Kampau khiatsa kivalhkik thei lo ~ Khat Thang

Kampau khiatsa kivalhkik thei lo ~ Khat Thang

Hun khat lai-in lo-khomi papi khat in a lo vengpa tungah lungkim lohna thu khat hong nei kha ahih manin, nasiatakin vatawi gawp, va kogawp kha hi. A vangpa thu a ngaihsut khak simin lungkim zo peuhmah lo ahih manin, mi a kihopih khempeuh tungah a vangpa hoih lohna thu genin daisak dikdek hi.

Hun hong sawttoh sim ciangin, lo-khopa zong hong kisuang thei bilbel hi ding hiven, a vengpa elzen-a agensiat, adaisakna teng hong kisik petpet ta hi. Bang cih leng ka thugensate lakik in, mai mang sak thei ding a, ka vengpa lungkim sakkik zo ding ka hiam? ci-in a Siapa khat va dong khiankhian hi. Tua leh, a siapa in zong vasa mul ip khat kaikhawm sakin, tua vasa mul khempeuh lo zau sungtengah vawh sak hi.

Lo-khopa zong lawp simtham depin a Siapa sawl bangin vasa mul tampitak lo zau tengah a vawh khit ciangin, Sia aw, vasa mul lo zau sungah ka vawh khin hi ci-in hong kokik hi. A Siapa’n zong ” Aw himaw? Tua na vasa mul khempeuh a vekpi in va tawmkik in la hong caihpih in” ci-in sawlkik hi. Ahizongin, vasa multe huihin na len mangkhinin a tun a banna kithei zo nawn lo ahih manin lo-khopa cimawhin a Siapa kiangah hong guak ciahkik hi

A Siapa in thudam in hopih a, “lo-khopa aw! huih in lenkhin a na muhkik zawh nawn loh vasa multe pen na thugen khiatsa kammalte tawh kibang hi. Kitawmkik thei lo hi. Kikhelkik thei nawn lo hi. A hoih dingin zong kilehkaih thei nawn lo hi. Tua ahih manin thu na gen simin hoih takin ngaihsun masa in na kidop ding mailam ah kong deihsak hi” ci-in thuhilh hi.

I kampaute pen vasa mul bangmahin zang peuhmahin genkhiat ding ol kisa thei hi. Ahizongin, I gensa thu pen kidokkik themthum thei lo hi. Tuhun diak ciang video record khawng peuh na om pahpah lai hi. Lo zau sungah vasa mul vawh pen ol mahmah napi, vasa mul tawpkik ding pen ahizo hetlo thu ahi hi. Tua ahih ciangin I thugen simin, I kampau simin a za, a ngai dingte thuaklah ding, na asak ding peuhun I pau bapbap khak loh ding kidawp huai peuhmah hi. “Kam siam sial lei sang, kam sia sial liau” cih paunak om mah bangin I kampauna tungpanin supna, liauna na ngawn kituak lawh thei hi.

Tua ahihmanin kong it Zomi aw, tomkal leitung nuntak hun sungin, midangte a ding pukna ahi lo, midangte a ding kilam behna, thathak a guan kammal hoihte zangin I kimlepam a nop sem ding, a etlawm sem dingin hanciam ciat ding lunggulhna hi sak tek ni.

Khuai-zu bang-a khum kammal om a, Thaltang bangin hong dawt lum thei kammal zong om hi. Temta hiam bangin mihingte sih theihna ding kammal zong om hi. I kammalte hangin mi khat peuh nuntakna kisiat lawh thei zen hi. Mi khat peuh na hamsiat leh tangtung thei khawng om zen hi. Tua ahih teh, hipa kampau, hi nu kampau le hipa, hinute kikal a kampau, kampau kici khempeuhah khinkhai-in, kidawmin, itna tawh kidim kammalte gingkhia sak ni. Lungdam zel ei! Laisim mimal kim Topa’ thupha! James 3:1-13 Khat Thang