Kawlgam galhang te sihna leh Kawlgam suahtakna

Kawlgam galhang te sihna leh Kawlgam suahtakna

Kawlgam ah Mihangsante Ni ci-in July 19 nisimin kibawl den hi. Galkap uk sungin gina takin kibawllo ahih manin 2014 Mihangsamte Ni pen thupi takin akibawl ding alunggulh tampi om hi. Pathein ah nasia takin bawlsawmin phalna ngah uh a, Pin Oo Lwin (Maymyo) ah phalna ngah lo hi ci-in media ah kisuah hi. Yangon Mihangsante Han ah President makaihin uliante in thupi takin a bawl ding uh mipi in lunggulh mahmah hi. Boyoke Aung Sante sihna thu zong nidangin akisel akiimcip thute media ah kisuahsuah ta hi.Galone U Saw in U Aung Sante athatpa taktak ahi diam ci-in zong thu tampi kaikhawmin akigelh zong om hi.

U Aung San leh alawmte pen 1947 July 19, kigin ni zingsang nai 10:37 hun lianin Yangon Mangpi ah Galone U Saw leh apawlte in thau tawh kaplumin si hi ci-in kawlgam tangthu ah kisim hi. U Nay Min kiang ah 1989 kumin Insein Gilbem ah Bo Set Yong (Bo Khin Mg) genna ah Mangkangte kingawh pen hikhin lo a, PhahSahPahlah kumpi Socialist party makaite kihel hi ci-in gen hi. U Saw pen mithat dingin thangsiahna ah awkkha hibek a, Mangkangte hilo-in Kawl Uliante hizaw hi ciin Palikmangpi U Tun Hla Aung tapa U Khin Aung (U Tawng Sein – Kawlgam thukhenzum thuzekpi leh Gilbemmangpi makpa) in “Who killed Aung San – Aung San kua thah hiam” cih laibu sungah gelh hi. U Saw pen 21.9.1946 ni-in Yangon Bashwe leh U Mya Hlaing in thau tawh kap hi ci-in Bo Set Yong in gen hi. U Saw Pen Sitnineu panin kumpi Inn ulian atung khat hi. Mangkang kumpi in thu theisa-in kita pian ahih manin 1942 Jan 8 pan 1946 January dong Africa Uganda gam ah kumcip uhi. Bo Aung San athahat ciangin adem thei dingin U Saw pen Kawlgam Mangkang kumpi Council member pia hi. England kumpiin Aung Sante Kawlgamvai kikum dingin sam a, 9.1.1947 ni London tunghi. Aung San – Atlee Agreement (Thukimna) ah U Saw leh Thakhin Ba Sein in thukimloin minkhumlo hi. 1947 July 19 ni zingsang nai 30:37 hunin Bogyake Aung San, Didoh U Ba Cho, Tha Khin Mya, U Abdul Yaraf, U Ba Win, Mann Ba Khine, Sai San Tun, U Ohn Mg, Ko Twe -mi 9 kikaplum a, U Saw huangsung akisit ciangin thau kimu hi. Tua thaute lak ah Saw Yan Naung thau zong kihel a, lamdang kisa-in, mat dingin kizonga nihvei taisuahin kikaplum hi kici hi.

Daw Khin Kyi (Aung San Zi) in apasal sihkhit ciangin athuzakna ah Europe ah 1947 June 19 ni U Nu makai-in U Kyaw Nyein, U Tin Htut, U Ko Ko Kyi, Bo Tun Lin, Bo Khin Mg Kalay khualzinna ah Bo Aung San sihna thu U Kyaw Nyein kiang akigen laitakin amau lak a akam imzolo khat in igeelna tangtung ci-in genkhia kha hi cih thu za-in, “Ka pasal hite in hong thahsak hi ci-in hong ci hi cih Bo Set Yong in U Ne Min Kiang ah gen hi. Bo Aung Sante sihna thu akan U Tin Htut zong 1948 December kha-in mawtaw bomb kisiah tawh si a, kisailopi mihangsante han ah kivui hi. Hih kithahna pen Saw Yan Naung thu tawh kizom hi ci-in U Ne Min in 1989, 1990 hunlai a Bo Set Yong thugente internet ah kisuah hi.

1948 January 4 niin England kumpi in Kawlgam suahtakna pia a, Shanmi Sai SanTun in President sem masa-in U Nu in Prime Minister sen masa hi. 1958 kiteelna ah Kawlgam Buddhist gam suaksak ding cih thu hangin Tualsuak minamte in thautawi uh a, Maj.Gen. U Ne Win in Interim Governor sem hi. 1962 kumin Gen. Ne Win in Kawlgam galkap ukna nuai ah koih hi. 1972 kumin puansuahin Mahsahlah party phuan a, party Chairman min tawh 1988 dong uk hi. 1975 kumin U Thant (UNO Secetary) luang vaiin sangnaupangte kitomna om a, 1975 July 7 ni-in Student Union Zumpi kikapkham hi. 1988 kumin RIT Sangnaupangte kiang panin Kawlgam buaina pianga, Gen. Saw Maung in galkap ukna nuai ah koih hi. Sr. Gen Saw Mg in mipi tung ah thuneihna ap ding cih agenkhit asawtloin damlo ci-in kigen a, Gen. Than Shwe, Gen.Mg Aye, Gen.Thura Shwe Man, Gen.Khin Nyunt cihte in 2010 dong len uh a, 1990 kumin kiteelna ah NLD in zo napi galkapte in aplo-in Daw Aung San Suh Kyi gilbem ah koih uhi. 2008 Constitution pen galkap Aana tawh kipsakna kinei a, 2010 kumin kiteelna ah USDP in ngahin U Than Shwe in galkap ukna beisakin U Thein Sein ap a, 2010 March 30 ni-in U Thein Sein in President sem hi. 2012 by-election om a, NLD in mun 45 ngahkim hi. 2014 November ciangin by-election mun 30 om ding hi. 2015 kumin kiteelpina om kik ding hi.

Zomi Times