Khangkhat Hauhna

Laigelhsiam Pastor Rick Warren in, ” Ngimna Tawsawn Nuntakna = The
Purpose Driven Life”, cih laibu a bawl khiatleh $ 25 Million ngahin
mihaupi hong suak hi. Tuni dongin hih laibu ki leilei lai hi. Lai
Siangtho zom ah hih laibu hoih pen kha ding hi aci liang om hi. A
laibu pen Ni 40 sung na simleh na nuntakna ki khel ding hi ciliang hi.
Kei bangin zong a vekpi in simkha ing. Hampha ka ki sa aa, phattuamna
tampi ngah ing.

Ka gennop bulpi penin Pastor Rick Warren pen Laibu a bawlna hangin
mihaupi suak hi mahleh kum 6 sung a Mawtaw neih laihlo in, a teenna
inn zong laih vetlo hi cihi. Tua ban-ah kum 20 sung Pastor khasum a
ngah teng khempeuh piakik zawsop hici hi. A hauh mahmah hangin a
ngimna ki khello hi. A van neih khello hi. Mi lawh cing mahmah khat in
ki ciamteh liang hi. USA kumpi Obama in kumpi a ngah in Pastor Rick
Warren thu ki ngensak liang hi.

Lawhcin teh ih neih ih lamteng a khel ziahziah nuamte hihang. Khanggui
kizom ih hauh theihlohna ahang a ki kan ciangin ih hauhma in tupna ki
cian neihlo in, Pasian thu ah ki citaklo ahih man hi kici hi.

Hau pianleng innteeng nasem ki deihse hi. Innteeng neihleng inn sung
na sep khempeuh Zi leh Taten bang mah semlo in, innteeng nasemten sem
khin hi. Tua hih manin Taten inn sung na sep khatbeek theilo ban-ah a
baihsa vive nene uh ahih manin a Pa sum muhsa teng tawh nuamsa hi.

A pa inzong ama gentheih bangin a Tate tuaksak nuamlo ahih manin a sum
ki sapna bangin a Tate pia hi. A taten zong a lawm leh gual laklah
nuamsa in vaang hong neih in, miten zong zahtak simpian pah hi. A
taten sum ngahna ahaksatzia thei khalo in, na khempeuh a baihsa in
ngaihsun ahih manin Pilna cihzong kinlo in Pilna sangpi ngahding cih
tupna neilo pah hi.

Up mawhloh laitak in mihingte ki si ahih manin a Pa zong hun khatteh
hong si hi. A sum neih teng uh aTaten a baihsa nene in hong beita hi.
Buhciim tui, Gataam ciim zong khamlo in hong omta uhhi. Na sep zong
uhleh sep theih hong neih nawnlo ban-ah bang mah sem ngeilo uh ahih a
tha uh dah mahmahta hi. Mi tenzong na sem dingin deihlo uhhi. Na sep
muhmah uhleh ni dangin sum zangh ziahziah uh ahih manin a ngah zahzah
uh zangh ziahziah lel uhhi. Laitan lah neihlo, mi kiangah ki lawh
tawmtawh nungta lialia cih tawh hong nungta uhhi. Ta neihto kik leuleu
in a tate gen thei semsem suak mawk hi.

Khangkhat hauhna tua dan hi. Ih ut takpi hiam. Ih ut keileh bang teng
a ki samtam cih ngaihsut huai mahmah hi. Khangtawn hauhna thu study
nuamlai ing. A theiten hong sung khia un lunggulh ing.

Zomite hong Angvan Pasian a min thang hen. Lungdam.

Thawn Tuang
April 14,2014
www.zomi-angvaan.blogspot.com