Kammal kilawm pawlkhat (azom 21 July 2015)

Kammal kilawm pawlkhat (azom 21 July 2015)

Mite’ tungah kinga kei in. Amaute puk leh na puk ding hi. Pasian tungah kinga in. Pasian puk ngeilo hi.

Lungsim leh pumpi ki-uk zawh lohna pen, haksatna leh gimna lianpi khat hi gige hi.

Ni tumin khua hong mial a, khua hong vakin zingni hong suah zelna thu na theihsa ahi hi. Na nuntakna pen, lungkham haksatnate tawh hong kidim den lo dinga, gualzawhna khuavak hong taangin, nopna zingni hong suah hun hong om ding hi. Lungkia ken!

Nangma kicin lohna tungah kinga kei in. Na thanem den lel ding hi. Nang hong neipa(Pasian) kicin’na tungah kinga zaw in. Tua in; na thanemna tha hong dimsak ding hi.

Lungnop khamuan’na taktak pen Pasian’ sung bekah om hi. Tua Pasian a om manin lungnop khamuan’na anei ihi kei a, tua Pasian i neih manin tua lungnop khamuan’na anei ding ihi zaw hi.

Mite’n thupi hong sak ding zong uthuai a, Pasian in thupi hong sak ding uthuai zaw lai hi. Mite’n thupi hong sak ding ciang tawh nungta loin, Pasian in thupi hong sak theih nading hanciam in kisin in.

Leitung pumpi sihna a kipelh theih loh hangin, Kha sihna kipelh thei hi. Tua kha sihna bangci kipelh theih ding hiam na cih uh leh, Jesu Khris Gumpa leh Topa in umin san’na tawh tua kha sihna kipelh thei ding hi.

Khazih sungah,
David Tuang