Ka phawkkhak vilval kanu kam – 11

Ka Phawkkhak Vilval Kanu Kam – 11

Nuntak khuasak haksat man in kham panin kawlzaang ah ka lal uh hi. Ka pu leh ka pi ( ka nu lam leh ka pa lam ) te-in hong zui lo uh ahih manin ‘Pu’ ci a kasap ding uh leh ‘Pi’ ci-a ka sap ding uh omlo ahih manin innlak sanggam te ‘pu leh pi’ in manin ka sam uh hi.

Nikhat ka pu te’n sa go in nitak an siim dingin ka innkuan un hong kho ahih manin ka nu in sa siim dingin ka u tawh hong tonpih hi. An nek ciangin ko nuta teng ka tu khawm uh hi. Ka mehkuang vuah satak tawm bek om ahih manin aom sunsun teng ka nu in ka u tawh hong hawm sak hi. Ka sa uh abei ciangin an kham nailo ka hih man un ka u tawh satak duh in ka nu kiang ah ka ngen kik uh hi. ka nu’n mihon lak panin hong ngetsak ngam pak lo ahih manin ka u tawh satak duh in mi honlak ah ka kapgawp uh hi.

Sun khat ka nu in ka neulai thu hong gen in, “ Na u tawh na neulai un na Pukhual te’n aa ih sa siim lai-in, satak duh a milak ah nong kibawl uh mah, ka maizum buang ei,” ci-in hong gen kik hi.

Ka nu in hong gen khitgaih loh hangin kei hangin milak ah, a lawm a gual mai ah tam veipi tak maizum na leh maimial na a thuak lam ding nung phawk sansan ing!

By,
Tg. Pau Khan Kap
October 8, 2014
Columbus, Oh