Ka sungthu kiukhat (2) ~ Deih Tung

Ka sungthu kiukhat (2) ~ Deih Tung

Ka lawm te tawh video ka et lai tak a hizong, pawi sung ah a hi zong in nong muh ciang ka kiang ah nong pai a, ka lawm te om pi pi ka kiang ah nong tu hi. Ka lawm te in nang hong hua mah mah ding uh cih pen nang zong na thei a, ken zong ka thei hi. Kei tawh a kisai thu a hih nak leh maizum na na nei kei a, khat vei vei ciang in mihai na bang hi. Na lai pil na sang mah mah a, mi dang te muh na ah mizah tak mah mah khat a hi kim lai kei tawh ih om ciang nau pangna bang lel mawk hi. Ke’n ka hih leh ka zi ding te pen sang siamah hi lo lim lim ding, sangsia mah cih pen thu hilh, thu sai bek thei uh hi. Sangsia mah lim lim zi in ka deih kei hi ka ci a, nang na neu tung pan in sangsia mah a ut mah mah kim lai sangsia mah na sem nuam nawn kei hi. Hih bang in na om man inzong midang te in mihai tawh ki bang hongsa uh hi.

Khualzin in a gam la ah ka om ciang ni sim phial in lai nong khak nuam a, a hi zong in nong laikhak te sim lo ding ka hih lam thei na hih manin kha khat in khat vei ta bek nong khak hi. Na lai gelh te hoih ka sa a, lai pil leh a thu siam khat na hih lam kong thei hi. Nong lai khak khem peuh hong thuk ning ci leng hih leitung ah laigelhsiam pen ka suak ta ding hi. Banghang hiam cih leh laitam gelh lua in lai gelh ka siam zo tanghial ding hi.

Nang pen na meel hoih a, midang tam pi in zong hong ngai hi. Ka lawm te in nang thu hong dong dong uh a, na meel hong na hong gen gun uh hi. Na pil na leh na thu siam na in mi te et teh taak ding na hi a, nu mei hoih khat na hih lam mi te ciap teh taak na hi hi. Hih lei tung ah lawm bang zah ngai khin na hiam? cih ka thei kei a, kei nong ngaih lam ka thei hi.

Nang pen mihau te in hoih hongsa uh a, hong ngai tam pi om cih ka thei hi. Mo ding in hong ki dong om ngei khin cih ka za hi. A hi zong in nang kong dot ciang in lah nang’ kei nong im hi. Na lung sim ah bang om cih pen mi kim inthei na pi, pawl khat in na ngaih theih theih na ding in phone hoih no no, van man pha tam pi hong lei sak zong tam pi om cih ka thei hi. A hi zong khat vei sang inn ah ka bawlpen khat nong kawm pen nong pia nawn kei a, tua bawlpen pen hoih tak in na kep lam ka thei hi. Mi dang te bang in sum nei lo ka hih man in phone hoih no no kong lei sak zo kei a, diary bu khat hong leisak in ci a nongnget lai in zong a tawmman mah mah khat bek kong lei sak zo hi.

Midang te in a hoih no no hong lei sak uh tam mah mah cih ka thei a,a hizong in ke’n kong lei sak pen hoih tak in na kep lam ka thei hi. Khat vei Shopping ih pai leh nang a ding puan khat kong lei sak sawm a, a hi zong in na ut kei a, na heh hi. Kei kong nget loh pi a, nong piak sawmpen kong ngaih nawn loh na ding a van khat hong lei sak sawm na hi ci in na khasia a, na khitui a luang hi. Tua bang ahih zaw zen leh cih na tawh kong lei sak kei a, nitak an nekhawm in ih ciah hi.

Khuasung ah ka pai ciang ka siksakol ka zang a, nang na motor cycle uh a zang thei hi na pi na siksakol mah uh na zang hi. Kei tawh siksakol sik ki dem ni nong ci a, khat vei KamHau tual pi ah ih ki dem lai ka phawk hi. Kei sang in nakpi in a gimzaw ding in na sik a, a den ciang gim lua in ke’n kong teen ding na ut man a hihi.

