Kampau siamte zia leh tong nam 10 ~ Cing Hau Lun

Kampau siamte zia leh tong nam 10 ~ Cing Hau Lun

Mi pawlkhat mitawh kihodan siammahmah uhhi. Nasep navai, vaidang tuamtuam ah amau muhna, amau deihna alanglam te zaktheih dingin gensiam uh aa, kiho mawkmawk na ah zong, paudan siam ahihkei leh kihodan anuam mi, akiho pihte’ zaknop ding aa, apaupih theite ahi uh hi.

Kampau siam ihcih te pen, midang sang asiamzaw keei hiam cih, aki etcik ciang in, amau alamdang in pausiamna, ngeina hoih aneihlam uh kimu thei hi. Alamdang lua leh ahaksalua cihbel hilo hi. Kuakua ahizong in, limtak in kisinsawm peuhleeng, akisiam theithu hi.

Mi’ thugen khat hoihtak a ngaihsakna

Mi atamzaw akihopihte’ pau pen hoihtak a ngailo bekthamlo, ama thugen amanciang, ken hih genlian ning ei acidan khat a, kamkasa bang in nangak theimawk hi.Ama pau’mankhit teh ei’thugen khat pen adang nahi theimawk ahih man in, hong kilunglut lo thei hi. Ama thugen laitak zong eilam pan lungluttak a, ih ngaihloh man in, ei thugen ciangzong amah’n hong ngai nuamlo theihi. A taktak in, thu hongkigen khatpen hoihtak in ihngaih khit ciangin, atua tawh kizawitawn in ihpau pihtheih lehbek amalam pan hong lunglut theipan dinghi. Thugen kampau in ihom ciangin, angai ana om ciangbek in, ih thugen in man aneitheipan hong hihi.

Ih kihopih te’ lunglut theih danding in thugen theihna

Khatleh nihbek kihociang, kampau siam/thugensiam khat in, ama siamna hongkigen masa lo zaw hi. Akihopih te’n suakta tak in mau theihna te agentheih na ding in, lampi ahonsak hizaw hi ci-in, lungsimtawh kisai pilna neikhat in gen hi. Mikhatpeuh ama theihtel mahmah thukhat agentheih nading in lampi ihhonsak ciang in, hih kiholimna thubeipah thadah huai cihbang hong omlopah hi.

Thu mawkmawk kigen a, ih kihona te ah, huagen leng huate sukha ding, hiagen leng hiate sukha ding ahihteh, cihna tawh akisamlo akizom khollo peuh gen neknuk in, ihhun abei sangin, khat ii thutheih lunglut khat gensak le hang, amahlah lawp bekthamlo ei mahmah inzong pilna tampi kingah hi.

Athupi khollo khat aneng atawng in genkullo hi.

Na kihopih te na nawngkaisak nop pian lehbel aneng atawngin thugen in. Athupi khollo khat ihgen deudau ciangin, adeihna tunzolo in akallak peuhah lam hongmang theimawk a, athungai lamte nacim mahmah theimawk hi. Gtn; Tua ee, anipen laithai(ninga)ni, kiginnihizaw aleh khat zawzaw hi ngeel, ahunpen nai 10leh lang, ahikeileh tuahun madeuh khawng hi in teh, ahangpen kei ka Ute innpan kataikhiat a, nai tuazah cileeng, amunzong paakhuan geikhat tuapen……… Hici bangin thu hongkipat hongman thei mahmahlo, angai ten athugen ding natheikhin cihdan tepawl , amaizum ding utloh man khawngbek a, athugen ngaihsak cihkhawng ahihman in thunawngkai mahmah khat himawk hi.

Kammal khat zatden khakloh ding a, kidawm ding

Mi pawlkhat kammal khatpeuh zangmun mahmah thei uh hi. Thukhat peuhpeuh agen ciang tua azongsat kammal uh genden thei uhhi. “Adang khat om, hici dan ee”, “Adang khat omlai” cih kammal khat hong zangden thei hi. Tuadan mah aa, pawl khat leuleu in “apaizia khat ah” cihkammal hong nakzat leuleu, khat leuleu in, “kagen ngeingei danmah aa” cihte pawlpawl hong kitamgen luat ciang, Amau’ thugen khatsang in, akammal zatden khat uh ihzakpen ihnuih khawng nazaza zaw theimawk hi. Adiakdiak in amahleh amah aki ultungsak deuhte, angai te aading in, nazaknop valval khollo hi.

Kician kiteltak a thugenna

Kampaudan asiam te pen, khat peuhpeuh agenma in hunpia in ngaihsun phot uh hi. Genlaplap gensaisai ahihkeileh thukhat apatkhit leh khawlvetlo a gen cihbang zong omlo hi. Tuadan mite in, thu agen uhciangin akammal zatuh akician leh akitel sinsen in gen uhhi. Thukhat man nailopi in adangkhat gen cihbang zong omlo hi. Kiho khopna cihpen khatlehkhat lunglut takin ih kikup theihciang bek in, honglem theipan a, ei thupat khat ih kihopih ten ngaihsut piakna ahihkeileh hongkup theihding in hunpia theizaw ni.

