Khangno’ Hun ~ David Tuang
Mihingte’ nuntakna sungah,a thupi penpen hunin,i khangno hun ahi hi.I khangno hun laitak pen,gamtatna a kipan,i lungsim,ngaihsutnate leh i khuakte thahat in,manlang mahmah ahih manin,ki siam baih,ki khial baih,ki khasia baih,ki lungdam baih,ki lungkia baih,ki lawp baih,ki thanem baih cih bangin, “baih” cih kammal vive tawh ki om hi.Tua ahih manin,khangno hun sungin geelna,ngimna,tupna kician nei-in,Pasian’ bek mah ki makaihsak a,ama deihna bangin i nuntak zawh nadingin hanciamin,kisin tohtoh ding ahi hi. “Pasian ki makaih sakin,Pasian’ deihna bangin a nungta khangno khat pen,Pasian in mite nuai-ah koih ngei het lo hi.”
Thuhilhsia 11:9-10 panin 12:1-14 sungah khangnote ut bangbang semin,ut bangbang in,gamtat ding leh a nuam thei penpen in om ding cih thute kigen hi.ahi zongin,a sia/pha a simtham a,i hih simte na ngawn ah,i gamtatna tawh kizui-in,Pasian in thu hong khen ding ahihna zong phawk gige in,ci-in hong gen hi. “I khangno hun sung pen ut bang bangin i gamtat nop hun hi mah ta leh,ut bang bangin gamtat dingin,a lauhuai penpen hun ahih lamtak zong i phawk gige ding kisam mahmah hi.” I khangno hun sungin i taksa pumpi ading geel khial,sem khial leeng,khang khat ki sumh ding a,i kha ading geel khial-in thudon kei leeng,khangtawn ki sumh ding hi.Tua ahih manin,a sawt het lo ding,i khangno hun sungin,taksa pumpi ading leh i kha ading geelkhol,sem khol in,ei hong piangsakpa Pasian mangngilh het lo a,ama deihna sungah i nuntak ding thupi mahmah hi. “A siangtho i khangno nuntakna leh i khangno hun hoih/nuam te pen,Pasian leh ama kammal bekmah tawh kikembit,kihubit zo bek ding hi.”
Mawhna khialhna leh hoihlohna tuamtuamte sungah a zonghsangh khangno pawlkhatte pen,nu leh pate pattah loh zong hi masa lo a,amau mahmah,a sia lamah kibulh tawm in,Pasian zahtak lo a,amau theihna a suang mite ahi uh hi.Amaute in a theih khak loh uh hangin,amau adingin lametna tawm mahmah a,leitung bek hi lo, vantung dongah gentheihna leh haksatna a thuak dingte ahi uh hi.Tua ahih manin,a duhduh ne-in,a ut bang bangin gamta a,siatna sungah nuam asa mite eng kha kei in!Nang na hih leh thuman lampi panin themcik zong pial kei in la,Topa zahtakna zom paisuak in!Tua hi leh nang adingin lametna om a,leitung vantungah minuamsa khat na hi ding hi.
Khangno khat in,Thumanna leh cihtakna khahsuah loin,a lungsim khempeuh tawh Topa muang a,ama theihna suang loin,ahihna kempeuhah Pasian phawk a,siatna a pelh nak leh Pasian mai leh mite mai-ah maipha ngah in,ama vang ding hi.Tua bang khangnote tungah Topa’ mit om tawntung a,a pai nading uh lampi lakin,nopsakna mun tun’pih ding hi.Tua ahih manin a sawt het lo khangno hun sungin,Pasian leh ama deihna sung bek mahah i nuntak sawm ding hi.Tua banah,khangno hun sungin, thuak zawh hatna kisin in, gamtat, kampau, itna, upna leh siangthona tawh midangte etteh taak dingin i nuntak ding kisam mahmah hi.Tua bang hi leh a hun hunin,Pasian in hong pahtawi ding a,ama hoihna leh ama vangliatnate khat banah khat hong musaksak ding hi.
Tapidaw(Christian)te sunga,mipil,misiam,mihau,milian,mi mingthang i cihte pen,a khangno hun lai pek un,geelna,ngimna kician nei-in,Pasian bek mah ki makaih sak a,thumanna leh cihtakna lenkipin,haksatna tampitak om ta leh ana lungkia het lo teng mah ahi uh hi.Tua ahih manin,a sawt het lo ding i khangno hun sungin, Pasian bekmah ki makaih sak ni. Pasian’ deihna bangin nuntak zawh nading hanciamin kisin ni. Geelna,ngimna kician nei ni. Haksatna tampi om ta leh lungkia loin,mai nawt ni. Thumanna leh cihtakna khahsuah kei ni. Tua hi leh i kumte hong tamin,i khangno hun hong bei ciangin,Pasian’ min leh gam ading leh i gam,i lei leh i minam adingin mi muanhuai khat i suak ding hi.
“Na khangno thahat lai-in,na mailam ading geel-in,sem in la,na nuntakna a hoih thei pen dingin kiseek/kilamh in!”
“Na khangno thahat lai-a,na vawh khaici pen,na khangham ciangin,a gah at-in na nek ding lamtak phawk gige in!”
David Tuang
Comment piaknop aomleh...