Ka Tunnu ~ Sia Do Khup

Ka Tunnu ~ Sia Do Khup

KHUA LEH TUI ADINGIN KIPUMPIAK – Kansau ah ka Nu’ Pa Pu Pau Za Awn hausa hi a, inn tawm lua ahih manin khua kiphiat ding cih thu om hi. Tua hun laitak pen ka Pa meigongin a om laitak hi a, ka Nu a zikik dingin hel uh hi. Ka pu ten “Ka tanu Lia Do Zen Cing tawh na kiten nop leh Kansau ah hong teng un” ci uh hi. Mal Suangzang khua a teng ko beh tengin Kansau a teng dingin thukimna suai (sign) kai uh hi. Kansau khua a kip nadingin ka Nu meigong khat tawh kiteng dingin na kipumpiak hi.

KA NU HONG PATTAHNA

Sang ka kah theih main khua nawl a, Zo lo ah anteh theipuam lo dingin hong tonpih hi. Maiteh loin ka om laitak un maipak bawm khuaithuum khat in ka mitmul lak hong deh a, tu dong a pawn om lai hi. Tawlpi khat ka kah khit ciangin bawmno khat dim maiteh leh maino hong puasak veve hi. Leitungah haksatna tuamtuam om ta leh i nuntak nading sep teitei a kul lam a thei dingin hong pantah hi. Haksatnate paulamin kizawldawh ding thadah ding hong phal lo hi.

Ka Nu in innkuan zingan ding bawl ahih manin ka nau neu pen Pauno (Sia Kham Sian Pau, ZYA) meisak ah hong tawisak hi. Neulai banah ka tutna hong kiliip ahih manin ka nau mei sungah ka kiasak kha a, tu dong a khutah a pawn om lai hi. Innkuan sungah nasem lo a, mawk om cihbang om loin i sep theih ciat sep ding hong pantah hi.

Ka nautegel hong donsak den a, amau suksiat khempeuh zong keimah hong mawhsakin hong tai zel hi. Kipawlna khat peuhpeuh ah khialhna a om ciangin makai pen mah hong kimawhsak ding ahih lam hong theisak a, makai min bek deih loin tavuan lakna mawhpuakna neih ngam ding hong sinsak hi.

MAI LAM ADING HONG GELKHOLHSAK

Ka u in zi nei-in a muanhuai ciangin ka Nu in ka Pa tawh kikumin innpi panin inn hong tuanpih uh hi. Ka Nu in TB nei-in cidam khollo ahih manin ama sih khit ciangin innsuang losuang khat ka hih ding hong deihsak a, innsuang zo dingin hong gel kholhsak hi.

Ka pil ding uh hong deihsak mahmah ahih manin Singgial khua ah tanlang kah dingin hong kha hi. Tua lai-in Kansau ah sang om nailo mawk hi. Leitung ka zawh nadingin lungzuanna leh haksatna thuak dan hong kisinsak hi. Ka Pa in bawmno leh hakkolno hong bawlsak a, a dimin antang leh meh ka pua a, lel lua-in ka kah ciangin ka lawm ten hong dawn zel uh hi. Leitung pen kap liang mah a do ding ahih lam hong pantah khol hi.

PHAM DING LAILUNG GELKHOL

Ka Nu dam lo semsem ahih manin lokuan zo nawnlo hi. Ka Pivom (Zel Khaw Ning) kiangah na hawh zelin “Ka tate adingin bangmah ka sep zawh nawnloh hangin khua sung pan kap sain hong ciah zel uh a, ‘Nu aw, Nu aw’ hong cih ciangun kei na om ing a, a lung uh muang tuam hi. Tun kei si ding ing a, inn ah kap sain a ciah uh hangin a khitui uh a nul ding kuamah om nawn lo ding” ci-in ka Nu na kap zel hi. Amau ading hilo tate ading bekin a nuntak sau nuam i Nute ahi uh hi.

SEN TUNNU MUALLIAM TA

1978 kumin “Na Nu sita ahih manin hong ciah in” ci-in hong kisam hi. Singgial panin Kansau ah ka ciah pah uh a, ka Nu in hong dawn thei nawnlo hi. Pialkhang ah ka Nu’ luang na kisial ta hi. Ka dah hangin ka kap se kei mawk hi. Hankuang ah a kisial ding ciangin ka Pa in kahtam hong lo hi. “Cing aw, nang a gol teng tawh om ding hiteh, kei a neu teng tawh na om ding hing, lungnuam takin na pai in aw” ci a ka Pa’ kahtam lawhna aw tu dongin ka bilkha ah ging zel lai hi. A gol teng a cih pen a sisa ka u Pau Suan Kam leh ka u Thang Do Lal a ci nuam hi a, a neu teng a cih bel kei, Kap Lian leh Pauno a ci nuam ahi hi.

TUNNU NGAIHNA IN HONG TUN VANVAN ZEL

Khangno khat ka hih ciangin ka Tunnu ngaihna in hong tun san pan mawk hi. Nu ngai lua-in ka kapkap a, Nu ngaihna late ka phuak zel hi. Tu dongin ka Nu ngai lua-in ka kap thei zel lai hi.

I NU SISAN HANGIN

I nute i sun ciat hi. Thuman ka gen ngamna pen ka Nu kiang pan ka ngah ahi hi. Ka Nu pen khanglui lai zununna leh misi zanhahnate ah lusu ngeiloin a tavuan a zo den khat ahi hi. Topa nasepna ah kum tampi zanmengin cialpi ka bawl zawh nadingin ka Nu a sun dingin Pasian in hong siam hi. A khua a tui khualna-in meigong khat tawh kiten ding a khensat bangin tuni ciangciang ka unau un mipi adingin nasep nopna lungsim ka Nu sisan pan ka ngah uh hi.

THU KHUPNA

2021 kumin thusia tampi a om tei hangin Nute’ Ni a zang lai dingin nang leh kei Topa in thupha hong pia ahih manin Topa hehpihna i phat hi. Keimah bangin Nu a nei nawnlote in zong lunglenna lamin la lo zawin “Ka Nu dam lai leh bang sem dingin hong deih tam maw” cih ngaihsunin i Nu’ deihna tangtunsak sawm ciat ni. Nu a nei lai khempeuh in zong midangte sangin i hamphat zawkna phawk kawmin i pianna Nu lungdam nadingin gamta kampau ciat ni. Topa Pasian in Zomite Nu’ thupha a sang ding leh Nu a lungdamsak mahmah dingin hong siam ta hen. Deihsakna lianpi tawh; Langh Do Khup ( Khuata mipi)