Khangno le Kimawlna ~ Do Khan Khup

Khangno le Kimawlna ~ Do Khan Khup

Sport ministry tawh Pasian ading a hithei zah a, na a sem Pa Do Khan Khup ka hi hi. Kimawlna tawh Pasian nasepna ah ma ka pan kawmin Pasian thu le leitung thu ah na lamdang tampi ka mukhia hi. Ka zi CingCing tawh a ithuai mahmah tapa nih le tanu khat ka nei uh a, Jephthah Kap Sian Muang, Jennifer Ciin Sian San, Jabez Dal Khan Zam ahi uh hi. A Mang min teng uh Jesu ka deihna-in J vive ka zon ahi hi. O.M ministry ahi Operation Mobilization ah 1997 kum pan kipanin Pasian’ lenggah huang sungah ma ka pang a, 2003 kum October kha a kipan O.M Sport Link Director ka sem hi.

Pasian na ka sepkawmin Club khat ka kipan a, Taung Za Latt F.C. ci-in a min ka vawh hi. A kimawl dingin Zomi vive Player ka zang hi. Kimawlna pen thupi ka sak deuhna nam thum hong gen nuam ing.

• 1) Meltheih kilawmtat nadingin hoih mahmah hi.
• 2) Cidam nadingin a hoih mahmah zatui khat hi.
• 3) Nuntakna ah kivaak kitah nadingin a hoih mahmah nasep lian mahmah khat ahi hi.

1. Meltheih Kilawmtat Nadingin Hoih Mahmah

Keima nuntakna tawh kong kigenteh ding hi. 1993 kumin Yangon No. 2 S.H.S High School ah Sang ka kah a, Kawlpau cilzat ka hih manin lawm le gual ka hau het kei hi. Ka sangkah zawh kha 5 bang hong hi ta a, ka tutpih pa longal maingap mel ka nei kei hi. A group-in Bawlung kidemna hong om a, mi kingah zo lo ahih manin ka tutpih pa in ka min na guansak hi. B – khan ka hih hangin Team C – khana bawlung siam Khin Maung Tun ( Yadanabon )te i a upa uh Kyaw Zi Lat tawh ka pawl uh kibangin amah zong siam mahmah a, a khatna hong ngahpih hiau hi. Final ah ( ) team-te tawh ka kisuih uh a, sangbuppi in hong enphial hi. Ka khanpihte le ka Siamah nu bang in ka min hong thei pan phialmawk uh hi.

Line-up ah ka suikha a, khan dang team-te’n number 8 hong ci-in tha hong pia a, ka khanpihte’n hi lo hi…. (Doee Khant Kuat) in awng ziahziah uh hi. Tua zawh sang khak dong ka khanpihte bek hi lo team-te ahi tan 5 pan 10 dongin hong maingap uh a, sangkah nuam ka sa mahmah hi. Tom gen leng, 2003 kumin pawlpi tuamtuam, Zomi, Falam, Hakha ci-in a pawl, a pawlin bawlung kidemna Diakonia Cup ah Dr. Go Van Mung, Dr. Pau Khan Kam, Dr. Dim San Nuam le Siamah Dim Cing-te’ makai uh a, ke’n Organizer ka sem hi. Tua a kisuite lak pan a siampen mi 20 teelin Chin State tangmi dingin Mon Yore ah Phyne Akaa thukimpihna tawh ka paipih a, a bei teng ka sik hi. 2005 kumin Pa-Thein ah Phyne tang mahin ka paipihkik hi.

Gualzawhna om liang nai lo hi. 2007 kumin South Africa ah International Sport Leadership School ah O.M Sport Link-te sawlna tawh kha 3 sung ka kah a, Chin State ah Hakha, Falam, Matu..etc prayer lawm le gual, Phyne Akaa MFF le International dongin lawm tampi ka nei to hi. 2008 kumin Khristian Brazil team World Cup sui ngei mi thum na-ngawn tawh ka kilawmta a, Kawlgam ah ka sam hi. Gambup Akaa Uliante MFF Uliante le Nargis hun lai-a, a thunei pen Bo Chuk pawlkhat bang tawh zong ka kitheihlawh hi. Kimawlna (sport) hangin hi bang lawm le gual tampi a neihlawh ka hi hi. Tun ahihleh tua lai sangin zong mi tam tawh ka kithei to lai hi. Tua ahih manin hih sport tawh nasepna pen thupi mahmah hi.

2. Cidam Nadingin A Hoih Mahmah Zatui

Ei khamtung ah zunkhum, sikhum, sikhang natna a nei mi tawmzaw thampek a, Kawlpi nuai siah ah tam ka sa zaw hi. Zato lam siavuan (Doctor ) te’n hih natna nei-te damsiang thei lo ahih manin kidal nading bek zatui pia a, excisise na hih un; nikhat tai 3 ta lamsiau ding cih vive ngen uh hi. Lokuan, singpuak, lamsuk lamto paina i khamtung nuntakna pen excisise hoih mahmah khat hi a, zatui limci mahmah na hi mawk hi. Tua mah bangin kimawlna pen thaguite’n nasem den ahih manin cidamna tawh kituak mahmah hi. Kimawl siam mahmah khat, ihmu-mu sa le thadah kawm sa-in gualzawhna ngah cih om lo hi.

A tawmpen stamina (thuakzawhhatna) kisam hi. Tua ahih manin nisima kimawlte thuakzawhhatna nei-in siamna khang semsem a, gualzo cidam hi. Guihtheih khamtheihte zang ngam lo uh hi. A performance khialh ding ut lo uh hi. Tua ahih manin kimawl dena nuntakpih nasepin a neite’n cinat ding a hun uh pammaih sa uh hi. Kimawlna pen a ankuang uh ahih manin a pumpi uh dawm mahmah uh a, zong cidamzaw tham hi.

3. Kivaak Nading A Hoih Mahmah Nasep Khat

A tampi zong gengen nawn kei ni. A tunga thulu tegel ngaihsun bek leng zong lawm le gual hau mahmah in, cidam mahmah kawmin i uk mahmah kimawlna tuamtuam ahi gtn: Tukpeng, Thallot, Tenis, Boxing,…..etc tuate tawh kivaak ding kana a nuam om lo ding hi ka ci nuam a, a kimawlmawlden mi pa pen cidam ngiat ka cihnopna zong ahi hi. Nuntak kivak nading nasepna ah damlo pipi-in innkuan lunghimawhna tawh zi le ta khual a, nasep kenkan sangin cidam sitset a, i ut mahmah hih kimawl nasepna tawh sum le pai zong leng nuam mahmah zaw ding hi.

Music uk mahmah a, a siam mahmah pa’ kivaakna zong tua mah hi pah hi. Tuhun teh sport hangin mite hau mahmah ta uh hi. England khawng ah Tukpeng siam minthangte kal khatin a khasum ei kawlngam sumin Tein 2000 bang hizen hi. A tawpna ah ka gennop thu in hih sport ministry ka sep kum 11 sungah:

1. Ka cina-in zato ka tunlam ka thei ngei kei hi.

2. Kawlgammi le Mangmi tampitak lawm le gual hong guan ahih manin Gamsung Gampua ah ka zin kawikawi hi.

3. Citak taka a sem ka hih manin Pasian in thupha hong pia a, ka innkuanun mite etteh ding dongin hong sik hong vak hi.

Hih nasepna pen ka kivaaknapi, naseppi khat hong suak hi. Tua ahih manin hih kimawlna pen mikim ading a kisam a thupi mahmah ahihna thu kong gennopna a bulpi ahi hi. Sia Do Khan Khup (Director, OM Sports Link)