​​​​Mi atamzaw thu agen uhciang in, akician in genlo thei uhhi. Pawlkhat leuleu ciang in akiho pihte uhpeuh enlo, amundang peuh ngatsankawm in pauthei uh a, ama thugen mite’n zamaw zalo cih ngaihsutsak lo beklo in a awlmawhlo tawh zong kibanghi.​​

Thu agenciang un akuntheite ahihkeileh kamhum kawma pau cihkhawng zong omthei hi.Tuapen amahleh mah kumuanloh natawh kibang ahihman in tuadan te zong zangkha keileeng hoih mahmah hi.​​

Thudotna hoih, dotsiam na

Ahun amunleh amualtawh kituak in, thudot theihna pen hongdawng kikding te inzong akicingtak in hongdawn kiktheihna ding, a lampi ahonsak na ahihlam, thukan, sitni, lungsim damna tawh kisai siavuan ten naktel mahmah uh hi. Tua in amau’ ihthupi simna leh, ihlunglutna alak ih hihi. “ih lemlem hia” “bang thuhtak om” cihdan dotna pen, lunglut tak aa dotna ahihloh ban ah, hongdawng kikding tenzong ahiziau khat tawh, hongdawng ding uh hi.

Tua ahihman in thu ihdot ciang “hih nasep nasepna ahang nonggen thei ding hiam” “Tuhun tawhkizui in, mite alungkham mahmah dan in na nasep akiam mang ding bang hizenzen leh bangnacih diam?” cihdan in lunglut takin ihdot ciangin ama lampan atheihzah honggen ding hi. Tuadan thu ihzak khit ciang in, “tualeh nang bangci muh” “Tuabang dan thute bangcidan in ngaihsun nahiam” cih bangdan in dotna tomnono tawh, ihna dot kawmkawmna pan in amanpha kammal tampipi kiza thuahlai ding hi.​​

Namuh na kibat lohpih khat bangci ho ding

Khat leh khat hehliang aa kinialna thupen ataktak in, agen thu sangin akihodan uh hangin thunawngkai omzaw hi. Thugen asiam mahmah mikhat ahi Benjamin Franklin in ahih leh “Tu a nathugen pen hong thukimpih mahmah ing, ahihhang den a nagenkhat pen alamdang inlah natuat kei in la, hoihsa pha kei ing” cihbang dan in athukim lohna hehna tawh laklo hi.​​

Khat leh khat thukinial napen ihmuhna tuak kikupkhopna hi aa, ihmuhna hong tangzaisak beklo in man hongneisak mahmah hi. Ahihhang in akilawm ziau khat a, genna bek ahilo “kenbel hihlai a, nasemte kamuan omkei avekun zuaukhem vive hi” ci-in mi mawhsakna bek nagen khakleh anuamlua lo khat in hong kithukkik ding a, thukikupna nuamtak in ​​ zoptheihdan hong om nawnlo ding hi.​​

Athupi in ah, mipa akhialhlam kician tak a natheih ahihphial lehzong, vathal nialpah lo in, nang’ thuman nasak khat awdamtak tawh nagen theihding kisamzaw dinghi.

Mi’ kampau khat va bottat kei in

Hihpen mi khempeuh in theimah taleh kizui kim zolo hi. A zenzen in​​ ​​ na lungsim sung ah, genbeh saknop valval naneih khak lehzong, azahlaat loh nading in “Lawm aw, na thugen ah ken kongbehlah saknop khat ompak in hong gensak hoh dih in” cihdan in gen lehang ama ading in zong, a omdan nuam zawdeuh dinga, athugen behlapnuam nacih ciang in, tawmkhat beek hong lunglut zawlai ding hi.

Azenzen in nathugen laitak hongki palsat sakleh, ama mankhit lianciang zomkikpah daidai lozaw in, ama thugen lunglut tak in ngaihsak phot lel in la, ama’ manteh nabehlap nop a omleh behlapsak zaw in, tua hileh den a nathugen alunglut te in nazop suakding hongngen zawlel ding uh hi.​​

Lungduaina; Na kihopih te tawh kitotna piang saklo a, thugen theihna

Akua mapeuh thunial hat, hongdawng kiknuam pahpah kihopih pen​​ kineingei ciat hi. Tuadan hunciang hehna in lalo in, nang thugen alunglut zawh na’ng uh hanciam zaw in. Amah’n hongcih zahzah kenzong dawng pahpah ding cihpen, zathet loh ding cih, nazuih zawh leh thugen siam, mitawh kizop den asiamkhat hong suak thei na hi hi.

Mikhat ahoihna, namuh nakleh phat hamtang thei in

Mi khatin midang tea phat theih leh tua kihona pen nuam semsem ding​​ hi.​​ A hizong in apuatham bek hilo in lungsim takpi tawh ama hihna phattheihding kisam hi. “Na thugen zaknop deepin lunglut huai ei” cihdan hilo in, ama thugenna tungtawn in na phattuamna ahihkei leh ama thugen na hang a, natheihnop khat natheih beh na, natel behna hangin lungdam ko cihdan hileh bunzaw lai ding hi.

A thu gentehna agente khat peuhpeuh genkik in, tuapen nong genkik theidiam cihdan ngetna na neihtheihleh, amah thugen na lunglut na leh tuatawh kizui a, ama kivakh na natheihpihna zong ahihman in phatna namkhat mah ahihi.​​

Atung a, ihgen thu 10te pen thugen(mitawh kiho) asiam te’ zuihding leh pelhding thu manpha te ahihi. Hih lai asimkha mimal kimzong nana kisin thei le uh teh, mi thugen siamte dan mah in, miho dan siamna bek hilo in, mitampi te’ pahtak na leh pawl hong huaisak ding cih hamphatna te tampi tak hong ngahbeh sak ding hi. Cing Hau Lun Source: Ten Keys to Good Talk ~​​ Jack Harrison Pollack