Kawlgam ah ngongtatding in apaisawm IS tekhat Malaysia ah kiman

Kawlgam ah ngongtatding in apaisawm IS tekhat Malaysia ah kiman

Kawlgam sungah ngongtat dingin apaisawm IS te nungzui mikhat Malaysia ah kiman cih Malaysia’s Top Counter-Terrorism Official te’n genkhia uhhi. Kawlgam sungah Muslim Rohingya te kibawlsiatna hangin gamdang muntuamtuam aom abiakna kibatpih te uh lainatpih mahmah bilbel uh a, kigupbawl mahmah uhhi. Tuahang in Kawlgam sungah a ngongtatsawm tampi om cihzong Malaysian Police Counter-terrorism Division pan makaikhat in genkhia hi.

Tua Kawlgam sungah lutin a ngongtatsawm gamdangmi tepen Southeast Asian Networks tungtawn in aki kaikhawm te ahi uhhi. Tutung akimanpa pen Indonesia gammi hi a, Malaysia gamsung ah akiman ahihi. Rohingya te panpihna in Kawlgam alutsawm, amahtawh akizom IS galkap zong pawlkhat om cihi.

United Nations te genna ah Kawlgamsung Rakhine State panin abeisa October kha akipan Rohingya Minority te akigawm in mi 34,000 bang Bangladesh gamlam zuanin taikhia uh cihi.

Nungkum October 9 ni inzong gamgicing in aom Kawlgam galkap mi 9 kithat ahih manin, tuazawh Rakhine State sungah buaina hongtam semsem hi. Rights Groups pawlkhatinzong Kawlgam galkap te’n Rakhine State sung aom Rohingya te bawlsia in, buanthuak zong tampi om ci uh a, ahi zongin Myanmar Government panin Aung San Suu Kyi in tuabang omlo cih nialkhin hi.

More: Myanmar kumpi in Rohingya Muslim satte manta

Myanmar Government Spokesman Zaw Htay inzong abeisa October khasung Rakhine State sung buaina ah IS te kihello uh a, kikapna tezong amautawh kizopna omlo hi ci’n Reuters te tungah genkhia leuleuzel hi. ZD Sawltak #zomidaily