Kham lam i cihcih a to mah hi

Kham lam i cihcih a to mah hi

Kalaymyo pan Tedim a pai tote adingin Tedim lam pen a kham a to hi ding a, Tedim lam pan Kalaymyo a pai sukte adingin Kalaymyo pen a suk hi lel dinga kham hiau lo hi. Nangh to na cih hangin amau adingin a suk hi thei a, nangh suk na cih hangin amau adingin a to na hi thei hi. Thumaan na cih nop tengtang hangin thumaan gen cih pen maan khatin maan teta thei lo hi.

Tua ahih manin a maan pen cih bang om thei lo hi. Nang adingin maan na sak pen midangte adingin na maan lo lel thei hi, cih bangdaan khelkhel-a kithuhilhna nam pen tulai (liberal theology) khua hun luanzia hong hi mahmah ta-a, thu gen siam, thuhilh siam na cihcihte uh tua dante hi ta hi.

“Thumaan pen cih bang om kei” cih nadingin hih Tedim le Kalaymyo – a pai sukte ading a suk, a paito te ading a kham cih bang ziau tawh gentehna pen gentehna dik hi lo hi. Qualified lo hi. Pai lam ah to, ciah lamah suk pen mikim in a theihsa hi.

Tedim lam pen khamlam (Khamgam) kici a, Kalaymyo lam pen zanglam (zanggam) kici hi. Zanggam lam pen pai suk bek tawh kitunga, Khamlam pen paitoh bek tawh kitung hi. Thumaan gen i cih pen ei ut banga gen hi loin a tual a omte’ omna mun tawh kisai-a gen kul den hi zaw hi.

Tedim pen kipai to beka kipai suk lo hi. Amah pen pai tohna mun ah a om hi a, Kalaymyo pen pai sukna mun ah a om ahi hi. Kalaymyo pen kipai suk beka, kipai to lo hi. Tua ahih manin Mi khempeuh adingin Tedim pai pen a to mah hi dinga, Kalaymyo pai pen a suk mah hi ding hi.

More: Tedim Khuamual Vaidawnna Talsuan Khuampi

Tedim kipai to. Kalaymyo kipai suk. Tua hi-a, Tedim lam pen a to hi cih mah mi khempeuh adingin a maanpen ahi hi. Thumaan khat bek om hi. Maan kawikawi lo hi. A pai suk te adingin a pai suk laitak a suk hi mah dinga, a pai to te adingin a pai toh lai tak a to himah ding hi. Ahi zongin Tedim lam pen mi khempeuh adingin a kham, khamgam, kham lam mah hizaw hi. Kham lam i cihcih! Evan. Suangh Dal