Kalay University huang vai: Side B Lam Suutna

Kalay University huang vai: Side B Lam Suutna

Tulai Kalay University huang vai tawh kisai Zomi makaite leh kipawlna tuamtuamte malakna i za ciat a, thupi ka sa mahmah hi. Hih bang vaite pan ‘Nationalism’ i cih ong khangtoto mah ahi hi.

Hih i group pen i minam vai khat peuh etkaak khopna ding ahih bangin a side B lam zong etkaak dih ni –

1) Kalay University huang pen Chin state leitang 308.56 acres leh Sagaing region leitang 76.44 acres kigawm acre 385 a zai hiin 1990 a giit hi. Tu sawng i buaipih pen leitang keek behna hi loin a lutsa Chin state leitang (or Sizang Forest Reserved) 308.56 acres pen kumpi tungah ownership certificate ngetna hi. Sagaing region gamgi keekna hi lian loin Kalay University campus huang kipsakna ding dan suak hi. University in huang kip a neih ahi ding mah hi. Acre 385 pen a zai lua hi sam lo a, Mizoram University, Aizawl huang 978 acres in zai hi.

2) Sagaing region huam 76.44 acres zong land ownership nei khin maw, kingen maw cih i theih kul.

3) Hih University pen Chin State khualna tawh kiphut, a huang tamzaw zong Chin state leitang hi pah in, a min zong a cilin Khai Kam College cih sawm zah dongin Zosuante aituam bangin kituat hi a, student tamzaw leh a phattuampih diak pen Zosuante mah kihi pah hi. A omna mun thu ah kibuai lua khollo a, a min thu bek kizadah cih theih. Tua hi a, i siamsinna phualpi ading i leitang pammaih i sa lua diam cih suut huai.

4) A leitang sut kik nuam hilo, ownership certificate nei kei le cih ciang maw? I phal kei zongin a laksa leitang khahkhia kik khollo kha thei. Sagaing lam keekzaw le cih lah zaanglo dim mang khin sim, a tamzaw Zosuante neihsa zaanglo mah hi ding. A phun a kitom nuam ding Zosuante mah.

5) Hih university vai ah lungkim lohna i neih leh a thuneite mu-in hoih tak i kuppih masa hiam, a thunei ten ong don lo ahihleh a sangzaw – Higher Education/Ministry of Education a ulianpite or Minister khiang i tun phot hiam cihte ngaihsutna ah ong suak. Tua bang hih masa lo a, lungkim lohna, lungphonate i lah i bawl pen kilawm lo kha thei.

6) I pilvaan kei leh University thunei ten Zomi siamsinte tuam et thei. Ong uap dana i neih i sanggamte khawng thuneite tawh ong holhtuah nuam peuh hi gige thei.

7) I lungkim lohna, lungphona khat peuh i lahnop teh kipawlna picing mahmah khat khawng in ong makaih ziau theih ding hun ngaklahhuai. Kipawlna a neng a tawng, a kisaipih kholh loh pawl dong i kaihkhop pen pankhopna a bat kawmin, kipawlna khat sunga kipawlkhawm theilo minam aikeh kipawlna thahat neilo minam i hihna a pulaklak kibang lel bek kha thei.

8) Gam leh minam ong dawt kha vai khat peuhah Zomi party leh Zomi amatt-te Aw takpi i zak loh zel pen lamdang!

More: Aki patcil in Khai Kam College, tuciang in Kalay University

Thukhupna: Kalay University huang vai pen Sagaing region keekna lah cih theih, hi lo lah cih theih. Inn dingsa, khaai ciinsa kiphiat hi liang lo, i siamsinna phualpi, i bop mahmah leh i phattuampih mahmah a hihna zong suut kawmin pilvang ni. Side A lam hoihsa lo vek cihna hi pah lo. J. Thang Lian Pau