Kawlgam khasum khangleh hoihding/ hoihlo dingmaw? ~ CS Dal

Kawlgam khasum khangleh hoihding/ hoihlo dingmaw? ~ CS Dal

Kawlgam Hluttaw ah kumpi nasem te khasum khangsak ding leh khansak loh ding nasia tak in kam kinial (debate) kinei laitak hi. February kha 17 ni in Pyithu Hluttaw thugen ahi Thura Shwe Mann in Kawlgam sung golhguk nekna phiat zawh na ding leh mipi te nuntak zia (standard living) a khantoh na ding in, kumpi nasem te khasum pen khansak kulhi, ci in thusun na nei hi. A hi theih leh khasum khansak pah ding kisam hi ci hi. Kawlgam kumpi nasem te khasum pen nidang hun hoih lai tawh a kikim ding in khansak ding in gen hi. Thura Shwe Mann in a gen na ah, Kawlgam khasum atawm penpen (minimum wage) 100,000kyats in koihding in thusung hi.

Kumpi nasem te khasum khangsak leh bangteng piangthei ding, economists te muhna pan kikum le hang. Khasum khang leh mimal in kihau tuam zaw ding a, zatna leh nekna tamzaw ding hi. Kim leh pam a om, mikhat peuh, sumbuk zuakkhat peuh in zong sumlut tamngah tuam ding hi. Sum hongtam zaw ding ahih man in, Kawlgam bup sumlut/zatna zong tam zaw ding hi. Ahi zong sum hong tam zaw leh a sawt lo in vanman hong khang to thei kha pah ding hi.

Nidang in aktui tangkhat 100K, ahih leh, khasum khankhit ciang in (a khan ma zong hi thei) 200K bang hong hito thei ding hi. Tua hi leh kua te in hamsia pen/ thuakpen ding hiam? Kawlgam ah kumpi nasem pen mipi bup, 55, 000,000 val lakpan 3.3% bek hi a, 96.7% pen kumpi nasep nei lo uhhi. Nisim nek khop dawnkhop tawh a nungta mipi te ding a in, nitha 1000K a ngah pen nidang in kicing thei ding a, a hi zong vanman hong khang leh kicing zonawn lo thei ding hi. Mipi atam zaw in thuak/ hamsa sazaw kha ding hi.

Amasa pen khasum khangsak ding hi le hang, khasum te koi pan ngah ding, bang tawh pia ding cih dotna om leuleu hi. Kawlgam in tulai tak in, leibat 11, 000, 000,000 US dollars a kinei hi. Mr Shafique Rahman (A senior policy advisor, United Nations Development Program )in khasum khangsak leh kawlgam te leiba zong hongtam zaw ding hi.

Khasum piakna ding leh leiba a lohna ding uh sum ngah theih na ding adang lampi a zon kul ding uhhi. Kawl kumpi bank pan in sum hongpei/bawl thak leh vanman pen khang mahmah ding hi, Kawlgam bup economy pen sukha ding hi. Tua lo in, kumpi in ‘bonds’ zuak in gamdang pan leitawi la leuleu leh lah, leibat kithuap beh bek ding hi ci hi.

Finance minister Hla Tun in khasum pen azah khat khangsak le hang, a tawm pen 70,000K pan atampen 420,000K hi ding a, kawlgam leibat pen 911K billion (sumkhek $1/800K) val khangto ding hi ci hi. Yangon Institute of Economics pan Maw Than in leibat kigawm vekpi in 3.152K trillion phading hi ci hi. Leiba leh sumlut tehkakna pen (deficit-to-GDP ratio) pen 12.87% bang phading hi. Sumlut sang in, sumzatna tam zaw ding cih na hi. Tulaitak in Europe ah hamsa asa penpen ahi, Greece te leibat pen 2009 kum in 15.4% hi.

Thura Shwe Mann in khasum piak theih na ding in, a kisam lo projects nengneng te phiat leng kingah lel, kicing lel ding hi ci hi. Ahi zong kawlgam sung ah tutadih in a kisam lo projects pen tam lualo kha ding hi. Basic infrastructure bang mah kinei lo hi, na khem peuh puahphat ding leh a thak in bawlphat ding vive ahihi.

Hluttaw pan MP pawlkhat in, khasum khansak ding a hoihloh nasang in, a hoihna tamzaw ding hi ci uhhi. Hoihtak in ki-kem in khangsak peuh le hang, vanman khan (inflation) cih om lo ding hi, a om zong in tam lualo ding hi ci in, Kyaukme MP Sai Hsaung in genhi. Athupi ah kumpi in, siahdon na (taxation), siahdon dan hoihtak in a puahphat dingkisam hi. Siahsum panin zong tampi kingah thei ding a, sumthak bawl kul lo ding hi, ci in genhi.

Kawlgam ki-ukna kikhel zia tawh kizui in gamdang pan in sum le pai tampi tak honglut ding a, kawlgam economy (si pua yee), hauhna leh nuntak na zong a hong khangto hamtang mah ding hi. Kawlgam sung ah gam tuamtuam pan in investment hong lut ngeingai ding a, gamdang mi khualzin gamvak zong hong lut ziahziah ding hi. US kumpi leh EU kumpi te in sanction hong lakhia peuh le uh, ut zong ut kei zong kawlgam pen economic lam ah a khangto ding hi ta hi. International Monetary Fund (IMF) in a upmawhna ah kawlgam GDP pen 2011-12 sung in 5.5% khangto ding hi ci hi.

A hi zong tuma deuh lai in, Maplecroft (British Risk Analysis Group) in, Kawlgam pen abeisa hunlai mah tawh kibawl in, sumbawl nading in a hoih lo penpen, a lauhuai penpen gamkhat hi lai hi ci in thupuak (report) nei uhhi. Kawlmi tangthu siam Than Myint in kawlgam kikhelna pen hoih mahmah hi, ahi zong in economic lam pen hi bialbual lai hi. Kumpi te in tampi tak puahphat thak ding, bawlthak laiding kisam ding hi ci hi.

Tutadih in kawlgam pen leitung ah gam zawng pen khat hi a, sumbang mah nei lo uhhi. Siahsum a dong zong in cihtak, phatak ngah zo lo ding uhhi. Neinai lo pipi, mailam ah sumngah ding tawh ngaihsun in utbang in zatsawm le hang, khangthak te ading in leiba leh sinkham na apia tawh kibang zaw ding hi.

Tuni in leitawi in khasum khangsak le hang, tu leh ta te hunciang in, leibat lohkik ding, leibat a guan (leiba gamh luah) sak tawh kibang ding hi a, khangthak tu le ta te ading in, lungkim huai tatak khinsam lo hi. Hi pen mangpau in (inter-generational fairness) om lo ci uhhi. Finance minster Hla Tun in khasum khansak ding pen mawhpuak (tavuan) lak ngam loh vailua hi ci hi. Hi pen hun tomno bek etna hi a, hun saupi a ding in hoihkhin lo thei ding hi.

Khasum khang leh kumpi nasem te nuntak na tampi tak nuamtuam mahmah khading hi. A hi zong vanman hong khang in, siahsum hongtam leh mipi 96.7% te ading in hamsa zaw khathei ding hi.

(Theihding: Kawlgam kikhel takpi hiam? Economically in gen leng, kikhel takpi mah ding hi, ahi zong, mualtung mite ngahding, tangding in kilawm, political rights, human rights, equality rights, autonomous rights, te ah kikhelna tam lo hi.) CS Dal 2012-03-15