Khat veivei ciang zan tha pai in ka lupsuk pan ki pan zingsang ka thawh dong ka mangsung ah nang tawh ka ki thuah den hi. Mang ka man den a, ahi zong in tua zah a mang a sau ka man ngei kei hi. Zan tha pai a mang ka mat pen lam dang kasa a, mang khiat siam te ka dot leh na lawm ngaih nu in hong phawk lua cih na hi hong ci uh hi.

Midang pawl khat, nungak dang te meel hoih ka sa thei mah mah kei a, nang tawh ki bang zaw deuh te mukha leng ka nuam tuam hi. A hi zong intua te pen nang dan in hoih lo uh hi. Na taltung ah nasam pen samkilh neu khat tawh na kilh se se a, tua in ka mitkha ah hong luai den hi. Tua sam kilh neu in na sam na kilh liklek se na in nang pen a siangtho, aki cian na hih na hong ki lang sak semsem hi.

Tom no khat sung khual ka zin ciang nang zong khua ah na om nuam kei a, khual na zin nuam hi. A taktak in cileng nang pen sum ki sam a, sum zong ding a khual zin nuam na hi kei a, na lungleng a daih na ding a ci bek na hihi. Khua ah kei ka om loh sung pen nang guak in na om nop loh lam ka thei hi. Ih vak khop nate, ih ki thuah na te na mitkha ah mang theilo ding a, ke’n zong ka mumang sung na ngawn ah ka mang ngilh kei hi.

Khual ka zin khit deuh in ka inn uh ah ka nu te nasep na na huh te, ka nu leh ka pa in zong hong gen sawn uh a, khua pih pawl khat te bang in nang pen a hai hong ci mai ta uh hi. Pasal nei nai lah hi lo, a pasal dan a a ngaih sun keei hi ven cin ci in mite in nang pen hong zah ko uh hi.A hi zong in nang pen na lungsim hoih a, midang te tung ah na thu khual hi. Khualzin na pan in khua kong ciahkik ciang khua pan in ka ciah ding a ngak ngak na hih lam ka thei hi.Bang hang hiam cih leh na lungleng lua in na na gawng hi.

Midang te a ding in deihsak na na nei a, mi heh pih theih na lung sim na nei hi. Na meel hoih lai, thu siam lai, mi heh pih siam lai nungak khat pen kua in hoih sa lo in om ding hiam? Na pai na khem peuh ah na gimnam tui vau vau a, na minthan na in mun khem peuh ah ki za vangvang hi. Mun khat ah nang tawh ka pai khop ciang ka maizum kei a, nang zong na mai zum kei hi. Bang hang hiam cih leh nang bang a meel hoih khat tawh ka pai khop pen kei a ding in vang ka nei tuam hi.

Khua sung ah laisim thei lo te nitaksim in lai na hilh na te zong ka thei a, nang pen sangsia mah a ut mah mah na hih lam kong theih beh semsem hi. A hi zong in nang’ pen tom no khat sung bek khua pih tui pih te in lai a theih na ding uh deih na tawh tawm khat sung bek hi na ci a nong khem hi.Khua sung ah puteek piteek te kiang ah na pai zelzel a, a ki sap sap uh na huh hi. Mi ci mawh na theih a om nak leh na om khong thei kei a, ui meikang na bang liang hi. Thu na thei a, na pil hi. Na hai na nam khat bekbek a om hi tua in bang hiam cih leh lawm ngaih na lam ah nang zah a, a hai om lo ding hi cih mi khem peuh in thei hi. (Zolai khantoh na ding deih na leh Zomi Khangno te in laisim na lawp na ding uh deih na tawh nungak leh tangval thu kong gelh hi ) Deih Tung