Afghanistan, Kabul khuasung aom Hotel ah thautawi migilo te lut, mi 30 val si

Afghanistan, Kabul khuasung aom Hotel ah thautawi migilo te lut, mi 30 val si

Afghanistan gam ii Capital khuapi ahi Kabul City sung aom Hotel khatah thautawi migilo te lutna hangin mi 30 valtak in sihlawh uh a, adangzong mi tampi liam cih Reuters pan kiza hi.

Tua Kabul’s Intercontinental Hotel ah thautawi migilo te lut hunpen Saturday nitaklam hi a, tuabangin thautawi migilo lut cih akitheih ciangin Afghan Special Forces tetawh kidopah ngekngek uhhi.

Afghanistan Ministry of Public Health panin thunei Spokesman ahi Wahid Majroh in agenna ah misi luanghawm bekbek akigawm in 19 ki puakhiakhin in, City Hospital tuamtuam ah kipuak cihi. Tualak ah mi 6 pen gamdangmi Foreigner vive ci uhhi.

Ahi zongin Senior Afghan security official khatin agenna ah asi limlim pen mi 30 val phading a, tuasang inzong tamtoto zawkhading hi ci’n genkhia hi. Tua asi te lakah Hotel sungah nasem “Hotel Staff” te leh Hotel sungah zingtungte “Hotel Guests” te kihel uh a, thautawi migilo tetawh akido Security Forces tezong asi lakah kihel uh cihi.

Tua Hotel sungah thautawi in alut migilo pen mi 5 hi uh a, tuate zong avek in ki kaplum hi ci’n Afghanistan Interior ministry spokesman Najib Danesh in genkhia hi.

Ukraine gam ii Capital khuapi ahi Kiev City aom Ukrainian foreign minister Pavlo Klimkin inzong Twitter tungah gelhkhia in, hih Hotel sung buaina ah amau Ukrainian gammipih mi 6 ki thatlum hi ci’n genkhia hi.

Video: People escape from Kabul hotel room using sheets

Migilo te’n anunung ah amauleh amau Bomb tawh ki puakkhamsak uh ahih manin, Hotel zong asunglam panin meikuanggawp kici hi. Tua Hotel sungah a awkcip khualzintung pawlkhat te’n lupna delhphah “Bed Sheet” te khihkhawm in inntungpan kumsuk uhhi. Pawlkhat akumsuk laitak un kiasuk in, anuai ah sihiam suaktahiam akitheilo zong pawlkhat om uhhi. Tuabang in Hotel sungpanin mi 150 bang taikhiathei uh kici hi.

More: China Hotel sungah nasemte kihhuai takin agamtatna Video kizaihsim

Local airline Kam Air kici vanleng te’nzong amau nasem vanlenghawl leh vanleng sungah nasem “Pilot & Air Crew” akigawm in mi 40 bang tua Hotel sungah azintung uh ci a, tualak ah gamdangmi Foreigner zong tampi kihel uhhi. Tualak pan in mi 10 peuhmah ki thatlum hi ci’n genkhia uhhi. Local Media te genkhiatna ah asi lakah Venezuela gammi leh Ukrain gammi pawlkhatzong kihel uhhi ci’n genkhia uhhi. Sawltak #zomidaily