Kanu leh kapa that na hihi

Kanu leh kapa that na hihi

1900 kum lai-in, Italy gamah mihau mahmah khat Louis a kici om a, tapa khat bek a nei hi. A tapa pen kum 7 mi bek ahih laitakin, kamsiatna tawh mihoihlo khat innsung nasem dingin a cial kha uh hi.

A sawt lo-in khutsim, sumsim a neihnate Louis in a thei ta hi. Ahizongin siatna lian liang ahih kei nakleh, ci-in a maisak zelzel hi.

Tua hun laitakin, a gam sungah buaina hong pianga, gamsungmite in kumpi hong luah ta uh hi. Amau’ thu a nial tata manin, thonginn ah khum-in, pawlkhat a that lai uhhi. Louis’ nasempa in sum tampi a muh nading ngaihsun den ahihmanin kumpipa kiangah pai-in,

“Sum tampi nong piak nakleh a kisam mahmah thusim khat kong hilh ding hi” a ci hi. Sum tampi a ngah khit ciangin kumpipa’ kiangah, “Mihau mahmah Louis in nangmah hong gensia in, nangmah do dingin pawl a zong hi” ci-in a gen hi.

A sawt lo-in zankhat Louis’ kongkhak hong kikiu a, hon ngam lo hi. A sawtna ciangin kongkhak lai’keek gawpin innsungah hong tum uh a, galkapte na himawk hi. A zi leh a tapa khau tawh henin thonginn ah a khum uh hi. Tua hun laitak-a thongcingpa pen mihoih khat na hi a, Louis’ tapa pen a innah om sak hi. A sawt lo-in a nu leh a pa galkapte in that ta uh hi.

Tua zawh kum 30 bang a sawt khit ciangin, mikhat zato-innah cina in lum a, gim mahmah ahihmanin Pastorpa sam sak a, Pastorpa zong hong pai pah hi. Cinapa in Siapa kiangah ama’ tungtang thu khempeuh gen a, “Mihaupa’ nasemin ka om a, ka tungah hong dik mahmah napi-in, ka sum deihluat manin ka heek ta hi.

A zi tawh a ngawng tankhia in, a tapa zong a kithatlum ding kimlai, kuate hiam khat in seelsim hi-in ka ngaihsun hi. Tu dongin a man(photo)uh zong ka kem den hi” ci-a a gen’leh Pastorpa in hih thu a zak phetin omkhong thei lo-in, “Koi maw, a man nong lakthei ding hia” a cipah hi. Cinapa in a sabuai tung panin hong lakhia ziau-in a Pastorpa a en sak hi.

Pastor pa in tua man a muh ciangin kap a, “Bangci-mi na hiam? Ka nu leh ka pa that nang hilo na hiam” ci-in hong kitom hi. Cinapa in hih thu a zak ciangin cih nading theilo zahin laulua mahmah a, ahizongin Pastorpa thakhatin hong kihehnem kik hi.

Pastorpa in a ipsung panin Singlamteh neuno khat hong dokkhia a, aw-neem tak tawh, “En dih in; na mawhnate hong mai’sak nadingin hibangin Singlamteh tungah hong si hi. Na mawhnate na kisik a, na thum’leh hong maisak ding hi.

Keizong Pasian’ min tawh kong maisak ta hi” ci-a a genleh, cinapa zong thakhatin, a om dan ding nangawn theilo zahin hong om a, Pastorpa leh Pasian’ tungah kapkawm-in mawhmaina a ngen hi. Tdkhen