Kapzaw dingmaw, Nui zawding? ~ Dong Mung

Kapzaw dingmaw, Nui zawding? ~ Dong Mung

Mite nawlkhinna, pampaih langdonate na tuah ciang kap zaw ding maw nui zaw ding?

Kap zenzen lo e, tua bang hun ciang ei hong it Topa hehpihna i muhna hizaw a, hong ompihna hong kilang zaw hi.

Mite in i manphatnate sangin i ginatlohna hong mu in hong neu muh in hong simmawh uh ciang kap zaw ding maw nui zaw ding?

Kap zenzen lo e, tua bang hun ciang i manphatna hong thei in hong lam sang nuam Pasian itna i tel semsem nading na hizaw a, mihingte zia le tong i theih semsem nading na hi hi.

Na lawm le gualte’n amau tungah na hoihzawh nawnloh ciang hong taisan in hong langpan uh ciang kap zaw ding maw nui zaw ding?

Kap zen zen lo e, Zeisu i lawmhoih pen ahihna i telcian nading na hizaw a, lawm hoih taktak le kithuah pih taak taktak lawm i theihcian nading na hizaw hi.

Na lungtang khempeuh pia in na pumpi manphatna khempeuh ama ading itsik hetlo a, na it na ngaih in hong khen ciang na sia lua in lungsim tam zaan na om hun ciang kap zaw ding maw nui zaw ding?

Kap zenzen lo e, a nuntakna khempeuh hong pia in na mawhna taang dingin singlamteh tungah sihna hong thuak hong it Zeisu itna na tel semsem nading hizaw a, tu-a hong nusia pen sangin hong it zaw hong ngai zaw nang adinga ahoih pen mi thupi mi manpha Pasian in hong koihsaksa khat tawh na kituah khak nailoh man hizaw hi.

Na seppihte’n hong haza in hong lang bawl hun ciang le midangte in na sepna sunsun ah hong pahtawi loin hong gensiat uh ciang kap zaw ding maw nui zaw ding?

Kap zenzen lo e, nang ading ahoih pen gelna nei in nang hong pahtawi nuam Pasian hong deihsakna na tel nading hizaw a, mihingte ii pianzia na telcian nading na hi zaw hi.

Tulaitak nasepna na tupna tangtun nadinga na kalsuanna ah haksatna na tuah ciang kap zaw ding maw nui zaw ding?

Kap zenzen lo e, tua haksatnate’n nang hong thakhauhsak dinga kalsuan zia ding hong mu sak in lampi hoih zaw le thuakzawhna hong guan ding hizaw hi.

Sanggam aw leitung nuntakna ah haksatna le buainate’n ei ading manphatna khat ciat nei in i nuntakna hong picing sak semsem banah Pasian hoihna hong mu sak zaw ahih manin kha kun in a kapkap hizaw loin tuate tungah gualzawhna la dingin nui zaw ni. Nuihna tawh i nisim nuntakna kalsuan zaw ni!! Kap zaw loin Nui zaw ta ni maw! Dong Mung