Kammal kilawm pawlkhat (azom 10 July)

Kammal kilawm pawlkhat (azom 10 July)

• Na lamet beina pen lam tawpna hi nailo a, na lungkiatna pen guallelhna hi nailo hi.

• Hun tampi a om tei hangin nang, hun tampi neilo na hih manin kikheel mengmeng in.

• Pasian leh ama kammal tawh na kigamlat leh Satan in hong naii den dinga, Pasian leh ama kammal tawh na omkhop det nak leh Satan in hong naih ngam lo ding hi.

• Kei khialhna lopi thuak lo ding cise kei in! Ama khialh lohna pi mah pau lo phun loin thuak ngiungeu a, Pasian zia ana ngak siam teng mah Pasian in pahtawi-in, na laamto hi.

• Etlawm takin na pumpi na kipuah mah bangin, a etlawm thei pen dingin na lungsim bawl thak den in.

• Hong phatphatte sangin, hong gensiasiate tungtawnin thupha kingah thei zaw sop hi.

• Niam kiatna lakah kha thu lama niam kiatna mah dahhuaipen a, khantohna lakah kha thu lama khantohna mah deihhuaipen hi.

• Midangte ka telsiam zawh hetloh simin, ka lungsim sungah hong suak pahpah thu in; “Kei pen amah hi loin, amah pen kei hi lo hi,” cih thu ahi hi.

• Ei sangin Pasian in i kisapnate tel zaw hi. Ei theihte pen i taksa pumpi ading bek hi lel a, Pasian hong theihpih pen taksa pumpi ading bek hi loin i kha ading zong ahi hi.

• Pasian in lungkham haksatnate tuak kha lo ding leh cihmawh gentheihnate tawh kipelh dingin, hong kamciam lo zaw-a, tuate khempeuh sungah hong ompih ding leh hong makaih dingin hong kamciam zaw hi.

Khazih sungah,
David Tuang