Khantohzia Nam Thumte ~ Thang Sian Sing

‘Khantohna’ in nuntakna sungah peelmawh i tuahding, akisam thu ahi hi. Pumpi khangin, lungsim zong apicing ding ahi hi. Theihna zong khangin, itna zong akhangsemsem ding ahi hi. Khantohna in thupai (process) khat hi in, thakhat thu le mitphiat kaal-in akimupahlo namte zong om ding hi. Khantohna i ziate ensuk le’ng.

Dependent:

Khantohna i kipatna le kal masa ahi hi. Amaute i khantohna in khatpeuh tung kinga peelmawh a, zong akitangsam ahi hi. Gentehna in nau suaktung, naungeek te in muhna ding mit nei, zakna ding bil nei, hita leh amau te in mulo-in, zathei nailo hi. Khe aneih hangin dingtang nading in thakhauh nailo hi. Akhutte uh ahi ding zahin zangh thei nailo uh hi. Amau te in athu le ahoihna(khut, khe, mit, bil le kamte), atha-ngal te uh aneilo bel hi tuanlo hi. Ahun atung nailo le asinsaanlai uh zong kici thei ding hi.

Independent:

Khang hong cingin hong misuak uh teh amaute-in khatpeuh kisamlo-in dingzo ta uh hi. Aneihsa uh thuhoihte le thangalte phatak-in hong zangh theita uh hi. Khial ngeilo, cih hi tuanlo (khialkawm, sinkawm) in sintohtohna tawh tuakngei thute (experience) panin asia, apha, zuihding le pelhdingte hong khentelthei ta uh hi. Nuntak zawhna ding (survival) ciang khangto khin ahih manin khatpeuh kisamlo (independent) in dingzo ahi zaw a, kicing cihbel hituanlo hi. Sinna (learning) i cihin khantawn dongin ahuam thuguipi ahi hi.

Interdependent:

Hih munah nuntak dinzawhna ding khatpeuh akisamlote’ (khat bek hilo) kipawl theihna te kimu thei hi. Amaute in khat i thaneemna, khat i thahatna le kilamdangna te kitheih pih (recognize) uh hi. Amaute kikaal-ah khat le khat kizahtakna (respect) om hi. Nasem khawm thei uh hi. Aituam (individual)sangin mi atamzawte’ phattuamna ding thupi sakzaw uh hi. Athutak in amaute in apiakhia-nuam lungtang (giver’s heart) nei uh hi.

Alungsim uh ah thuhoihte bekin vomthei, mun ngah thei hi. Tua thuhoih, thupha te i man(value) tel-in tuate ading athalawh nuam le thaman apiate ahi uh hi. Lamdawt tawh thupha kingahloh lam telin, thei uh hi.Khat le khat kizopna ah tatdanphate (etiquettes) thupi sak uh hi. Athutak in amaute in Itna nei te a hi gige uh hi. Eite in khat le khat i khantohnatek kitel pih le’ng bek i kingaisiam, i kitelsiam ding hi. Khantohna (ahkl) picinna i asangpenpen dawl-in ‘kipawl theihna’ tawh kicing ahih lam zong i theithei hi.

Thang Sian Sing