Khangthak Zomi Nupa (Modern Zomi Couple)

Khangthak Zomi Nupa (Modern Zomi Couple)

Muntuam gamtuam ah khantohna bucing a ciam ding in hong thehthang i biak Pasian min phat masa hang. Tua khantohna i sin kawm kawm in i nupa kaal ah i zat theih pah ding (Initiative zaw deuh), i theihsa ahih hang a poimawh mahmah thu nga bekbek kikum pak dih ni.

1. I Love You (Hong it ing)

Zomi atamzaw pen kamsiam a ciil bawl, zumhuai peuh asa minam hi hang. Nupa ki-itna sung ah “I love you” cih kammal pen a poimawh khia mahmah, zatzat ding leh zat toh toh ding kammal ahihi. Tua kammal in i theih loh kal in iki itna tampi khangsak hi cih pen mipil te gen ahihi. I nasep kuan ciang aizong, vaai khatpeuh ineih ciang, nitak ciang aizong zingsang ciang aizong, “Hong it ing” cih kamkhum zat kisin sawm ni.

2. Hug (Ki kawi)

Ka laisim na khat ah, zan lup ding ciang in minute 5 sung iki kawi na in i kiteen hun kum 10 khangsak hi ci hi. Zomi te atamzaw nupa akitul pih te ihih man in lungdam huai hi. Ahi zong in lup ding ciang in i ki kawi tinten na in ki-itna khangsak mahmah aa, akisam mahmah khat nana hi gige hi.

3. Appreciation (Ki pakta/ Ki phat)

Na hoih isep ciang bek aa kiphat ding hilo aa, nisim pongmaan isepna, annlim huanna leh i meel et ciang bek tawh zong khat leh khat tha kipiak theih lua ahi hi. “Tuni etlawm si cia/Tuni na meel hoih deuh si ee” cih khawng tawh ciamnuih thutak in kamsiam kipaih leng ki itna khang sem sem ding hi.

4. Humbleness (Ki niamkhiatna)

Singtangmai(Papaya) bang in atungnung kituh thapai leng hoih lo hi. I mawh aa imawh kei zong ki lemna i deih leh akiniam khiat zaw kituh ding ahi hi. Nupa kaal ah “Sorry, kei khialh na hi” cih zong alangnih tuak in itamzat ding poimawh hi.

5. Oneness (Kipum khatna)

Laisiangtho in “Amaute pumkhat ahi uhi” acih mah bang in pumkhat ihihna athupi pen akipan a thupilo pen, acih taaklo pen nangawn ah pumkhat ihihna suah khiat tangtang ding thupi hi. Numei nasep leh pasal nasep tawh abuai mahmah Zomi te ihihman in thukhat pepeuh i beel hei siam kul hi. I zii te lungkhamna khempeuh ei lungkhamna mah bang aa ngaihsut ding hi aa, a sampulh nangawn uh buai pih zo leng hoih ding hi.

Pasal te vaai khempeuh, alunglutna leh a uukna a telpih ding leh a theisiam ding in zii te in ahanciam ding ahihi. Na pasal i laa(song) deih pen bang hiam ci in hong kidong leh na dawn theih ding thupi hi. Na zii in Lai-siangtho mun koi teng deih pen hiam hong kicih leh na dawntheih ding thupi mahmah hi. Aki khantul nupa cidam Zomi te ahiding in avanglian Topa Pasian in laisim mimal kim thupha hong pia hen. Itna leh deihsakna tawh- Zomi Anonymous