Tulaitak Kawlgam vai Thuthang Tuamtuam te (October 07)

Myanmar News Update: Tulaitak Kawlgam vai Thuthang Tuamtuam te.. October 07, 2021

1. SAC-M IN N.U.G PEN KUMPI DING HOIH PEN CIH PULAAK KHIA:

United Nations ah panmun sang asem ngei UN Special Envoys/ Ambassadors thum te ahi Mrs. Yanghee Lee, Mr. Marzuki Darusman, Mr. Rchis Sidoti te phuh khiat Special Advisory Council For Myanmar (SAC-M) in National Unity Government of Myanmar (NUG) pen Kawlgam ii Kumpi dingin kilawm pen pen aa, leitung gam khempeuh in ciapteh ding hi ci in amau Twitter pan pulak khiatna nei uh hi. SAC-M in International law tawh et kak in Kawlgam aading ahoih pen leh akituak pen pen Kumpi ding hong kipulaak khia hi ci uh hi. MAL in belh amah leh amah Kumpi akicih hang tu dong ciang leitung ah kua man ciaptehna leh thu kimpihna nei zo nai lo ahi hi.

2. FRANCE SENATE IN NUG KUMPI DING CIAPTEHNA NEI:

France Senate (Upper House of the French Parliament) in NUG pen Official Government (Kumpi) dingin ciapteh ding vote tawh khensatna kinei aa, a nial omlo in 100% thukimna tawh kikipsak ta hi. October 5 ni in French Party pan mi 8 in thu sunna nei uh aa, tua zawh ciang vote tawh thu khensatna nei uh ahi hi. Lower House ah vote mah tawh thu khensatna kinei dingaa, tua zawh ciang France Government in NUG pen Kawlgam kumpi ding aciaptehna uh hong pulak khia ding uh ahi hi. NUG leh mipi te ii gualzawhna lianpi khat ahi hi.

3. EU PARLIAMENT IN NUG LEH CRPH TE PANPIH DING KHENSAT:

European Parliament in National Unity Government of Myanmar (NUG) leh Committee Representing Pyidaungsu Hluttaw – CRPH te panpih nading thu khensatna pen tuni in vote khiatna kinei thei aa, tualai ah vote khia thei mi 680 lak pan 647 in thu kim uh ahih manin EU Parliament in NUG leh CRPH pen panpih ta dinguh ahi hi. Tua bek thamlo in Kawlgam ii Kumpi in zong ciamteh to to ta ding uh aa, NUG ii Palai ten EU gam teng ah Zum hong thei ta ding uh ahi hi. Abeisa in zong NUG in South Korea leh Czech Republic gam te ah Zum hong khin ta uh ahi hi.

4. U.S HOUSE AH BURMA ACT KIPUAK TA:

House Foreign Affairs Committee Chairman Gregory W. Meeks (D-NY), House Foreign Affairs Asia-Pacific Subcommittee Ranking Member Steve Chabot (R-OH) leh Senator Benjamin L. Cardin (D-MD) te in “Burma Unified through Rigorous Military Accountability Act of 2021” or “BURMA ACT” akici Galkap misok te deihlohna pulakna, nialna leh thu bawl theihna Bill pen October 05 ni in U.S House ah puak to ta uh hi.

Tua bill sungah Galkap misok te tawh economic lam tam kizom lo in sanctions bawl theihna, Kawlgam pan Suang manpha (precious gemstones) te lei nawnloh ding leh US gam sung puak nawnloh nang, Kawlgam kikhel nading special coordinator – Palai khat koih theih ding, UN in MAL misok te Kumpi aa aciapteh theih giat loh nading cih te zong kihel hi. Hih Burma Act pen House leh Senate in hong thukim in kizang thei hi leh Kawlgam kikhel nading tampi huh zo ding hi ci in kiummawh tek hi.

5. U KYAW MOE TUN IN UN AH THU GEN THEI TA:

Abesia 76th UN General Assembly ah Galkap misok ten amau palai guang nuam uh ahih manin buaina hong om aa, UN in MAL ii palai koih ding nial uh in, NUG te koih U Kyaw Moe Tun mah koih toh toh lai ding khensat uh hi. Tua tawh kisai Credential Committee zong gam 9 tawh phuankhia uh aa, tua te in hong van to to ding uh hi. U Kyawm Moe Tun pen Kawlgam taang dingin UN Khawmpi ah akah thei hang thu gen khuan pia lo uh aa, ahi zongin October kha ni 5 ni pan kipan UN khawmpi te ah thu gen na hong ngah to to ta ahi hi.

6. U KYAW MOE TUN IN IRI FREEDOM AWARD NGAH:

US gam ah Freedom Award lak pan Asang pen khat ahi International Republican Institute’s Freedom Award pen tukum in zong mi 4 in ngah uh aa, tua lak ah tulai tak NUG Kumpi ii UN Ambassador ahi U Kyaw Moe Tun in zong ngah ahih manin Kawlgam mi ta ding kipahhuai mahmah hi. Tua Award piakna pen October 19, 2021 ni in United States Navy Memorial Center, Washington D.C ah Award piakna kinei dingaa, tualai ah Senate Republican Leader Mitch McConnell, IRI Chair Senator Dan Sullivan, Senator Joni Ernst, Senator Lindsey Graham, leh Senator Rick Scott cih ten zong thu gen na nei ding uh hi.

Hih IRI Freedom Award ngah mi 4 lak pan Ingrida Simonyte, Prime Minister of Lithuania, Tatsiana Khomich, Coordination Council Representative for Belarusian Political Prisoners leh Willy Chirino, Cuban Grammy Award Winning Artist cih te in zong ngah uh hi.

More: Zomite i ki-it i kingai takpi mah i hihiam? ~ Thomas Mung

Abeisa hun te ah hih IRI Freedom Award pen President Ronald Reagan, President George H.W. Bush, President George W. Bush, Liberian President Ellen Johnson-Sirleaf, Aung San Suu Kyi, Pope John Paul II leh U.S. Secretary of State Michael R. Pompeo cih ten zong ngah ngeih uh hi. Hih Freedom Award pen Kawlgam pan anih vei na U Kyaw Moe Tun in zong ngah ahih manin Kawlgam bup aading angtan huai mahmah hi. Thomas On Sian Mung (Thomas Mung Guite) Washington D.C October 07, 2021 MOMNO Media & Museum