Kawlgam makaipi 14 kimuhna in U Thein Sein kumpi sepzawh kum 3 sung akhat veina hi

Kawlgam makaipi 14 kimuhna in U Thein Sein kumpi sepzawh kum 3 sung akhat veina hi

2014 October 31 ni, zing sang nai 9:30 hunin Nipidaw President Innpi Nguwashwe Hall ah Kawlgam kumpi uliante leh Kawlgam party lian 6 makaite kimuhna om a, Kawlgam tangthu sung ah U Thein Sein Democracy kumpi asep kum 3 sungin akhatveina hiin Kawlgam bup in lamdang kisa-in kilungdam mahmah hi. Kumpi ulian lam panin President U Thein Sein, Vice President Dr. Sai Mauk Kham leh U Nyan Tun, Gambup Innpi + Mipi Innpi ukpi U Shwe Mann, Minam Innpi Ukpi U Khin Mg Myint, Kawlgam galkapmangpi Sr. Gen. Min Aung Hlaing, Kiteelna Commission Chairman U Tin Aya, Galkapmangpihuh + Cin C (Army) Asst. Senior Gen. Soe Win kihel a, Party lian 6- USDP Vice Chairman U Thay Oo, NLD Chairman Daw Aung San Suu Kyi, NUP palai U Thein Tun, UNA palai U Khun Tun Oo, NBF palai U Sai Aik Pong, FDA palai U Khin Mg Shwe kihel hi.

Hih makai ulianpi 14 kimuhna ah U Thein Sein in thugenna nei masa-in adangte minute 10 ciat thugenna kipia hi. U Thein Sein in athugenna ah thu 3 gen a, tulaitak Kawlgam om zia leh Democracy kalsuanna, Kawlgam kilemna lai bawlzawhna ding leh 2015 kiteelna buaina om lo a, siangtho takin akibawlzawhna ding deihna hi ci-in gen hi. Hih thu 3te matutna dingin political force khat leh khat holim kamkup geel khopna hi. Hih hun kalhelh sungin buaina leh ngaihsut kibanglote khiamin kumpi, Innpi, Political party, minam thautawite leh galkap kihel gambup kikap khawlna (cease fire) lai bawl ding leh Political Dialogue (Gamvai Holimna) neihzawhna ding kihanciam hi. Tuni kimuh hun a kipanin kiteelna hun sungin kilemna leh gamdaihna ngahin 2015 kiteelna suakta siangtho takin neihna ding leh 2015 kiteel khit ciangin panmun ki-apna siangtho takin neih ding lam-etna hici-in gen hi.

Hih kimuhna ah U Thein Sein, Daw Aung San Suu Kyi leh U Min Aung Hlaing kilimho mahmah bilbel uh a, lamdang kisa hi. Daw Aung San Suh Kyi in U Thein Sein kumpi sepcil a kipanin amauteng tawh kimuh ding ngen den a, galkapmangpi leh President in athudon ngeilo hinapi ASEAN khawmpi – Nipidaw ah USA President Obama hong pai ding hi cih thu kigenin Media nasem Ko Pa Gyi@Aung Kyaw Naing pen galkapte in athahna thu hong om ciangin gamdangte mawhsak ding launa leh Kawlgam kikhelna om hi cih lahnopna tawh Daw Aung San Suh Kyi ngetna bangin amauteng bek hilo, Kawlgam lutang 14 tawh kimuhna anei uh hi -a, Kawlgam mipi aa dingin phattuamna om ding hi ci-in thuhoih ngaihsunte in gen hi.

Alangkhat agente in Kawlgam tanakha kinuh pak hi-a, Kawlmang thugen Akpi in phiat nelh acih bangin gamdangte maipha zonna pak hi-a, ASEAN khawmpi veng leh galkapte in Kawllo khempeuh kaptolin media nasemte manmang lel ding uhi aci zong om hi.Daw Aung San Suu Kyi interview kineihna ah minute 10 bek hun kingah hi-in ideihzah kigen manlo hi. President in kimu kikkik ding hi hong ci ahih manin tutung lungkim huai takei leh kimuh kik theih hun ciangin deihna kigen thei veve ding hi ci-in lam-en ing ci hi. Kumpi thugenpa U Ye Htut in tutung pen kimuh patna hi-a, mailam ah kizing takin kimuhna om dinga, tutung kimuhna hangin Kawlgam mailam limci hi ci-in Press conference ah gen hi. qVoice

Zomi Times