Kenanga Shopping Mall kahlei pan naupang kum 5 khat kia in sipah

Kenanga Shopping Mall kahlei pan naupang kum 5 khat kia in sipah

Tuni Friday ni in Malaysia Kuala Lumpur khuasung aom Kenanga Wholesale Shopping Mall ah naupangno kum 5 aphapa khat kahlei tungpan kiasuak in sisuakpah hi. Hih naupangno pen anu leh asanggam tetawh vanleiding in Shopping apai uh hihtuak a, dawl 5 na ii Escalator kahlei tungpan nitak 3pm hun in akiasuk ahihi.

Hih Kenanga Shopping Mall ah ei Kawgam mi saizuak nasem mi tampi om uh a, tuate gensawnna ah naupangno pen dawl 5 napan akiasuk hi a, anuai atuk ciangin pekgawp in aluzong kitamzan cimawk hi.

Hihbang buaina apian ciangin Kuala Lumpur Fire and Rescue Department te ki zasakpah a, aluangzong tuahkhiapah uhhi. Kuala Lumpur Fire and Rescue Department pan Director Khiruddin Drahman in agenkhiatna ah banghang in hibang in kiasuk theiziau hiam cih ki kancianding a, tuaban ah hih Shopping Mall pen Safety Regulations tawh kituaklo ahihiam cihzong ki kancianding cihi.

Hih hongnusia naupangno pen anu in a tangek khat tawikawm in Escalator tawh akahto uh hihtuak a, kahlei ii apanglam pan akiasukziau hihtuak hi.

Innkuan in lungnuamtak in vakkhawm liailiai kimlai, a it huai mahmah laitak ahi a tano kum 5 aphapan khatin hihbang tuahsiatna hong phutkhak manun lungsim honglawngkha mahmah a, atuahsia innkuan te’n hong theihpihloh hangin ki khasiatpih mahmah hi. Hongnusia naupangno ii aminpen Nurhayada Sofia Musa hi a, inntek gammi te hiding hi. ZD Sawltak