, report leh review cih dante a tam theithei gelh tangtang zo leng deih huai mahmah hi.

7. Makaite leh mipi kikal thukizakna a hanciam makaite lawhcing semsem ding a, mipi a thusimlo makaite bel amau mahmah leh amau tawh kisai kha mipite tawh khantohna ding tam lua khol lo, cih kimu thei hi. Rev. Thang Van Lian