Khang Kilumlet ~ Hau Za Cin

Khang Kilumlet ~ Hau Za Cin

A diak in gam khangtote ah khang kilamdang hi. Numeite lapsangna pan numei leh pasal liangko kikimna cihte kiuanggen, kiuangbawl in kilamdanna tampi piangsak hi. Khangno sung diakdiak ah kilamdanna tam a, nasepna leh summuhna zong kilamdang hi. Tuate hangin innsung leh khuasung ah zong kilamdanna tampi piangsak hi.

Numei tampi in pasal te mah bangin sum leh pai muta uh a, pawlkhat bangin pasal sangin khasum tam sangzaw hi. USA, Europe, Japan, Korea gamte ah nasia diak hi ciin Chicago khuapi pan thukizakna khat in gen hi. Tua bang mun ah pasal pen innsung vak hi nawnlo in numei pen innsung vak suak hi. Tua tawh kiton in innsungah thuneihna zong kilehbulh in, pasal pen inntekpa hinawnlo in numei in inntekpa suakta hi. Tua banga kilamdanna pen gam khangto masa peuhmah ah kimu hamtang hi ci uh hi!

Numei pasal nei nailo te khasum a tam mahmah ciang a pasal deihdan uh zong tuam mahmah a, a lametna uh zong sang mahmah hi. Khuata pan himah leh khasum a tam ciangin khuapi ah pasal zong dingin vanleng tawh leng in va delh kawikawi uh hi. NY, Paris, London, Tokyo, etc cihte ah Nipini khawng va zang in kikholhna mun (club) peuh ah va tualbual uh a, pasal ding va zong uh hi. A mu a om hangin a tamzaw in a lamet uh bang mulo hi, kici hi. Tua bang mun ah kibual pasal tampi pen sum leh pai kisam hilo uh ahih manin khasum tam sang numei deih masalo in ‘numei hoih’ bek mah a deih masa pawl na hi bilbel uh hi.

Numeite pen pasal sangin pilna zonna ah a khuak uh manlangzaw ahih manin thei pahpah uh a, pasal tampi sangin siambaihzaw, thei baihzaw ahih manin pasalte in banlo uh hi. Tua banga amau a banlo te numeite in na mitsuan masalo in amau sanga degree niamzaw, amau sanga khasum niamzaw, amau sanga lungsim ziakaizaw cihte numeite in neu etnopna nei diak uh hi (pasalte sang). Tua manin nungak tampi in pasal neihloh lawh, pasal a kisapna uh zong om sa tuanlo cih bangin khatguak om paisuak uh hi. Khanglui hun a pasal in vak ding cih banga ngaihsutna om nawnlo ahih manin numei in pasal a kisapna omlo ci lel uh hi.

Tua bang a paitoh zel leh pasal in lah ta nei theilo ahih manin leitung luah ding mihing khang kizopna tampi kilamdang ding hi, kici hi. Numeite in ta neilo in pasal nei nuam kei le uh pasal te bek in leitungah nopsa tuan ding ahi hiam ci uh hi. Pasal khasum kisam hetlo a numei a om theih ciangin, amau leh amau a kivak theih ciangin innsungah, khuasungah kua thuneizaw ding, kua tokhom tungah tu ding cih kinialna tam semsem hi ci uh hi.

Numeite pilna, siamna, leh degree te hong sang deuhdeuh ciangin ama mipih sung sangin minam dang lak ah kibual nuamzaw hamtang hi ci uh hi. Ahang pen mipih sungah kibual sangin minam dang lak ah kibual le uh thupi kisa uh, mite in a pi muh ding sa uh hi kici hi. Tua manin minam dang tawh kitenna, kingaihna, kizopna cihte neizaw hamtang uh hi. Tua banga minam dang tawh a kikhawllo, minam lak ah a tualbawl zolo a numei pihte uh a teekkuan, a upat lam uh ciang eng mahmah uh hi ci hi.

A hoihna, a thahatna teng a bei ciang amau a it taktak ding pen a mipihte bek mah na hita ahih manin ‘nungkik’ nuam liang uh a, ahi zongin kikhel khinta ahih manin a hun nunung lam vuah lungzuang khuangai in hehpihhuai mahmah uh hi kici hi. Zomi sung bel tua bang i om nai diam ka thei kei hi. Minam khangto ihih ciang kiphu toto veve ding hihtuak hi. Hau Za Cin (Phuitong Liim)