Kennedy Space Center ah – 6 ~ Hau Za Cin

Kennedy Space Center ah – 6 ~ Hau Za Cin

KSC Mangpha: Space shuttle lah kilawnto khinta, a khu zong vantung nitumta ahih manin kimu thei nawnlo, a kimu thei ciang nangawn ah khuazingta ahih manin ko zong inn lam ciah dingin ka kithawi uh a, viewing point pan KSC mawtaw khawlna ciang KSC te Bus pi Kennedy Space Center cih kigelh gemgam tungah ka tuang uh hi. KSC mawtaw khawlna ka tun uh ciang tuak khia in ka mawtaw omna lam uh ka zuan uh a, mawtaw sung lut in inn lam ka ciahpah uh hi.

Mawtaw tam lua mahmah ahih manin 7 miles ka pai hun sung bekbek uh zong nai 3 sung sawt ta zen hi. Hih space shuttle launch en ding bekbek in mi gam dang tampi, leitung bup pan ci mai ni, pan hong pai uh a, a naizaw diak Canada pan zong tul nih bang hong pai ding ciin kigen hi. Tua ahih manin KSC pan a ciah khia mawtaw tamlua mahmah a, “Traffic Jam” a cih uh kituak kha hi. Tua hangin inn zan nai 9:30 khawng tung ding pen zingsang lam nai 3:00 in ka tung pan uh hi. Nop lah nuam, lamdang lah lamdang. Khatvei nuntak ah hih khak loh dinga pammaih pawl hi in ka tuat hi.

Inn ah nitak ann delh sawm pen zan 11 khawngin zong KSC pan 7 miles khawng bek kipai pan ahih manin gilkial kipan ta a, lampi ah nek tawm ding zongin sumbuk kihongte ah ka lut zel uh a, ahi zongin ka mai vuah paite in zong ko mah bangin na zong tek uh hi ding hi ven nek ding kimu zo paklo hi.

Kumkhat zawh ciang: Tu ni tua mun KSC ka hawh uh kumkhat val ta a, ka hawhni vua a kilawnto pen zong hong ciah kik zota in, a dang khat zong kilawnto kik a, tua zong hong ciahkik zota a, a tawpna pen Space Shuttle kizang ding (ISS ah nasem ding) zong May 5, 2010 in kilawnto khin a, May 16, 2010 niin ISS tung in, a nasep ding teng a sep khit ciang May 23, 2010 niin ISS pan kikhongkhia in leitung 186 vei a kimvial khit ciangin a May 26, 2010 zingsang nai 8:48 AM in KSC ah hong tusuk diaidiai kik zo hi. Hih Atlantis in kum 25 sungin KSC leh ISS kikal 32 vei nasem in kileh man a, tai 120 millions a gamla khualzin hi.

A makaipa Antonelli in, “Hih Atlantis space shuttle tawh ka vekpi un (astronaut te) ka tuang khinta uh a, pawlkhat nih vei thumvei bang tuang khin zo hi. Tuni pen a khualzin a tawpna hita a, Florida ah cidam kong ciahkik theih uh ka nuam mahmah uh hi,” ciin a dawn mipite maiah gen hi. Hih Atlantis mission pen STS-132 hi.

Mailam vantunglam khualzinna dingte tu a kizangte sanga hoihzaw vive hita ding ciin NASA in gen hi.

Space shuttle hun beita a, a hoihzaw vanzat ah mite kilamsang ta uh hi. Zomi te zong hunthak, kalthak ah i kikhangkhan zo ta diam?

PS: “Kennedy Space Center ah” cih series ka gelh patna USA ka zinlai hi a, tu in inn ka tunkik zawh ciang ka zo thei pan hi. Mitkha ah tua Space Shuttle leng vava ette khawng hong kilang vuauvuau hi… lungzuan huai veve mawk. I will be back, baby! (Arnold, “The Terminator”) Dr. Hau Za Cin